1. 其實 TIME 個投票，從來都係投 Reader's Choice，同編輯選擇 Person of the Year 由頭到尾都無關係，所以我唔太理解其實大家嘈咩？你投「我最喜愛男歌手」畀古天樂，然後問點解「男歌手金獎」會畀咗張敬軒，真係答你唔到。可能我真係有睇開，所以我唔覺得被騙。上年 Reader's Choice 係 BTS防彈少年團，前年係沙特王儲 Mohammad bin Salman。咁你話：即係假民主啦？人哋其實從來都無話過用民主方式揀 Person of the Year。而且，你投票嗰陣，咪又係在個 pool 度揀，咪即係一早篩選咗囉，咪即係上次個政改方案囉，咁你又投？
2. 我用歌手獎比喻，其實都唔正確。因為根本唔係一個「獎」。一九三九年「頒」咗畀希特拉，四〇年畀史太林，一九七九年畀伊朗神權領袖 Khomeini。遠嘅唔講吖，二〇一六年就「頒」咗畀 Trump。Trump 同 TIME 擺明係仇敵來啦，咁唔通 Trump 會頒獎發畀仇人咩？封面仲潤佢係 The President of the Divided States of America。
3. 你話：左膠雜誌根本有 agenda。首先，我會話：吓？你而家先知？請問邊份雜誌無 agenda？無 agenda 嘅雜誌你都睇？大家都大個仔大個女啦，下嘛？人哋係美國自由派旗艦雜誌，唔通你要佢哋歌頌 Trump？然後，上唔到封面就 X 人左膠，呢六個月來我哋香港人起碼上過兩次封面，嗰陣又唔見 X？Person of the Year 擺到明就係 TIME 要透過某個（班）人去宣揚某種意識形態，乜好出奇咩？仲有，唔好以為 Time 就代表晒左翼。二〇一七年，TIME「頒」畀 MeToo 運動嘅女性，但封面偏偏無最初嘅發起人：黑人女性 Tarana Burke， 但反而有 Taylor Swift，結果備受批評。
4. 對 Greta Thunberg 嘅批評分好多種。我自己其實從來睇唔完佢任何一段 speech，因為真係造作。所以我自問都唔 buy。你話佢有無影響力呢？在香港可能無，但在美國歐洲一定有。幾個月前各國有氣候大遊行，都係佢帶動嘅。你敢話佢無影響力？至於佢係咪虛偽呢？我覺得一半半啦。如果係因為呢個原因你覺得佢唔應該攞，咁我都覺得合理嘅。但如果原因係因為話覺得環保議題唔重要，咁你真係唔好同人講你識國際政治。我唔講氣候環境問題有幾嚴峻啦，齋講政治，氣候呢幾年就係美國同西歐不少國家嘅核心政治議題。AOC 提出 Green New Deal，係美國嘅大新聞。氣候而家係左右兩翼嘅主要爭論之一。香港人唔 care，唔代表其他人唔 care。
5. 其實吹奏 Donald Trump，已經夠低。見到有人因為唔順氣，今次仲吹奏埋 Trump 個仔 Trump Jr.，真係低處未算低。乜我哋香港人要無尊嚴到咁嘅地步咩？
6. 見到好多留言，仲以為全世界都欠咗香港人。係，反擊威權，係全世界嘅責任，但大把人都反抗緊，唔係得我哋香港人。可唔可以唔好以為世界都圍住自己轉？