（獨媒特約報導）警察圍封理大第五日（11月21日），烏蠅盤旋灑落四周的剩食，無人清理堆積成山的碗筷及垃圾，校園四處瀰漫著酸餿味。仿似同樣被丟棄的是城中所餘無幾的人，渾然與臭味成為一體，並不解記者為何要戴口罩。「落渠爬咗兩日，兩次都爬咗內渠入返理大⋯⋯你唔會明上返地面嗰一刻嘅絕望」，自嘲外號「坑渠人」的C即使在上星期中大一役負傷，仍果斷移師理大支援。連日來C不願投降，除不忿「運物資都有罪？」，更不想留案底影響追尋成為消防員的夢想。
「尋日瞓醒，隔離就有把?刀，就想自殺。」滯留五日期間，C除爬過兩日地下渠外，跑路軌、跑馬路、游繩統統做齊，每次總是功虧一簣，絕望油然而生。朋友得悉後轟炸訊息一整天阻止，C最終暫時放棄自殺念頭：「以前出去，覺得唔需要考慮埋人哋擔憂緊自己嘅安危——如果個個都咁諗，咁仲有邊個行出嚟？但可能因為困住咗咁多日，開始覺得係會對唔住佢哋。」
如能成功逃出，他會做什麼？C毫不猶豫地說：「返屋企、沖涼，然後繼續出去」。
「藍」家人不認同但愛子 不斷觀看直播「搵仔」
仍未屆20歲的C從六月以來從未缺席運動，角色多變，連通宵聖詩隊都做過。他出力之餘又出錢，將上月課餘兼職收入全數捐給《立場新聞》，更戲稱如果成功逃脫，下月的收入就捐給本網。
半年來C跟雙親爭吵不斷，因反送中被趕出家門已是常事，「老豆游水經流浮山落嚟香港，識咗呀媽之後就結婚接嚟香港；兩老唔止係藍，直情係紅底，做同鄉會。」
被家人無數次趕出家門仍在所不惜，「佢哋真係覺得警察打人係啱嘅」。幸好C雙親仍愛惜兒子，C知道自己被困期間，兩老會不斷觀看直播，只為尋找他的身影，亦每天勸說他向警方投降，「我想返屋企，我真係好想返屋企⋯⋯但係做消防員係自細嘅夢想嚟，我唔想認輸住。」
小時候，每週都穿過口岸跟嫲嫲食飯，C坦言當時並不懂得區分香港和大陸，「係食嘢平啲囉。」直至長成懵懂少年，知曉1989年6月4日中共曾在北京天安門屠城，跟住在深圳河以北的表弟分享此事後，換來表弟一個「Who fucking cares」的態度，C始發現兩地之間的差異是無法磨滅，「我唔鍾意佢哋淨係諗住自己。」
只願生於北韓 不知外世間美好
C自知與港共政權對抗是不可為而為之，雖說參與時已不期望會成功，但每次出席運動後都不期然灰心。他泣不成聲道：「200萬人遊行又做過，點解我哋做咁多嘢都無回報？政府係咪真係想殺晒呢一代香港人，然後換大陸人落嚟？」
但少年始終心善，C每每總會被香港人感動，拒絕放棄，「見到人鏈、大量物資同義載，又會忍唔住出返嚟想回報香港人。」C哀嘆道，「如果我生於北韓就好，就唔會知道出面世界嘅美好」，那就不必費神去爭取普世價值。
然而被喚醒的人拒絕再次沉睡，「朋友去咗幾次沙田飲喜茶，我都仲未去；淘寶買嘢又平咁多；我都想留响屋企打機㗎！有邊個唔想做港豬啫？」
記者：梁筱琁