（獨媒特約報導）這幾星期，香港醫護經歷了多少個無眠夜。武漢肺炎疫情持續惡化，香港已出現多宗本地傳染個案。醫管局員工陣線本周發起罷工，要求政府及醫管局加強防疫措施。同為護士的情侶張先生和龍小姐，由周二開始參與罷工升級行動，與一眾伙伴共同面對未知的恐懼。
張先生和龍小姐是一對90後情侶，同為提供緊急服務的護士，過去四年半於新界西服務。昨日他們與同事走到元朗連儂牆，親手製作白絲帶，連同醫護罷工單張派發予途經市民。
內科病房防護裝不足：平時每日都要換5至6套
龍小姐是內科護士，站在抗疫最前線，任何有上呼吸道感染、發燒的病人均會送到內科病房留醫。她坦言，現時的個人防護裝備絕對不足以對抗傳染度高的武漢肺炎，「平時做嘢每日都要換5至6套PPE，口罩係唔可以重戴，量血壓出返病房，個口罩理應要掉，而家上頭真係會數住每個醫護人員每日唔可以用多過幾多個口罩。」
早前流傳相片，在醫院執勤的警務人員穿著全身保護衣，而時刻須接觸病患的前線護士則被限制口罩用量。不少醫護人員在「醫管局員工陣線」的Telegram頻道上亦不時抱怨，認為政府聲稱會加大力度支援醫護人員，實際視醫護性命如草芥。
在外科病房工作的張先生補充指，雖然其工作崗位不及內科病房危險，惟亦未獲足夠裝備，「本身話會補充一定數量嘅護目膠片，點知最後得幾十塊，同事都唔夠分」。龍小姐打斷道，「去到呢個時候，都係得一塊擋住飛沫嘅膠片去保護雙眼，側面係完完無包實，我哋嘅頸部同雙腳都無防護裝備包住。當年沙士，好多護士就係幫病人tube完後中咗。」更甚是，現時沒有足夠制服作更換，醫護人員不能每天清洗制服。張先生指，現時發生的只是零星的社區感染，前線醫護的保障已如此薄弱，可料到大規模社區爆發時，前線工作將舉步為艱，醫療系統亦將面臨崩潰。
上年度，醫管局錄14.4億元盈餘，行政總裁年薪更加至626萬。作為提供公營醫療服務的機構竟錄得如些巨額收益，反映長久以來，香港的醫療系統以最少資源服務最多「顧客」的商業邏輯來運作，導致醫療系統超負荷。說到這裡，張先生迅即想起病房內「最低層」的病人服務助理，待遇每況愈下，「其實成個醫療系統要運作到落去，病房每一員都極為重要，助理姐姐都好高危，先唔好講佢哋人工已經低，醫管局從來無珍惜、無點支持過員工嘅付出。」
憂摯愛安危 「只能希望平平安安」
憶起剛入行的初心，龍小姐娓娓道來，「一開始諗法真係好簡單，就係想用自己嘅能力去幫人，知道生命嘅可貴。入呢行真係唔係為錢，如果要用錢去諗，就會揀一份有得升、有得增值嘅工。」張先生深有同感，「真係唔係為錢，入行前發生過沙士，全港市民都記得，咁多人染病，8個醫護嘅犧牲。其實我哋都預咗總會有一日要入dirty ward做嘢。」
面對死亡，他們表現得無絲毫畏懼；參與罷工，是不希望全港市民、病人及醫護為政府的失誤埋單。「而家真係封關最後機會，真係遲咗好多，又有病人隱瞞出入境紀錄，一定已經有好多受感染者每日喺街度行嚟行去，或者已經入咗普通病房，醫護互相接觸，又可能傳咗去好多間唔同嘅病房到。」張先生指，這亦是當初選擇加入工會的原因，「我哋都係一班因共同理念而罷工嘅醫護同事，一個都不能少！」
與參與罷工的8,000多名醫護手足一樣，二人均收到醫管局人力資源部的電郵，恫嚇罷工員工將要承擔後果。「罷得工真係預咗有後果可能會扣糧、甚至被炒；但係，唔罷工嘅後果就係賠上好多條命，所以我哋先會咁堅持要工會嘅五大訴求。」張先生續指，如有同事單獨被秋後算帳，他堅信曾參與罷工行動的同事會再次走上街頭，為同事發聲，共同進退。
被問到會否擔心在內科病房工作的女友時，能置生死於度外的張先生也不禁熱淚盈眶，難以掩蓋擔憂的心情，慢慢吐出想說的話：「其實我哋出年年頭就結婚。」二人對望後，龍小姐手挽著男友，被打動至淚凝於睫的她繼續說：「其實好多醫生護士都係夫婦，我哋都會互相擔心大家，如果大爆發，佢做嘢嘅外科病房都係要收肺炎case，無一倖免。只能夠希望可以順順利利，平平安安就好。」
義工：醫護都係人 我哋做得幾多得幾多
2003年，沙士疫情全港爆發，醫護人員盡力搶救病人，卻迎向了自己的死亡，令人發覺大家只是血肉之驅，面對瘟疫帶來的不確定性同樣脆弱；17年轉眼過去，今次一眾醫護人員則選擇延身而出，力圖阻止政府作出錯誤判斷，不禁令途經的市民反思，「作為香港市民、他們的服務對象，只能在旁眼白白看著他們罷工嗎？」
一名多次參與醫護罷工宣傳街站的義工向記者指：「大家都係人，我哋都唔想見住身邊嘅人有病，永遠都見唔到自己深愛嘅人。對於醫護嚟講，這兩星期好黑暗，但我哋會喺到，我哋做得幾多得幾多。」
記者：黃雅文