隔一隔先寫
琴晚可能係香港最多人飲酒同上載酒樽相嘅一晚，呢個社會現像好特別。
以往聽到有人確診，大家都係唉唉聲。
琴晚聽到有人確診，大家係舉杯慶祝！
點會咁呢？香港人黑心？香港人好鍾意開Party？唔會啦，如果回歸後嘅香港唔係發生咁多事，好多香港人可能籌緊錢同口罩捐俾武漢㖭呀。
世界上冇無緣無故嘅恨，琴晚整個網絡嘅狂歡，個幅度係遠遠超出一般嘅幸災樂禍。
當中嘅社群情緒，感到大家除咗喺被打壓嘅逆境中出一口氣，苦中一點甜呢啲，我更感到香港人嗰種誇張嘅興奮，係有「仍然可以堅信自己信念」嘅振奮。
堅信咩信念？
「善有善報，惡有惡報」呀。
或者，咁多個月來，當惡人喺現實社會中未有惡報，我哋只可以喺電視電影動漫當中尋找慰藉。但咁多個月，惡人都未有惡報，我哋有一刻會動搖，「惡有惡報」嘅信念慢慢變成祝願，由相信惡有惡報變成希望惡有惡報，甚至會跌入懷疑係咪真係會惡有惡報。
其實，我哋好需要自己嘅信念得到引証，去支撐同圓滿我哋嘅生命，就好似嗰陣羽毛球李宗偉咁努力，我哋都想佢贏返林丹一次拎冠軍，圓滿「勤力有回報」呢個信念。
但係，香港長久嘅人禍，惡人冇惡報。
721打人嘅白衣人，冇報應；
走咗嘅警察，冇報應；
射盲人，冇報應；
多個月嚟嘅警暴濫捕，咁多香港人頭破血流被捕入獄，警察冇報應；
林鄭唔封關，冇報應；
高官無能涼薄，冇報應；
其他官員同警隊嘅惡行有排數我都唔數喇，但全部都冇報應，實在令人感到極端嘅不公義。
香港人除咗要相信「若然未報，時辰未到」去安慰自己，近日嘅訴求，亦慢慢出現一啲詛咒式嘅許願：林鄭生Cancer、黑警中肺炎呢啲發洩式嘅願望。
//
人禍長期不公義不公平，
天災病毒卻又公平公正。
//
呢個位，似乎係琴晚香港人狂喜現像底下嘅根源。
「終於，等天收，等到喇。」
呢種惡有惡報信念被引証嘅感覺，係集治癒、安全感、願望成真、痛快、道德力量於一身嘅多重快樂。
講真， ＃邊有行業會咁樣樣俾人詛咒㗎
PS病毒其實可以都係中國人禍嚟
PS2其實我唔想啲壞人咁快死，我好膠咁想佢哋可以病住見証自己種下嘅惡果，反省懊惱。