香港「反送中」爭議的衝突越演越烈，鄰埠澳門的媒體亦相當關注。而《論盡》接獲自稱是澳廣視記者的投訴，指高層屢屢下指示，寫香港示威新聞時要側重香港官方回應，亦曾要求「要求一定要有示威者破壞嘅畫面，又要有警員受傷嘅」，並以「條稿太長為由」要減少批評警察的聲音。亦有記者指，很多人因此感到士氣低落，直言：「好多人都知新聞部門口掛住個『客觀公正持平』嘅牌匾，但客觀公正持平，到底應該點判斷？小記好想知！」也有人表示：「今時今日連寫一條稿都要驚，其實好冇意思。」
《論盡》曾就此向澳廣視查詢，暫未收到回覆。
高層指令多 記者士氣低
《論盡》接獲的投訴指，高層曾明言要記者要多選示威者衝擊的，有時更會以記者寫得太長為由，叫編輯刪除香港警察放催淚彈或批評警察的段落，而且側重官方回應。「一定要出政府或者警方回應，同埋盡量剪示威者『行動』嘅片。」「甚至覺得佢唔想新聞時段出現示威畫面，但林鄭或港澳辦記者會譴責就一定出 live，大篇幅講。」
有記者亦坦言，高層指令多多，令記者不敢或不願寫有關香港的示威新聞。「我哋無人去香港採訪，平時大家只可以圍住部電視睇人哋台直播。啲稿點嚟？好多唔係靠駐港記者，係靠我哋自己砌返嚟，但我哋無人想砌！唔係因為懶，而係『腦細』不停有要求：要求一定要有示威者破壞嘅畫面，又要有警員受傷嘅。咁多要求，但外電有無片先得㗎？」
「我唔知呢啲要求關唔關編輯事，不過有日聽到編輯電話響，佢收線後就叫個同事改稿，話『條稿改好咗啦，按返嗰條稿再執下』。條片出街後，負責個同事就收電話，之後見到個同事又要改下啲畫面。好多人都知新聞部門口掛住個『客觀公正持平』嘅牌匾，但客觀公正持平，到底應該點判斷？小記好想知！求教！」
另外有意見認為，高層明明有議題前設，但就往往以記者做得不好為藉口CUT稿或改片，令士氣低落，沒人想處理香港新聞；而香港的示威很多時都會持續到深夜或凌晨，於是早上新聞時段會缺少香港示威的最新情況，「明明香港凌晨發生大單嘢，都冇人寫」，更直言：「澳廣視作為紅媒，其實每個記者都心知肚明，但今時今日連寫一條稿都要驚，其實好冇意思。」
葡文新聞部有到香港採訪 中文新聞部呢？
話說澳廣視葡文新聞部由6月至今，好幾次都有記者和攝影師到香港示威現場採訪，但中文聞部則沒有。有記者指，高層沒有明確解釋到目前仍不派記者到香港採訪示威的原因，只能猜測是安全考慮，加上中文新聞部已有駐港記者，所以沒有派記者出去。不過亦有記者認為是因為「葡文同我哋都唔同總監」。「有駐港記者就唔使去？咁香港特首選舉就去？到底個標準係點？」另有記者直言高層偏頗：「首先，唔持平就一定；其次，甚麼大灣區歌頌祖國愈來愈多。」「好多之前有心嘅記者已經係過一日得一日，甚至覺得苟且偷生。」
《論盡》曾就有關投訴向澳廣視查詢，暫時未獲回覆。
澳廣視（資料圖片）