話說前兩日寫左篇文，談到「民生做得好，參與示威人數起碼少三份一」。唔知係咪因為林鄭睇到篇文（林鄭OS：拜託別擦存在感了，我完全無睇過），今日即時出左10項民生政策措施。一睇、放心、沒有希望就沒有失望，呢個政府一如以往地捉錯用神，完全錯估社會種種問題。即時睇睇十項措施重點包括（我在措施後面加上括號，概括措施受惠人士）：
1) 放寬俗稱「兩元乘車優惠」至60歲或以上長者（益長者）
2) 改革長者生活津貼，將現行普通津貼及高額津貼結合，每月津貼金額劃一為3585元，資助門檻劃一提升至50萬（益基層長者）
3) 政府將為目前20萬名月入少於7100元的人士代供5%強積金，將增加6億元開支（益基層）
4)逐步增加法定勞工假期，由現時的12日增至17日，最終與公眾假期「睇齊」（益仲係放勞工假既藍領）
5) 進一步改善政府外判員工待遇（益政府外判員工，即係基層）
6) 為輪候公屋逾3年的人士提供津貼，直至對方獲首次編派公屋。金額會參考綜援租金津貼上限一半（益輪候公屋人士，即係基層）
7) 研究針對劏房租金管制，由運輸及房屋局成立工作小組負責（益劏房戶，即係基層）
8) 過渡性房屋目標增加至額外5000個單位，即未來3年過渡性房屋將增至1.5萬個（益等緊過渡性房屋既人，即係基層）
9) 關愛基金為失業人士提供「有時限」現金津貼，由今年4月1至2021年3月31日，只要失業一個月或以上，或在今年4月之前曾領職津、學生資助計劃，可申請最多三個月有時限現金津貼，料最快可於今年10月發放（益失業人士，即係基層）
10) 關愛基金為開工不足和工時低人士提供一項現金津貼，申請條件稍後公布，最快今年10月實施（益關愛基金受惠人，即係基層）
總括黎講，所有措施就是「益長者、益基層」、同埋「益基層」。唉，如果你真係想透過民生政策讓社運能量減退，好歹你都分清楚係邊D人出黎示威啦。係「青年人」呀！！十項政策，一條毛都唔關「青年人」事，俾我個感覺是你「貫撤伍玉清方針」、「撤底放棄青年人」。我個感覺係，你諗住「出黎示威D人，都是基層（如果唔係都唔會肯收錢出黎示威啦XD）；不如用一D小恩小惠，塞住基層把口」。
而且上述好多措施，都是「起一堆爛屎度試圖搞到佢無咁爛先～」既感覺下設定－因為原本做得太差，所以而家勉強做少少野補救。藍領法定假期點解可以得12日咁少？人工少過7100蚊點起香港生存呀？點解排公屋要咁耐？點解會有劏房？呢D野根本就唔應該存在啦，你仲講！仲「研究針對劏房租金管制」喎，我而家係唔要呢個社會存在劏房呀，你Shot左呀？你去做藍領、一年得12日法定假、住劏房呀不如！你知唔知咩叫民間疾苦架？？
你而家既態度是，「嘩我派幾多錢？你地幾有福呀？」事實是一來10項措施一條毛都唔關我事、二來是你派都派得差過人，派錯對象不特止、仲要派好鬼耐。喂，那說好既4000大元呢？連李嘉誠果D應急基金都搞掂完，你果4000蚊連車尾燈都未見。我相信呢D所謂既措施，某部分去到2046都未實行到喎。
好啦，你益基層我都算啦，但呢D政策措施，完全無感覺想大刀闊斧解決任何深層次問題，都是果句，「頭痛醫頭、腳痛醫腳」，求其貼塊爛膠布就算。我明，始終起你心目中，「要做到『中港融合』」，有好多野唔觸碰得。但，真係咩？其實人民要求是，你實實在在解決社會問題的決心－我就「再講白一點」－即使你親共，但如果民生做得好，社會都可以少好多怨氣。就劏房問題，你切實去住下訓下，感受下幾慘；切實進行計劃解決。你加勞工假，咁我地呢D放開銀行假架呢？有無得加年假？係咪政府出？年青人買唔到樓，有無可能出辣招降下溫（反正你就算俾資助我都唔會買，問題係樓價太貴）？就地區問題，有無切實諗下解決問題方案？簡單D，例如你立例「以後屯門大媽只可以一個月一次出黎，沒收哂佢地D音響！」我相信屯門人一定鐘意到爆你呢個德政。
我敢講，呢類政策，根本都唔會觸及咩中央神經，但是竟然連咁都唔願做，仲諗住透過今次D措施減低社運能量，實可笑至極。民生民生，就是人民日常生活衣食住行，枉你做左咁耐政府，都可以做得咁差，仲話咩「突破傳統框架」，真係人唔笑狗都吠、大開眼界也。