依家過咗先講，近來一有時間就幫美孚民主派做助選工作。
選舉日企街時的確有少少驚。明明之前洗樓逐家逐戶拍門反應都非常好，個感覺係超過六成住戶都係偏黃（做多幾年人，呢d嘢睇反應同面色就會睇得出，呃唔到人㗎），心諗成功翻盤嘅機會都相當大喎；但當到咗真正選舉大日子，親眼見到雙方嘅街站無論數量、義工人數、物資都相差一大截時，你就開始會患得患失。而當你發覺自己街站冷冷清清，而對面街站班街坊保長可以全日不停同行出行入嘅老人家點頭打招呼，甚至會有一家大細特登行埋去同佢哋合照時，你更加難免會信心動搖——要打破呢種組織性嘅地區關係實在一啲都唔易，唔通之前自己太過樂觀，低估咗對手嘅潛在票源？
如是者，果一刻你惟有更加落力嗌咪搖旗，正所謂做得幾多得幾多，另一方面話俾自己知：要相信事前評估，冷靜分析，唔可以俾眼前景像迷惑自己嘅判斷。
一直去到夜晚，全日拉票工作完成，選舉結束，義工同街坊都聚集於各個票站外面等待點票結果，美孚區一共四個議席，十一點後其中一個票站已經傳出喜訊：點算中途嘅票數迅速拋離對手！等如先取一區。眾聲齊呼，登時放下心頭大石。上屆四席中民主派只得一席，依家至少有個保底，點都不至於差過上屆喇！
之後一個鐘頭，另外兩區亦分別報捷，雖然票數差距冇第一席咁大，所以點算時間亦相對長，但總之贏就係贏，都有幾百票之差，完全唔算失禮。
最後係我幫得最多嘅一個選區，亦係最令人擔心嘅，我方候選人比較年輕，而對手已經連任過一屆，建立咗深厚鄰里關係，雖然洗樓反應唔錯令我信心大增，但正如上面講，街站嘅實地氣氛多少帶來負面想法，加上遲遲未公佈結果，包括我在內，票站外嘅支持者真係愈等愈憂心！
最後等到差不多兩點，終於見到有工作人員離開票站，隨後監票員亦率先跑出向大家宣佈：以八百幾票嘅差距取得最後第四席！成功光復美孚，站外數十個支持者齊齊開心到彈起！YEAH～
美孚係一個幾奇怪嘅地方，由於算係老人區，社區上整體色彩無疑係偏藍，幾個月以來除咗一兩幅面積不大嘅連儂牆、地鐵站爆過幾次玻璃、連鎖藍店被裝飾過一兩次之外，莫講話催淚彈，就連胡椒噴霧都未聞過，同外邊嘅世界簡直好似處於平行時空，和平穩定到令人不安。
但平靜之下，你又會見到美孚嘅居民其實唔係冇立場，不但好肯投票，而且取向偏黃。過去幾次選舉民主派在美孚嘅成績都唔算差，今次就更加，票站外上午七點就出現人龍，相比起其他黃區亦毫不遜色，而今屆美孚區四個票站嘅投票率亦達到七成左右，接近全港平均數。
由此可見，嚴格上美孚四區並非偏藍而其實係偏黃，但同其他黃區嘅顯著分別係社區組成以中產家庭為主，美孚嘅居民通常傾向和理非，你要佢哋Set 路障、拆欄杆，佢哋多數冇興趣，但傳統性質嘅遊行示威、集會投票活動，佢哋就會相當積極，非常樂於表態。
呢種傾向我亦相信並非美孚獨有，希望有志從政者能夠好好觀察各種黃區嘅分別，並且有效利用類似嘅「地緣特性」， 促成真正嘅和勇不分兄弟齊心，一齊令光復香港不再流於一句口號，而成為一個有希望嘅願景。