之前星期日遊行，又聽到有口號叫：「聽日罷工！」冇人應佢。
好啦，唔該唔好再隨口講罷工，再係咁就俾人無視架啦。
近日好多人FF法國大罷工，希望香港都可以係咁。睇返612、85、811、1111，都係號召「三罷」嘅日子，但都冇真正意義嘅罷工發生，都係前線手足堵路，然後大家「被罷工」。
期望「被罷工」，同期望打場風唔返工冇乜分別，同老細講：「嗱，而家唔係我唔想返工，係返唔到工呀，我都唔想。」咁樣要前線手足冒險犯難去堵路，試問犧牲得幾多次？
又或者，大家用自己方法令自己唔返工，射波、請病假、拎大假，咁又可以做得幾多次？夠力量咩？
政治性罷工真正目的，係拉停社會運作，逼政府接受民間要求。有人話罷工係和理非終極武器，錯啦，罷工係社會終極核彈就真。大家睇返波蘭、南韓及其他國家例子，人民以罷工撼動政權，直至變天。
抗爭運動至今，香港人唔會唔明白政治性罷工嘅目的，但搞唔成罷工，唔通真係「香港人太中意返工」？一定唔係啦，有幾多人中意做工作奴隸？問題係個個打工仔女顧住飯碗，放假去遊行唔去玩，行到身水身汗，可以；課金支持手足，可以；捐物資，可以；唔開工，一、兩日都仲可以；真正罷工，唔可以。
有啲行為，雖然目標正確，但係一時之間少人做，大家都擔心，唔敢做出嚟；當越嚟越多人做，大家就會少啲壓力，多咗安全感，而且多人做，多人接受，就成為社會風氣，會出現某程度嘅安全網。大家參加咁多「非法」遊行，「非法」抗爭，就係例子。正所謂「一、兩個人做就係犯法，幾百萬人做，就係政治行動。」
廣告從業員就點起真正罷工第一把火，上星期發起一連五日罷工，牽頭響應「200萬三罷聯合行動」。呢班廣告從業員包括僱員、自僱者、小老闆，想帶頭發起「經濟私了」，實踐真正罷工，大約一個月前組成「廣告公民」，佢哋抗爭方法就係由2/12-6/12真正唔開工，包括唔接job、唔講工作電話。僱員唔開工，令公司焗住要接受罷工；自僱者唔搵食，向客人說明點解要罷工；小公司罷市，僱員一齊罷工。佢哋停止搵食五日，除咗冇五日收入，其實仲要冒住得失客戶，令佢哋唔再幫襯嘅風險。
佢哋罷工，但唔係冇嘢做，而係攪咗一個「和你砌」活動，義務幫「黃店」做宣傳，建立「黃色經濟圈」，又會幫工會、抗爭組織做文宣。
因為廣告行業多小企業，勞方、資方、自僱者心態及身份地位差距冇咁大，不及大財團與打工仔天文數字咁遠嘅距離，令佢哋可以齊心，令罷工、罷市行動受到業界保障，可以踏出行業性罷工嘅一步。
就算廣告行業團結氣氛較好，都有僱員希望成立工會，以便吹雞及保障自己，更何況其他行業？
經過幾次罷工號召，雖然大罷工未發生，但經過多次嘗試實踐，而家已經有各行各業僱員走出嚟，正在建立廿幾三十個工會。雖然法例對政治性罷工冇保障，但團結起嚟，就會有力量，亦都係豎起咗罷工旗幟，一步一腳印，一路實踐，一路壯大。128遊行，大家就見到沿途有好幾個籌組工會嘅宣傳街站。工會發動罷工及保障員工好緊要，大家而家睇緊嘅法國大罷工，就係由工會發起。
其他抗爭行動往往定限期，話如果政府在限期前唔讓步，就會行動升級。而政治大罷工，就係一直做組織工作，做到自己升級，由雞蛋變成核彈。
有廣告人在122罷工集會上話：「我哋搵食少幾日，都唔及得行到最前，冒險受傷、被捕，甚至犧牲生命嘅手足，我哋罷工，算得乜嘢？」128有八十萬人遊行，如果個個都係咁諗，一齊行動，就核爆了。
【擴大戰線 籌組工會】TG頻道
照片：128街站、廣告業122罷工集會