（獨媒特約報導）「傑仔，選到之後搞返條路，佢痴線㗎，根本就（巴士站停車處）收窄晒！」訪問這日，距離今年區議會選舉投票日還有8日，張振傑在筲箕灣連接興東商場和東熹行人天橋，向記者解釋興東一帶的工程規劃問題，不少路經的街坊都主動向他點頭微笑，有街坊焦急的拉著他說耀興道的巴士站劃位問題；走到耀興道成安街街口，買完餸的街坊主動分享收穫：「今日啲大眼雞好平又靚啊，你睇吓！」
31歲的張振傑是當區居民，本身是土木工程師，亦是2017年特首選舉工程界選委。3年前，他和幾個居民組成「興東東熹環境關注組」，由處理屋邨居清潔管理質素、跟進屋邨單位維修工程，到與康文署交涉為鄰近公園增設系統，發起車主慢駛遊行抗議領展車場加租，一切由屋苑車場拆售開始說起：「幾時會留意呢啲嘢，就係發覺自己生活受到影響嗰陣。」
車場拆售萌生念頭組織自救：唔好淨係依賴議員
2014年，領匯的東熹苑的停車場轉售予林子峰，林後再拆售部分車位，本身是車主的張振傑意識到問題所在：「咁樣變咗可以炒車位，區外嘅人買區內嘅車位，完全控制唔到租金嘅價格。」然而，他向區議員反映卻已無力挽回。
雖然停車場拆售大局已定，但此事讓他和幾個志同道合的居民萌生自救念頭，於2016年組成居民關注組「興東東熹環境關注組 」，「我哋成日都講三樣嘢，關注、監察、參與。希望街坊唔好淨係依賴議員，每一個居民當呢個社區係我哋屋企，一齊做嘅。 希望係一齊去監察個區議會，一齊去留意呢啲問題，自己去參與。」
發起慢駛遊行、成功爭取公園加燈
早期，他們主要以書信文件跟進社區問題和居民面對的困難，如屋邨單位的維修問題，他們代為寫信向房屋署跟進維修。後來，興東商場停車場加租，比中產屋苑太古城月租車位更貴，他們與其他車主發起慢駛遊行，成功引來傳媒報道關注問題，又曾與其他東區居民組織和政黨出席記者會，講述新巴8H線抽調服務興東的2A線和82線對居民影響。
有年邁居民向關注組說，希望鄰近的筲箕灣配水庫遊樂場能，延長開放時間，不要再於晚上7時關閉，並增加照明系統。該居民曾手寫信件予康文署無果，關注組便收集居民意見，向康文署提出意見，多番書信來往後，竟獲康文署正面回覆，承諾將增設照明系統並會延長開放時間。
以上一切對他們來說曾是遙不可及，這些居民組織不是社運中人，亦非政黨出身，記者也疑惑，為何政府部門會正面回應居民組織的訴求，甚至「成功爭取」？他說，唯靠不斷跟進，即使過程絕不輕鬆：「佢哋又轉過人，下手又唔知，成日又唔肯black and white。」此外，他們也會收集居民聯署，向政府部門反映意見背後的民意支持。
塞車問題惡化的巴士站與42萬的避雨亭
即使居民組織改善社區的工作稍見成效，終究缺乏一個有「牙力」的身份去讓政府部門正視問題。張振傑本身是土木工程師，講到區內的工程規劃便是例證。
他說，耀興道興東商場和東熹苑之間並無行人過路處，街坊於往耀東方向的巴士站落車後，大多橫過馬路到對面的興東商場，而非上行人天橋，又或是直接進入東熹苑的入口。後來，今年5月，政府展開工程，加建安全島和行人過路處，同時修整巴士站埋站的位置：「好老實，開頭idea係好，問題就係個planning。」
工程完成後，部分行人路加闊，巴士站的停車空間大幅縮短至只能容納一架巴士，當有多於一輪巴士到站，便會嚴重阻塞耀興道，最近再進行改善工程，重新擴大多3、4米，可以約容納一架半巴士。同時由於巴士站往下移，街坊落車後需上斜方能回東熹苑或使用過路處：「第一，街坊行遠咗，第二個，巴士站多架埋站會塞死。過馬路有同冇係無分別（意指街坊直接於落車處橫過馬路）。」
行人過路處前後加設的石壆，亦令行車線收窄，張振傑認為交通標誌不足，應增設斑馬線和交通燈：「車唔知要讓人，成個行車線又收窄咗，成個設計都係頗有問題。」他說，這兩個月最少已有4宗交通意外。他講解設計問題時，有街坊也焦急的拉著他反映過路處的問題。
轉身望向後方的小巴站避雨亭，遮蓋著「興東邨」這三字。翻查紀錄，東區區議會地區工程及設施管理工作小組於2017年2月8日討論「耀興道55號增設避雨亭」，工程建議由工聯會許林慶提出，於小組獲得通過。後來民政處與工程倡議人進行實地考察後，最終決定於目前的位置花費42萬興建避雨亭：「興東邨地標完全遮住咗。點樣令到Shelter有用，後面興東邨（地標）又有用？起完完全無用喎，最尾小巴站搬咗過嚟啦，架小巴係入唔晒。但係唔應該咁樣。」
望以工程專業阻社區小白象
這些事都一一與工程的專業精神相違背，他亦對政府部門的工程師感失望：「一定係有啲問題，起咗之後或者做咗啲工程之後，會改善到。無可能你起完啲嘢先諗果舊嘢點用。」
工程未能配合實際需要，亦反映區議員身份的重要：「我哋呢啲居民組織講，因為無牙力就無效好好咁去處理。 喺議會即使係弱勢都好，有啲意見政府部門係需要正視。我哋有呢個身份嘅時候，就可以用我哋嘅知識將呢啲問題講出嚟。」
這是最壞的時代？
張振傑自言從前的自己說不上關心時政，直至後來發生反國教、雨傘運動，才逐漸開始留意，即便是同學找他參選特首選委時，他認識也不多：「 嗰陣都未知道選委責任係咩，意識都好模糊，我係30個裡面最後嗰個。」
他和很多人一樣，當自己居住的社區也出現問題，才開始思考自己的崗位還可做的：「其中好想做到，我哋雖然唔係政黨，係居民組織，都希望出嚟嘅嘢效果係專業嘅，亦都可以好過政黨，去到而家我都覺得我哋做到。無論係一啲建議、書信、跟進個案，喺無一個好大嘅資源底下做得唔差。」當他開始頻繁服務社區後，工餘時間都花在組織上，他說笑道：「我哋收工睇下戲唔好？食下飯唔好？點解要做咁多嘢，真係有啲問題喺度而係無人好好去處理。」
近年的香港，好像越來越多居民組織，柴灣興民屋邨商場變賣而組成的「山民主義」，因法團管理問題組成的「太和的後裔」、「長安後浪」，又有傘後組織「青衣島民」：「有好多人嘅諗法係自己都想幫下手，某程度上係正面嘅。但係通常係社會氣氛唔好先有呢啲，如果個個安居樂業 、社會氣氛好好，啲人點會理呢啲？ 係個氣氛差咗，每個人都想出分力，先多咗咁多呢啲居民組織。」
興東選區候選人尚有工聯會許林慶。
記者：梅利