（獨媒特約報導）先乘電車，再轉巴士，他戴上耳機渡過一個多小時，終於抵達元朗。
他是劉晉宇，今年24歲，在元朗出生，後於港島長大、讀書。反送中運動開始不久，大學舍堂認識的朋友決定投身元朗「打白區」，劉晉宇辭掉工作加入其團隊。「721元朗恐襲」前，他沒想過自己也會落場。他現於十八鄉北服務，料戰連續兩屆自動當選的現任元朗區議會主席沈豪傑。十八鄉北是新劃選區，範圍為Grand YOHO及以北鄉村，當中包括南邊圍。他說：「就算機會、信心再細都應該係要選，因為要畀壓力對家，要俾佢知有人係會挑戰佢，唔係惡晒嘅。」
由置身事外到關心時政，全因Hallmate和傘運
從前的他也曾對時政置身事外。他還記得中三時，同學邀請他出席六四晚會，他回應：「去嚟做咩？又唔關我事，又冇咩用。」區議會是甚麼？他有留意區議會選舉，卻不知區會實際作用，感覺區議員只是處理水氹、在社區內加設椅子等小事。
關於啟蒙，他說是2014年。那年他剛考進香港大學，和很多同學一樣，抱著玩樂的心態參與舍堂迎新營，誰料到營內竟有討論時事的環節：「原來呢度嘅人都係咁care個社會，令到我都會覺得自己都要。」
不久，雨傘運動揭開序幕，當時學聯梁麗幗是他的堂友，也是他敬佩的「大仙」（港大舍堂對高年級生的稱呼）：「佢影響咗我好多。以前覺得政治問題總係會有議員、大人處理，當身邊有個認識嘅人喺運動中走得前，覺得每個人都有責任走得前。」學生衝進公民廣場那夜，他和舍堂的朋友在外面，還記得人們在警察防線前舉高雙手，及至後來群眾佔領夏慤道，他就輪流守住物資站。和很多人一樣，他曾以為雨傘運動會成功。
後來，他也漸漸少到佔領區：「搵唔到自己係個場運動裡面可以做啲咩。之後越來越少人，之後我都唔記得……點解無啦啦清場。」雖然運動沒有當刻帶來成果，但政治對他來說已不再遙遠，更是每人都需肩負的責任。
辭職助選 沒想過參戰，直至發生721恐襲
在港大舍堂相識的方浩軒（左）邀請劉晉宇加入「動元十八」。
今年的反送中運動展開不久，民間開始討論要出選「白區」，意即建制派在無競爭的情況下自動當選的選區，劉晉宇於舍堂相識的方浩軒也打算出選十八鄉中：「無啦啦就有日同我講，如果我選區議員，你會唔會辭職幫我？」於是，他毅然辭掉畢業後的工作，加入方的團隊「動元十八」。本來，他也沒想過要參選，打算等待有心人出選元朗其他白區，直至721發生「元朗恐襲」：「警察冇出嚟保護啲市民，區議會連徹查件事都否決咗，呢啲事係令我更加嬲。」
「我一直係度等有人去出嚟選，我就唔選，但係一直等都無。」於是，他於八月中展開於十八鄉北的地區工作，展開東區人長征元朗的日子。
港島人遠征元朗：難打就一定
他每次從港島來回元朗，一趟便是兩個多小時，他笑著說：「交通費都係concern，好貴。」元朗人早上出勤時間比港島人更早，之前「動元十八」六時半開早站，他乘首班車也趕不上開站時間：「頭班車都係6點幾，我會比其他人早好多出門口，佢哋全部都係住附近。」
過去在港島生活，他甚少到元朗。比起他身邊認識的元朗人，他當然說不上很了解元朗。跨區參選，對他來說最難是融入：「可能其他嘅參選人已經可以準備民生工作，我仲需要額外嘅時間去了解多啲呢區。」
十八鄉北的選區範圍包括Grand YOHO以北的村落，更是難以靠近，他唯有四出尋找村中人為他引路：「唔係村民都未必分得到，呢間屋究竟係屬於邊條村，痴埋哂一齊。對我嚟講好似一樣咁。」
這場選戰，聽起來絕不容易：「我哋當然會想贏。其實嚟得呢啲區，絕對有（輸的心理準備），始終人哋植根幾10年、甚至幾百年，難打就一定。」
「實現任何嘅理想，都要先有影響力。」
即使勝出，他也深明在議會內難大舉進行改革，只能如以往認知中的區議員那樣處理區內「小事」，就，加上元朗區議會的民主派一直積弱，41席裡只佔5席，但他仍覺多個人多分力：「好孤軍力弱，建制同鄉事係壓倒性嘅優勢，做到嘅嘢唔多。起碼你每多個人入去，總會多個幫助。」
議會外，他仍覺區議員一角有其意義，例如他可決定如何使用每月的薪金和津貼服務居民。對於居民，他們可能更關心堵塞的水渠，多於民主自由的概念。比起直接宣傳，他更希望就這些「小事」諮詢居民意見再將其反映，讓街坊體驗這些價值。
他說：「實現任何嘅理想首先都要有影響力先，好明顯我而家係呢區就未有啦。」
關於前途和家人的期望 「每個人都要犧牲。」
劉晉宇中學畢業於港島傳統名校，後來又成為港大學生。當同窗畢業後在大公司、銀行工作，等著他們的是大好前途；相較之下，參選區議員，從來也說不上是穩定又有保障的道路。同輩以外，家人不也會對自己有期望嗎？
「我思考過呢個問題，但係我未有答案嘅時候，就放棄咗去諗。No plan is the best plan。我唔理啦，我要企喺香港嘅問題前面，每個人都要犧牲㗎啦。我對物質嘅追求都唔係咁大，反而如果可以做到個令人受人respect嘅人，我會更加開心。」就如當初在舍堂影響他的「大仙」們，他也希望有天能力所及，也能影響其他人。
記者：顏寧