題為編輯所擬
見到有人罵國難忠醫 admin「林鄭都係咁」（下稱「肥仔」）自己送頭送中，書生真係嬲到震。
國難忠醫係今場運動幫過救過咁多人，無私付出；今日有難，卻換來一啲手足批評「蠢」、「累街坊」，究竟你地係唔係真係當大家係手足，半年有多，明唔明咩係團結。
肥仔本身需要係內地實習，依個係讀中醫必須的，根本無得揀。有人話搞得運動就唔應該再上去，「最多唔讀」、「defer」，咁係唔係要人放棄晒成個人生，先代表有資格參與運動？忠醫為忠醫，正正係因為讀過醫，所以先識醫人。叫人放棄讀醫，即係放棄自己專業，咁仲點更好地救人？如果唔想再有手足被迫要返上去讀書實習，不如諗下點改革制度仲好，例如中醫學生點解無機會係香港做實習，大家又有無諗過？
國難忠醫都已經表示被幫者既個人資料都有另外 file 處理，咁已經說明忠醫並唔係無考慮到被捕風險。瞭解到被捕風險，仲願意咁投入參與，甚至一個星期特突返黎香港幾日，為既就係手足既健康，仲想要求忠醫啲咩？
依幾排警察開始起訴 tg admin，已經有 admin 還押排審可能排一年，等同坐監一年，大家究竟知唔知做 channel admin 有幾辛苦，忙到仆街，責任重大又無收益、法律風險又高，對運動無真正既熱誠根本做唔黎。已經陸續有admin表示太攰或被人罵到退出關頻，如果話近排街頭運動有退潮跡象，而家我地係唔係要連 tg 都開始要退潮？定正正因為運動開始靜落黎，大家又開始重蹈覆轍互相嘲諷批評？
tg admin當然要做好安全措施，但被捕可以有好多原因。警察國家機器本來就好難對抗，被捕唔代表安全措施做唔足，而係國家機器太強大，手足係不幸被捕，而唔係「蠢」被捕。即使再退一步真係做唔足，咁咪「不完美可改善」，大家係唔係唔記得左依句野？
救人要緊。唔可以比國難忠醫被消失！