親戚中總會有幾個政見唔同。有啲完全冇辦法交流嘅都已經斷絕來往，但有啲你一路覺得佢本性唔壞，就好難一下子將親情割捨。我就係面對緊呢一個矛盾嘅處境。尤其是到咗新年呢個避無可避嘅時刻。見又唔係，唔見又唔係。
我有一個警察姑丈。今年新年，我立定心腸，決定會謝絕一切同警察嘅社交見面。簡單就咁唔見面唔係我想做嘅嘢，畢竟我嘅目的係勸諫多於發洩。我會交低一封親筆信，表態之餘，亦都希望我嘅忠告可以發揮一啲作用。
有好多人為咗維繫親情，會將啲敏感嘅嘢避而不談。我唔認同呢種做法。如果真係重視呢段關係，真係關心對方，想對方好，就更加應該喺大是大非嘅事情上作出忠告。忠言逆耳，其他人無機會講到嘅說話，親人就有機會講到。唔好浪費咗親人嘅身份，亦唔好逃避親人嘅責任。
我喺度想呼籲面對相似處境嘅朋友，可以參考我嘅做法。借住新年呢個機會，唔好再收埋。要表態嘅就表態，要勸諫嘅就勸諫。覺得唔見面有用嘅就唔見面，覺得兜口兜面講好啲嘅就講。做乜都好，總之就唔好乜都唔做，扮做乜事都無，一切如常。不過記住目的唔係要鬧交，唔係要斷六親。一次傾唔掂仲可以下次傾，但斷絕關係就以後都發揮唔到影響力啦。
附上我嘅信，大家可以隨意參考、轉載。
警察姑丈、咁多位長輩、咁多位兄弟姊妹：
警察執法維持治安，你話啱定唔啱？喺正常社會底下，咁樣當然係一個合格嘅警察。不過香港而家面對緊嘅唔係治安問題。政府反覆強調有暴徒破壞治安，但事實上呢啲只係問題產生出嚟嘅結果，而唔係問題本身。真正根源係政府冇一個向市民負責任嘅制度，一日唔解決呢個起因，做幾多嘢都係頭痛醫頭腳痛醫腳，永無止境。
有人想向政府問責，有人想安穩生活，本身兩種想法係冇衝突，係可以同時實現到。只要政府適當將一部分權力交還畀人民，就係一個皆大歡喜嘅結局。好可惜，好多人愛國家撐政府，但國家同政府冇愛過你哋。佢好明顯覺得手中嘅權力係緊要過人民嘅工作生計、緊要過經濟繁榮、緊要過人民嘅生命安全，佢甚至特登挑動兩邊人民互相傷害，而自己就匿喺後面逃避責任。
咁嘅情況下，警察每執行一次止暴制亂，都係助長緊政府繼續逃避責任，將香港再一步推向以權橫行嘅社會。喺小環境當中合格嘅警察，喺大環境之下就係香港嘅罪人。打爛一塊玻璃十日八日可以裝返，經濟困境最多一兩年嘅事，但社會制度嘅崩壞，可能有生之年都未必可以返到轉頭。更唔好講紛爭當中嘅人命傷亡，永遠都無辦法彌補。呢啲代價反政府嘅人付緊、撐政府嘅人付緊、警察亦都付緊，全部就係貢獻畀掌權嘅人繼續逍遙。
警察嘅處境係可憐嘅，我相信唔少人加入警隊時冇諗過會演變成而家咁嘅環境。但可憐唔代表冇責任。被動嘅幫兇一樣係幫兇。作為一個有選擇權嘅人，面對道德難題嘅時候做嘅決定，一生都要為此負上責任。
頭先講嘅係被動嘅惡，跟住接落嚟就係主動作嘅惡，更加不可饒恕。唔係話扑爆人個頭咁簡單。而係成個部隊，喺上司默許甚至帶頭之下，對所有睇唔順眼嘅群體採取最仇視嘅態度，甚至用法律容許以外嘅手段攻擊傷害佢哋。
最可怕係，俾人捉到正，有啲上埋庭定埋罪，都仍然覺得只係唔好彩先俾人捉到，當正警隊英雄咁，連譴責都無不特止，仲要好似黑社會咁畀埋安家費。咁大規模嘅問題，我相信唔會係一年半載可以造成。長久以嚟無視法律嘅內部風氣，只不過香港人一直唔知道啫，借住今次機會真係真真正正認識警隊嘅真面目。除咗完全革清成個警隊，再設立另一個真正有效嘅監察制度，我諗唔到市民有咩重拾信心嘅可能性。
今年新年，我唔會同所有警察職業嘅人，有任何社交見面。唔係為咗針對姑丈你，而係對整個警隊嘅所作所為作出表態。好多人為咗維繫親情，會將啲敏感嘅嘢避而不談。我唔認同呢種做法。我正正因為重視大家嘅親情，想對方好，先想借呢個機會寫低呢番話。有啲說話未必啱聽，一般人亦都唔會直接同你講，但作為親人，自然就有責任講呢啲唔啱聽嘅心底話。
姑丈，我認識嘅你一直都係一個正直嘅人，到今日都唔認為有改變。希望我唔係睇錯。不過真正嘅正直，唔單只係對自己要求要循規蹈矩，更加唔係體現喺對弱小嘅人舉起規則嘅量尺。真正嘅正直，係面對比自己更強大嘅勢力，仍然會堅持挺身而出。做英雄其實唔需要好偉大嘅犧牲，只要每個人都願意喺安份守己之上，再踏前一小步，香港同世界都會更加美好。
每個人嘅生活處境唔同，面對嘅困難亦都好難同其他人一一交代。所以我唔會喺度作出任何要求，話點做先啱，點做就錯。不過我有一個期望，唔係淨係同姑丈講，亦都係同大家講，亦都係同我自己講：喺將來某一日，無論香港已經變成一個更好定更壞嘅香港，當下一代人問起我哋，曾經香港喺分岔路口，有機會改變嘅時候，我哋究竟做過啲咩呢？我希望大家嘅答案唔係一個羞愧嘅答案。