我唔係化武專家，只希望我嘅化學可以解釋到你嘅疑問！希望唔會講多咗敏感嘢，亦唔會太詳細。知道多啲嘅朋友你可以去呢度留言，唔駛我講，以免我被人 ban。
催淚彈一般由：(1)彈身（有鋼）、(2)彈藥（如發射用，正常炸藥）及雷管、(3)催淚劑固體（主要係CS）、(4)發熱材料（以令催淚劑氣化分散），所組成。
各國嘅(1)(2)(3)都係相同，主要分別係(4)。
(3)催淚劑固體：
CS（O-Chlorobenzalmalononitrile）係固體，約 100℃ 熔，300℃ 氣化，所以受熱會變成蒸氣，遇冷空氣變返微塵粒，被風吹到你眼、鼻、口，你就賴嘢。由於CS高於 400℃ 就會分解（咁就冇乜催淚作用，而分解產物有冇害就冇人知），而越高温，分解出嚟嘅嘢就越多 —— 其中已知嘅有 HCl氣體（可導致肺積水）、HCN氣體（山埃氣）、二惡英 dioxin（超級致癌物）。基於呢個原因，各國都希望將發熱温度低過 450℃！
(4)發熱材料：
主要由 (A)氧化劑（oxidizing agent）同 (B)還原劑（reducing agent）組成。
(A)氧化劑：
各國大致相同： KNO3 及 KClO3 受熱分解出氧氣，而 KClO3 更出埋 KCl 白煙。
(B)還原劑：
【外國】碳粉，矽粉 Si，糖，火棉 nitrocellulose，燃燒後可達温度最高 1500℃，一般低於 1000℃，產品有 CO2、H2O、SiO2（白煙）
【中國／伊朗】鎂粉，鋁粉，火棉，燃燒後可達温度最高 3300℃，一般低於 2000℃，產品有 CO2、H2O、MgO（白煙）、Al2O3（白煙）
由於中國貨產生 MgO 同 Al2O3 比外國貨SiO2 濃，重及大粒，所以中國貨啲煙好白，而外國 SiO2 啲煙細微，經光學現象「散射 (scattering)」會呈微藍色。
由於外國貨温度低，用水一淋立即收皮。而中國貨温度高好多，用水淋分分鐘水同鎂／鋁生成氫氣（爆得！），好危險。用手摸一定燒傷，打中人就著火！更可以熔馬路上嘅蠟青！
而由於中國貨CS有高温分解問題，彈内嘅 CS 比外國多好多，分解出嚟嘅有毒嘢如HCl氣體、HCN氣體、二惡英亦比外國多好多。更加大鑊嘅係好多高温度CS分解產物，冇人硏究過對人體短期及長遠有乜害！
所以用中國催淚彈可以解決到嘅唔係政治問題，而係解決市民，必須立即停用！