見你call哂啲幕僚同事開緊急會，好似好驚咁。無論你幾想車大炮，我希望你知道，而家香港好「亂」、而呢個「亂」，係你搞出黎，絕對唔係人民。面對瀕臨失控的管治，林鄭你想挽回？我知你好想好想，我就教教你。
第一，唔該唔好再迷信「止暴制亂」，老實回應5大／6大訴求。事實已經證明「越止越亂」，不是嗎？（其實靜靜雞再話你聽，香港人好易管：你搞掂好基本衣食住行，然後俾地方佢搵錢發展、再俾少少民主佢、有好多人已經 Satisfy 即做港豬。你唔箍得咁實，其實根本乜事都無。乜得你咁都唔明架...）如果你老老實實回應訴求，我諗其實有好多人會收貨，社會好快會回復穩定。咁簡單的事，點解做唔到？有好多起你權責範圍仲做到的野，咪做囉？有好多位，係咪要完全聽中央支笛、定係可以陽奉陰遺？做完就無事了？
第二，可唔可以唔好再信你身邊的幕僚？可唔可以平衡啲聽下民主派議員意見？可唔可以唔好再信大公文匯？佢地成日散Fake News影響你判斷能力你知唔知？你身邊啲幕僚其實好廢你知唔知？羅犯椒芬竟然信「天使論」同大公報，然後你去聽佢呢啲人 advise？你堅決唔港獨，咁民主派議員唔港獨啦掛、佢地意見你有無聽過？點解我次次見你有乜都淨是搵建制派議員？咁都係有效管治？
第三，收起你遊花園態度，拿出真．「真誠」。我有朋友說過點考AO？就是講野「最識得遊花園」就得。唔怪得培養出黎的政務官個個都係咁，只為「平衡利益」、撈份不錯的人工，完全唔係「為民服務」。唔該唔係「遊花園」，係一個人與人的對話，Please。
第四，落示威區同前線公開深度對話。五個月黎，淨是見你一大群警察圍住去過伊館，僅同一部分抽中既市民對話，咁都是對話？你夠唔夠膽直接去中大，同示威者對話（咪再一日到黑話人地係暴徒，啲「暴徒」是「好聽你話好辛苦返足學入大學最讀好書」的中大生黎呀）？你了唔了解示威者呀（我淨係見昨晚你去酒會囉）？年青人是要公開公平公義公正的社會，唔係你施政報告啲咩「買樓容易啲」既可笑措施。我願意拎全香港男人條J出黎同你賭你唔會肯（因為反正你都唔會肯），全港男人唔使驚。
第五，承認自己無能力再管治香港、放下你心中強烈的權力慾，可以的話、請你辭職。那句咩「如果港人主流意見認為我不適合再擔任特首，我會辭職」已經俾人回帶左好多次，相信唔使我再講。而家咁既情況，都唔係「主流意見」？咁你句「辭職」呢？其實你辭職，雖然問題唔會解決哂，但是都會解決好多－不過以你咁好勝的性格，根本唔會咁做。你真係好可怕。（其實換個角度睇，呢班人咁難管，唔管咪仲開心，不是嗎？）
其實如果呢一刻你能夠「變番成為人類」，做上述5樣野，回頭是岸，我相信即刻能夠平息現時瀕臨失控的管治。方法已經俾左你，做唔做、是你的決定。
不過，如果是做，你一早做左啦……香港人、自求多福吧。