林鄭試過貓哭老鼠，陳肇始照辦煮碗，昨日（一日）做電台節目時突然流馬尿，話擔心醫護情緒喎。嘿 ！咁大個人，做到咁大個官，連喊解決唔到問題都唔知？妳地遲遲未全面封關，大量潛在高危人士湧港，社區爆發迫在眉睫，講慘情，幾時及得上香港人，幾時及得上被迫搵命博的前線醫護人員。人哋化悲憤為力量，罷工抗命，唔畀妳拖字訣，妳就用眼淚攻勢？慳番d眼淚，擘大對眼睇清楚自己幾害人害物先啦！
（1）不封關等噩運到
陳肇始話防疫措施要一層一層咁做，但袁國勇就預測可能有一百四十萬人受感染，咁妳點樣一層一層法呢？係咪前線出事再由後勤頂上，一級級推向前線，唯獨醫管局高層坐在冷氣房調兵遣將？
瑪麗前副總監李國維反對罷工，要求醫護緊守崗位，不要拖大家後腿。但被記者問到防控有誰做錯，他又不答。咁即係點，無人做錯?抑或有人錯，但全部由緊守崗位的醫護硬食?林鄭唔封關，香港好快就被全世界封，係咪想一鑊熟至安樂？市民普遍支持罷工，並非不知道自己有風險，只是兩害相權取其輕。某程度上，市民變相有份抽生死籖。萬一不好彩，身體有事，是有機會延誤施救的，但有甚麼辦法？一旦社區爆發起來，不止醫護，普通市民一樣很容易中招，同樣有風險，既然武肺咁惡，無理由唔押注在封關抗疫上？
總之，香港人咁慘都因林鄭，無人知佢怎樣同習近平傾，係咪唔想失威，抑或唔想助長黑衣人的氣勢?有人話林鄭不封關是為了減輕中國醫療壓力，弊在香港醫療系統連照顧本地人需要都唔掂，去年單單流感高峯期都爆晒廠（林鄭兩個月前仲要cut大學醫療教育資源，起大白象和泵水去超支工程就永無托手㬹，建制派仲話呢d叫為民生），今年咁嘅環境，就更加無可能兼顧中國湧來的病人。人命嚟架！大難臨頭都仲要政治掛帥？
（2）口罩供不應求
全城搶罩，人心惶惶，但商務及經濟發展局長邱騰華就拒絕將口罩列為儲備商品。點解呢?或會為商界採購口罩增添困難喎，正本清源做法是增加口罩供應。咁即係點？咪好似過去二三十年政府回應樓價過高的問題時咁，不能干預市場運作，損其效率嘛，要由增加供應入手，結果便是少作為，甚至不作為，任由市場大鱷話點就點。呢種做法仲一直得到王于漸、雷鼎鳴等經濟學者背書，一話推行租管、空置稅、增值稅等保護巿民居住權措施，就猛烈批評政府搞共產主義、鬥地主、好心做壞事。事實證明，放任市場行為，只是假市場自由之名容許商家竭澤而漁，市場越有其口中的效率，居住權越得不到保障。
邱騰華不幫市民買口罩，背後道理亦一樣，以為商界各自去搵門路更有效，但非常時期，全球貨源緊張，一定被抬價，而就算搵到貨番來賣，除了少數良心商人，睇錢睇得重者眼見奇貨可居，無理由唔再乘機加價，政府不作為即縱容這些商家有足夠自由度趁火打劫，魚肉消費者。明明事態極度嚴重，仍堅持口罩係普通商品，政府不能阻商人搵食，那對無能力買貴價口罩的人來說，便是連生存權都得不到應有保障。但明明在危難時，由政府出面統籌去和各地生產商講數，方能把議價能力提升至最高，幫巿民爭取到最好的價錢和最快的貨期。
（3）集體恐慌心理
超市無米買，日日翻貨轉頭便清，連在網上買罐午餐肉都不容易，反映市民的恐慌心理持續高企。現在社區未有大爆發，大家可能害怕出外用膳才大量搜購生活必需品。萬一疫情暴增，各國中斷和香港的往還，會否出現糧食和日用品短缺的情況呢？這本是杞人憂天，但林鄭政府的無能和不作為，以及奉行教條主義:任何事先考慮對中共及本身的好處和壞處，再考慮對大商家的利益，用所謂市場原則去處理，對政府失去信心的巿民，很可能因風吹草動而搶購物品，這個集體失控危機會將香港帶去何地呢？