筆者無法確知上帝是否存在，但如果存在，「武肺」橫空降世，就像向傲慢自大、自以為任何事都可受控的凡人摑一巴掌。
不足半月前，國家專家組主任醫師王廣發仍向外宣稱，疫情可控，今天卻證實他本人確診感染「武肺」，實在是個黑色笑話。
一日之間，「武肺」病例大幅攀升，究竟係情況太嚴重，紙包不住火，抑或好戲劇性咁近日疫情大爆發，香港人心中有數。總之，連習近平都開腔，表示高度關注疫情，要舉國做好防疫工作。耿爽今次亦無譴責外國勢力和世衛造謠生事，借機干預中國內政、損害中國的國際形象和人民感情，仲好聲好氣，話中方願意與國際社會攜手應對疫情，共同維護地區和全球的衛生安全。「耿爽模擬器」幾時會咁講野架，突然轉死性，咪即係話今次好大鑊，大鑊到唔可以靠封鎖消息，關埋門自己搞掂囉！
但中國不是很強大的嗎，強大到任何問題用自己方法都可以解決，為何今次又要借助外力呢？尤其這些外力秉承國際的人道標準，對人命和人權的重視跨越邊界，而妳就對人家所重視的普世價值嗤之以鼻，郁D就話人別有用心，干預中國，而家又死地地搵人幫手，咁代表乜？輸打贏要？有事鍾無豔？
香港和中國有緊密的互動交流，中國爆大鑊，香港難獨善其身。「武肺」壓境，就好似同政府扮鬼臉：「禁蒙面法」？嘿！更好笑係，張建宗今日見記者，一面咳一面講防疫工作，咁關公都有既，會不會是香港版的王廣發，另一個黑色笑話架？