彭定康批評林鄭禁制蒙面，做法「瘋狂」，昨天（八日）林鄭反唇相稽，質問彭自己國家有同類情況時會如何處理。言下之意是：你話人就叻，畀著係你，識得處理咩？唔通你有良方妙法化解警民嚴重撕裂和對抗的危機？
點知民陣轉頭便在網頁出post，寸林鄭無溫書，有眼不識泰山，居然不知道彭定康正是當年重組北愛警隊，最終化解北愛衝突的關鍵人物。今天沈旭暉再補充，當年彭定康提交的報告，共提出 175 項重大措施改革警隊，重建警隊信譽，是處理類似衝突的全球教材。（延伸閱讀：《社會撕裂下的警政問題——以北愛衝突為例》）
所謂自取其辱，大抵就是這意思。
但諗深一層，作為香港人（不包括支持蒙面法的兩、三成人），其實真係笑唔出。
因為林鄭的老闆，以及佢表忠的對象，並不需要佢講嘢make sense。就算畀全世界——尤其是西方——有識之士笑到面黃，佢都唔會感到瘀，要搵窿捐。相反，玻璃心和人格分裂的五毛（一面愛國一面又極想移民），眼見佢敢頂撞前殖民地總督，一定很欣賞佢，認為佢有吉士，幫中國人爭番口氣，這肯定是有分加的。反正林鄭餘生都未必有機會飛去英美，就算有得去，都唔會受人歡迎，佢又有乜需要顧慮自己在外國人心目中的形象呢！
事實上，林鄭早就唔介意搲爛塊面做人，藉建制派在議會內的壓倒性優勢，有權用到盡，要剪布就剪布，要趕民主派離場便馬上趕，怎樣捩横折曲的歪理都可以講出口，總之「我話唔係緊急狀態就唔係緊急狀態」，「我話無侵犯市民自由就無」，硬推逃犯條例時的跋扈嘴臉，曾經收斂過一陣，近日引用緊急法，又重現江湖。不久前先扮晒嘢，口口聲聲要和市民對話，現在連慣常於施政報告搞的論壇都取消，擺明睬你都有味，但你奈得我何咩？
所以，不能怪香港人奮起反抗。當全世界都視為笑話的一個object，仍牢牢地掌握著香港的管治權，意味著再失敗的施政都不會有真正改善，誰想坐以待斃？