在黃色經濟圈的氣氛下，當然要搵出一啲在自由之夏中出賣港人的企業黎制裁啦。遙想6月時港鐵曾在大家抗爭後免費出入閘，抗爭者點都留底錢的良好關係，在7.31後完全破裂，真係不禁唏噓。咁八達通作為港鐵的附屬公司，係咪應該列入制裁名單呢？
八達通早已唔係港鐵獨資擁用
根據八達通的網頁所講，港鐵依然係大股東，不過早已有其他交通機構以換股的方式入股八達通，所以制裁八達通其實同時制裁緊其他機構。
八達通到底如何營利呢？
其實今時今日用八達通搭車買野根本就無平到，最多係交通轉乘時有一點折扣，又或者係長者$2搭車，而呢啲拆扣係交通機構同政府付出。
另一方面我地搭車買野用唔用八達通根本同八達通公司的收入無關，因為八達通並唔係靠每次交易賺錢，而係靠商戶安裝八達通機賺取月費。所以大家罷用八達通對制裁根本毫無幫助，真正要做野的其實係一眾大小商戶能否放棄八達通。
此外，個人八達通的市場亦值得深思。部份屋苑、學校、甚至私營機構早已用個人八達通作為身份證明，個人八達通可代替住戶證開屋企樓下的大閘，學生個人八達通係一些學校學生拎黎簽到用。機場員工的個人八達通更加減卻大部份機場員工的交通開支。要呢啲機構洗一大筆錢更換系統不但唔現實，更需要龐大開支，隨時搞到自己人。
如何給予八達通壓力？
對我黎講八達通公司其實有好多野做可以挽回民心的，例如可以仿效IT公司，出transparency report，定其匯報警方及政府索取資料的情況，防止個人資料輕易外洩。
另一方面，pay wave, apple pay等等都已經發展左好耐，亦非常成熟，減輕對八達通的依賴，等商戶盡量支援其他支付系統，順便配合全球趨勢，我相信亦係另一出路。