口罩荒繼續發酵，林鄭當然不能開脫開來。但見大家瘋搶口罩，而家仲要搶埋糧食，我想講大家都是時候要更理性抗疫。我觀察到有幾點：

第一，有關口罩問題，我覺得大家有種感覺，「有口罩就有生命有曙光！」，我想講呢個是一個錯誤想法。有口罩唔係大哂。早前我都講過，唔係你「有無個口罩」、而是你「有無戴岩個口罩」。你買買買、但又戴到錯哂、更加浪費。而家出街，10個有2 - 3人仍然用緊錯的戴口罩方法。已有研究顯示，我們戴口罩時間越長，會錯誤以為自己「有做防護措施」、就更難遵守正確戴口罩方法（相關資料）。如果戴錯口罩，你同樣有感染風險；起口罩荒之時，大家更加要好好珍惜自己手上口罩。咁有閒情出街排隊搶口罩野食，不如節省少少留起屋企節省個口罩仲好。

我明不少面對口罩短缺是好驚。但記住戴口罩外，勤洗手同埋有 ‧ 意 ‧ 識 ‧ 避開他人飛沫／分秘物也十分重要，唔做呢D野等於無用；咁樣通宵排隊搶野法，又凍又盛、又多人聚集、癡哂人地D病菌、唔病都變病。寧願屋企大掃除，做好個人衛生，經常抹電話／Keyboard／Mouse，出街最好唔好掂任何扶手／按鈕—除非有邊個PK專登起你面前打個大乞嚏，否則如果做好上述工作，惹到機會率已經低好多。講真，我寧願節省住用口罩，都唔會買幾百蚊甚至千蚊一盒口罩。外科口罩不能重用，但也有一些節衷方法，例如跟下K. Kwong教路以延長口罩壽命（相關資料）、睇多D新聞、學下在不得已之下如何重用口罩（相關資料）—當然這不算理想，但也是節衷方法，總比蒸口罩Make Sense吧？

第二，有關可重用口罩問題，我發覺有不少人對於可重用口罩頗抗拒。但試想想，一人一日幾個口罩，真是長久之法嗎？我想強調一點，暫時種種跡象顯示病毒由飛沫傳播而非空氣傳播，所以能抵擋飛沫級別的口罩足具阻抗力—如果空氣都傳播得到，應該唔止呢個爆發數字。購買可重用口罩才是可行的永續方案，只要處理得當，某些可重用口罩規格亦及得上外科口罩—仲要講緊個疫症「唔知幾時完」的情況下，難道真的過一頭半個月就同人搶一次口罩？！為口罩而生活的生活，仲係咪生活？！

都是果句，尋常百姓只出街搭車買餸，不無啦啦出入醫院重地，中招機會理應比起醫院前線低得多，防護規格亦不用去到醫療N95程度；全球口罩荒下，N95都是留番俾更需要的醫護前線啦。但當然，大家亦應使用世衛建議的口罩規格，你唔好同我講戴個普通布口罩或者抗爭口罩就算。

第三，經過SARS一役，仲信謠言？仲信封關＝封貨？如果你真係信、不但唔理性、更加智力有問題（Sorry 我 Harsh 左但真是咁諗...）。入境管人、海關管貨，封人入唔等於封貨ok？而香港入口來源也不止大陸仲有其他地方。自己要足夠就可，買一大堆貨放在家、佔位封塵污糟不特止，真係世界末日的話，俾你用多一年半載又點？個政府癲姐、大家唔好同佢一齊癲好嗎？個政府瘋狂，大家無必要同佢一齊瘋狂架？世界上有好多壞人故意製造謠言、唯恐天下不亂ok？

最後，真係要套用某藍絲專頁果句，唔該「冷靜分析、理性思考」，起人心惶惶的時刻，更加需要大家冷靜，理性抗疫唔該。