題為編輯所擬
有條罪，叫暴動罪，612有幾位手足被控呢條罪，之後仲越來越多。
如果你唔鍾意的話，你有三個任務，全部都要做：
（1）短期：直接向現政府施壓，令到已經被捕的人獲釋，被控的人獲撤控。這是現行法律容許政府做的事。
（2）中期：修改暴動罪，令到呢條罪不可以隨意用。這件事要做，因為就算完成任務1，只要條法例未改，政府就算真係放咗人，都可以轉頭又再拉過；這樣無了期增加更多要幫的手足，好唔化算。要改法例先可以停止這個無限loop。
（3）長期：普選。只有普選，先確保任務2可以真正落實；而只有確保任務2真正落實，先可以確保任務1真正落實。
見到網上拗了一整日，感到莫明其妙，畢竟任務2和任務1並不互相矛盾，長遠更對任務1有幫肋。
至於搞任務2會唔會搶走大家的注意力？好似講「各有各做」已經講咗半年，從來唔會有人問搶走注意力這個問題。試想想，如果搞選舉的投訴搞街頭抗爭的搶走注意力，大家都不會接受；我理解「各有各做」應該是雙向的，不是自己要求別人接受就可以，人家就不可以要求自己接受。
當然，你也可以話任務3未完成，邊會真係做到任務2？但反轉頭講，做任務2正正係為推任務3提供基礎，起碼將立法會否決名單當制裁名單用都好。
最後，點解係修改暴動罪，而唔係廢除暴動罪？因為呢個世界係有「真．暴動」，搞的那個組織叫工聯會，要留返嚟話俾世人知搞「真．暴動」係犯法的。