假如妳不幸在去年底遇到意外，昏迷多時，今天突然甦醒過來，看見身處的環境和氣氛，妳會懷疑自己是否仍在夢中，這真的是我生活了多年的香港？
打劫珠寶聽得多，打劫廁紙？一睇見呢則新聞，真係忍不住笑，相信大部分人亦一樣。但笑還笑，大家其實想喊出來。
香港怎會咁折墮，淪落到咁既地步呢，究竟我哋做錯咗乜？
由搶口罩、搶米、搶罐頭、搶M巾發展到今天有匪徒劫廁紙，政府做過甚麼？
昨天勞福局長羅致光又認叻，講佢點樣慳住唔用口罩，間接益人。一個高官唔係諗點樣在政策層面防止奸商囤積口罩，牟取暴利，而是寫網誌，吹嘘自己有幾關懷基層，妳就知道做香港人有幾不幸。單靠市場力量去令供求取平衡，政府無任何應對措施，即任人抬高價錢，無錢或有錢都撲唔到口罩的人，唯有用滾水或滴露清潔完再將口罩重用，鬼叫妳無私家車要迫巴士迫港鐵，無本事有個獨立office 自己做嘢咩!呢個肯肯定係妳嘅問題，無得歸咎政府喎！
唔知到時羅致光會唔會寫多篇網誌，講佢點樣食少D嘢，以便兩日先去一次廁所開大，慳番幾格廁紙，造福人群呢？