民陣岑子杰遇襲，相傳是南亞刀手襲擊（未證實），連登有人吹奏要裝修南亞商店，甚至話星期日搞尖沙咀清真寺同重慶大廈。如果真係咁諗，大家唔係攬炒，係引火自焚。
講多三次，係引-火-自-焚！引-火-自-焚！引-火-自-焚！
首先，大家知唔知南亞其實包幾多個唔同種族？南亞唔係一個種族呀，南亞係分巴基斯坦、印度、尼泊爾、斯里蘭卡等等架。你點知果班打人既南亞係邊一個種族？如果人地其實係印度，你去裝修清真寺，真係7到爆喇。好似上次搞錯Eaton Hotel一樣咁7呀，道歉唔係次次work架。
外國所有種族仇殺mass shooting都係搞清真寺，你搞清真寺即係搞Muslim，同extremist扯上關係之餘，以後亦都唔可以再理直氣壯鬧中共搞新疆Muslim。所以，理性上策略上都絕對唔搞得。
裝修重慶大廈仲好笑。重慶大廈唔係只有南亞人呀，仲有好多非洲人呀，非洲包左唔同國家，西非中非東非北非，仲有菲律賓印尼etc.；樓上仲有好多賓館有好多世界各地黎既遊客，人種多到你唔信架。最重要係，重慶大廈仲有支援難民既人權組織，有好多難民係度等救命架。佢地同海外既人權組織有好多connection，你搞到任何一瓣都係搞到人權問題呀大佬！！
反送中運動之中，處處都有非華裔既身影，佢地好多係香港出世香港大，三代人兩代人都係香港。人地南亞係前線出力、開放地方支援時，又唔見人話去幫襯番南亞小店或者去清真寺，反而一見到關南亞事既暴力事件就否定成班少數族群。到底係大家眼中，係咪只有華裔香港人先可以叫做自己人？我相信今次運動令大家擴闊左對香港人既理解---只要係關心呢個地方，追求共同價值，願意付出，不論種族、性別、年齡、職業、性取向、身體機能、移民身份、語言等等，都一樣可以是手足。
搞重慶大廈、清真寺同埋南亞商店完全是自殺，唔係攬炒。我相信前線有腦，唔係盲動。但現世鬼太多。作為和理非，我唔會衝，只能當日去守清真寺同埋重慶大廈，以免悲劇發生。
星期日，食咖哩！