大家日日經過錦上路西鐵站沙塵滾滾嘅情況似乎仲要維持好幾年。除咗依家已經係西鐵站起緊嘅信和第一期住宅之外，政府嘅《錦田南公營房屋發展計劃》已正式諮詢區議會。大家唔想人口大增或返工上唔車，來！俾啲耐性睇睇點解我反對呢個計劃！
1.《錦田南公營房屋發展計劃》會用到鄰近西鐵站嘅錦上路站、錦河路、東匯路同錦莆路，即係約18.5公頃土地面積。如果取得立法會批准撥款，工程會喺2021年展開。前期工程會喺2023年完成。首批人口預計2026-27年遷入。預計興建9座，約 9,000 個公營房屋單位，可容納約25,200人口。呢堆數子代表乜？現時錦田人口約20,000多人。呢個計劃預計喺6年內遷多成倍嘅人口入來！
大家千祈唔好將呢個計劃同依家喺西鐵站已經進行緊嘅工程混埋一齊睇呀！現時信和發展嘅物業會喺舊西鐵停車場起，另外恒地亦申請緊發展東匯路旁邊土地。呢兩個物業計埋有差不多4500個單位！未講完，規劃署喺2014年完成「錦田南及八鄉的土地用途檢討」後，得出結論係會塞9萬人口入來！公屋同以上提及嘅項目只不過係開始。
不論係剛入來，定係由細住到大嘅居民，都係因為鍾意鄉村生活先會選擇來到錦田居住。發展計劃只顧城市發展，並無諗過喺鄉郊居民享受嘅就係簡單生活。因政府規劃上嘅失敗，令到好多新市鎮成為只有房屋，生活配套欠奉嘅天空之城。
2. 當年天水圍規劃而元朗為中心，居民生活都要依賴元朗，叫苦連天。多年後嘅今日先有較為基本嘅生活配套。咁錦田南計劃又如何呢？我哋來數數文件中提及嘅設施：有兩間小學，籃球場、羽毛球場、乒乓球桌、綠化休憩設施同兒童遊樂場，私家車、電單車、單車貨車車位都會有。屋邨管理設施同社福設施，連同街市，幼稚園同店舖都會「擬提供」 或「適時補充」。即係錦田南計劃中嘅居民好大機會喺起完樓都依然要依賴元朗提供生活所需。
3. 大家都關心嘅「交通影響評估及緩解措施」，會將錦田公路同東匯路之間一段錦河路擴闊至雙程雙線分隔行車道，將高埔村至錦河路之間一段錦田公路嘅東行線擴闊至三線行車道，同埋東匯路至林錦公路之間一段錦田公路進行改善工程。文件中形容，做咗以上工程，就「不會對附近交通（包括錦上路和博愛交匯處）造成負面影響。 」係咪預計搬入來嘅人只會喺西鐵站附近範圍生活？出市區只會選擇駛用大欖隧道，唔會經錦上路去吐露港公路或者博愛去屯門公路？
雖然計劃有提到會「研究建議將錦上路提升至合乎標準的雙線雙程不分隔車道」，但十劃都未有一撇，只有「協調相關部門適時推展」。錦上路居民爭取多年都未能改善交通問題，依家仲要塞多25000人入來？
另外提到喺「博愛交匯處提供專線由青山公路左轉元朗公路，以改善現時博愛交匯處西行左轉，即由錦田往十八鄉」，但都只會喺「下午繁忙時間行車相對緩慢」嘅時候推行。呢個亦都喺「協調相關部門適時推展」。
更重要嘅係，唔揸車嘅人點樣出市區？俾返啲數字大家睇，跟據獨媒報道，2019年頭「錦上路至荃灣西一段於2015年、2017年及2018年的載客率在繁忙時段均錄得超載，分別為104%、101%及101%（以每平方米站立 4 人計算）。」依家繁忙時間搭西鐵已經等多班車，去大欖隧道嘅巴士班次又唔足，到時返工返學到底要預多幾多時間呢？
4. 最後，來睇睇錦田特色，就係多農場！係疫症前，我哋都只依賴街市同超市提供嘅大陸菜度日，忽略本地菜嘅可能性。好多人近月都幫襯多咗本地農場，發掘咗佢嘅鮮甜同安心。如發展錦田八鄉一帶，呢個本土可能性就會逐步消失。我哋唔只要保留特色，係要發展出靠自己嘅食物供應，始終都係自己地方嘅食物最方便，安心同新鮮。大規模城市化只會扼殺本地農業發展！
好多謝你睇到最後，証明你真正關心❤️講到尾，發展要合理。
下星期三就會有房屋及城鄉規劃和發展委員會會議諮詢呢個計劃，大家仲有咩意見歡迎提出，到時我會有理有據反對倉卒發展錦田南！