題為編輯所擬
陳茂波成日話香港因示威攪到生意變差，其實生意變差，腦殘先至係主因。
如果少左一堆自由行黎，藥房金鋪就話頂唔順要執，咁都要檢討下係咪開得太多，係咪坐食山崩太耐，已經連做生意最基本要靈活變通嘅能力都冇埋，預左一直會有人射條水包你必賺？
如果咁多年黎，你都睇唔到香港法治逐步崩壞嘅政治市，仲以為好好市冇預計過唔同風險出現，咁亦都真係與人無尤。
唔係點解近年咁多公司都請人 in-house 做 political risk analysis，就係知道今日做生意要睇社會動態環境，就算攤大手板就有錢跌落黎，都要知有咩風險係會從手指罅跌走。
醒下啦，世上真係冇呢種利潤保證嘅生意，就算係有政權撐腰嘅生意，特權都難保有一日被人拉番落地。過去香港旅遊業過度依賴大陸自由行，叻嘅咪識變通轉番多啲做本地客，腦殘嘅咪公開講放棄年青人繼續等俾人裝修，死痴著政權睇下分到幾多俾你。
我一直最睇唔起係嗰堆工程利益，成個行頭一半都靠政府拎啲地稅做基建工程圈養，當市民要審議啲冇用千億大白象工程個陣，就走出黎話人阻住佢開工，而唔係行出黎諗下啲大家真正有需要嘅工程黎做。大哥，億億聲公帑一定係要黎俾你做飼料架？
當然黑警晚晚周街TG放題，又唔見人又打死人，大家個心情唔好，梗係會影響日常消費，買件新衫、眼鏡去旅行都冇精神。
親身經驗，自己在旺角開辦嘅民間課程報名都收少左3成，事實上今日都唔知聽日事，大家都好難 commit 稍為長少少既活動；成場運動令好多朋友人生轉軌道，研究社都收到唔少通知話停工冇收入再月捐支持民間研究，唔駛你陳茂波講我地都知有影響，諗住喺香港經營，就係要預咗大家一齊要承擔改變呢個城市嗰陣嘅成本同代價。
但我真係唔覺得，大部分香港人呢幾個月積蓄多咗駛錢駛少左。至少我身邊識既朋友，好多都幾乎 all-in 收入，有啲仲捐身家咁狂買野、支援前線、出交通、參與眾籌去支援有意義既計劃。另外一部分，就幫襯移民公司俾錢升學學定外文，啲錢只係駛左去你未必計嘅地方。跟住就有班人，話你捐身家嗰班係影響佢地生意，阻住佢地「收成期」。
所以其實根本冇所謂收成期，只係有班剩係識坐食山崩，自己睇唔通個問題，仲要話人地影響佢，已經喪失做生意能力嘅腦殘。