「火車未到站」於6月底曾經舉辦「【『乘搭』第一班沙中綫列車】 — 社區導賞團」，報名反應非常熱烈。活動籌委籌備活動時，請教過曾舉辦類似活動嘅香港鐵路發展研究組 HKRDG 香港鐵路發展研究組 有關申請「不反對通知書」事宜，最後決定係「申請定都無壞」。我哋舉辦呢類合家歡、有益身心活動，當然要展示「超合作」精神。據說將來大家跑步都要申請「不反對通知書」，大家真心去申請的話又有咩要留意？呢次我哋同大家分享下申請經驗。
提交予警方路線初稿，當時建議途經何文田山，最終改經高山道一帶
呢個導賞團由始至終都係希望讓大家認識沙中綫沿線社區，特別係未有鐵路服務覆蓋嘅啟德及土瓜灣一帶。故此當時規劃路線為：啟德經承啟道、馬頭涌道去土瓜灣，再上天光道、常盛街、佛光街，再經何文田站落返紅磡區。
申請公眾遊行，首先就要填寫舉行公衆集會／遊行意向通知書，再於集會／遊行舉行前最少七日交去報案室，所有欄目均須填寫（包括主辦者身分證號碼）。籌委們本來諗住唔寫身分證號碼資料，交表時都會叫你填返。交完表，基本上等相關警區人員打電話做進一步聯絡，必要時會舉行會議協調細節。
雖然「啟德」響區議會分界係歸九龍西嘅九龍城區，但警區劃界上係歸東九龍總區秀茂坪警區。故此，整個活動路線牽涉最少三個警區：東九龍嘅秀茂坪、西九龍嘅九龍城同紅磡。作為首次申請舉辦公眾遊行嘅團體，遊行路線又要「跨區」，再加上6月中社會氣氛已經出現變化，警方都係「嚴陣以待」，最後都係約咗上警署開會。
開會時，各個牽涉嘅橫頭都派代表出席，逐個細節位問一次：幾多人、有咩人參加、點解要咁行、糾察識別方式等等。警方亦表達佢哋對我哋提交路線建議嘅關注，提出修改部分路線希望活動能夠「安全進行」。最終何文田段活動路線由經常盛街一帶，改為高山道。
開會後，我哋即場填寫「修改公眾集會詳情」表格。響等佢哋影印文件嘅時候，有位阿Sir同我哋講：「申請不反對通知書係免費㗎！」從公共財政角度嚟講，「免費」嘅開會、人手、特別安排等，全部都係錢，只不過呢筆錢係由全港所有納稅人共同承擔。活動前兩日，我哋終於收到「不反對通知書」嘅電郵版本。
活動當日，負責跟進呢個活動嘅警長好早就到咗集合地點。我哋去到嘅時候，佢哋又跟我哋講：「其實下次呢啲活動就唔駛申請嘅…真係有立場嗰啲就要啦。」佢哋又強調，因已申請「不反對通知書」緣故，活動必須要準時開始。
每次行到去橫頭之間嘅交接位，都會見到下一個橫頭嘅小隊響街口等緊我哋。每逢經過行人過路處，警察都會幫我哋開路。去到土瓜灣站一帶，另一位警長同我哋講：「呢啲活動好有意義，我都聽多好多嘢，你哋應該搞多啲呢類活動。」不過，我哋暫時未有計劃再舉辦呢種以步行為主嘅「導賞團」。呢位警長要參與的話，睇怕都要等下先啦。
概括呢次申請經驗，若遊行路線需要經過任何過路處，需要若干位警員幫手開路，站在安全角度就應該申請啦！而相比起大家響媒體上見到嘅「克制警察」，負責警民關係嘅警察態度係好少少，最起碼係可以有一兩句計傾下。以後大家搞活動嘅話，為展示我哋嘅「超合作」精神，都可以齊齊申請LONO～希望我哋嘅分享幫到大家啦！
同場加映活動花絮：