（左起）參與展覽的葉漢華、李建冲、吳星華
（獨媒特約報導）新界東北發展上馬在即，受首階段工程影響的居民，須於明年上半年起陸續遷出。
同樣居住在東北鄉郊的4,000隻動物，至今仍未獲得妥善安置。面對家園即將被夷平，牠們該何去何從？
動物救援組織「東北反逼遷動物戰隊」與太古城中心「house by kubrick」於7月20日至8月20日，合辦「你睇我唔到——新界東北動物紀錄展」，展出46幀區內動物照片。
人們「睇唔到」這些動物，除因牠們住在偏遠鄉郊，也因牠們大部份時間都躲藏起來，與陌生人保持距離；而政府在發展時，更是對這些動物視而不見。
展覽展出46幀動物照片、短文故事及立體展品，亦設有多款互動遊戲、收地資料檔及領養相冊，讓東北動物重新被「睇到」，鼓勵參觀者反思動物生命的價值。
葉漢華：政府一直扮睇唔到
有份參展的資深攝影師葉漢華，有十多年拍攝社區貓的經驗。得悉東北動物的情況後，他加入了「東北反逼遷動物戰隊」，幫助當地貓狗絕育。是次展出的照片，是他由去年9月開始拍攝的。他時常帶同相機參與絕育工作，在救援動物期間順道拍照。
葉漢華以「存檔」作為圖輯的主題，「眼前嘅事物，無論係人、屋、動物，定街道，都唔會last好耐，可能一年半之後，好多嘢都改變晒。名為『存檔』，係想將現在變成過去，模擬十年之後，望返轉頭嘅場境。」葉漢華形容，自己只是拍下動物最日常的生活狀態，例如貓隻打架、爬樹，自在時就在路邊滾地沙，「初時只係紀錄，無諗過做展覽，拍低嘅都係最平常嘅狀態」。
（葉漢華攝）
在東北視察及協助救援工作期間，葉漢華最深刻的，是在路上接連發現貓屍體，「幫手運嘢去古洞，就喺路上見到貓屍......當時當然係傷心，無咩可以做到，就用紙皮裝住（貓屍）。知道垃圾房附近有動物屍體收集處，係放一啲死咗嘅病豬。走到收集處，八卦望吓收集處後面，又遇到另一條貓屍。」葉漢華認得出那隻小黃貓，就在約一星期前拍攝過，小貓只有二至三個月大，當時看來還健康。
葉漢華說，「你睇我唔到」是一個「好中」的命題，大眾及政府好像一直「睇唔到」大規模土地發展對社區動物的影響。動物與人一樣，是鄉郊土地的持份者，但政府在規劃前卻無任何安置計劃，「應該早啲有措施、安置方法，例如放寬公屋限制（讓動物能跟隨主人上樓），支持民間團體做絕育救援工作，甚至漁護署自己都要幫手做絕育放回，呢啲喺規劃時已經要諗。」
葉漢華指，居民最後只能選擇棄養，或將動物交給漁護署。雖然漁護署與發展局已計劃將荒廢村校改建為領養中心，但葉漢華形容，計劃一直「只聞樓梯響」，而且領養中心日後的經費全靠民間團體負擔，難以長期營運。「而家係同時間競賽，出年年頭就會有第一批居民遷出，係咪可以趕得切（安排絕育領養）呢？我都好擔心。」
「我覺得呢件事（安置動物）應該跨部門做，人口凍結就係掌握社區動物數量嘅時機，但之前從來無count過。其實政府係知道，但一直扮睇唔到。」
李建冲：動物「等待」被人愛
李建冲養了十多隻貓狗，之前亦有拍攝動物的經驗，但在參與是次展覽前，其實對東北動物的情況不大了解。加入這個計劃，是受到策展人Jen的邀請，而他自己又居住於新界東北附近、近錦田的村落，所以想深入關注東北動物的去向。
李建冲的照片拍攝於今年5、6月，主題為「等待」，「拍攝咗大量照片之後，發覺好多相入面動物嘅眼神，好似都喺度等待一啲事情發生，就好似知道自己即將被放逐、被人道毀滅咁，又可能係等緊過幸福、被人愛嘅生活。」
（李建冲攝）
對他而言，印象最深刻的照片，是貨倉附近的圍板印有「惡犬出沒」字樣，前面有數隻黃狗伏在地上，「當我行到呢個地方嘅時候，就被呢幾隻字（惡犬出沒）吸引住，因為我想知道呢啲標籤狗嘅字眼係咪屬實......但當我嘗試同啲狗示好時，又感覺唔到佢哋有幾惡，佢哋只係輕輕叫咗兩聲就繼續觀察我哋。當時我心諗，用『惡犬』標籤佢哋，會唔會增加咗收地後佢哋被人道毀滅嘅機會呢？啲人可能會覺得佢哋威脅到人身安全，所以會傷害或者殺佢哋。」
李建冲表示，對於「你睇我唔到」這個展覽主題有很深感受，因為他從小到大都居住在新界東北附近，但展開拍攝前竟然對東北的情況一無所知，「當時覺得好驚訝，點解咁貼身嘅事可以咁無知.....當城市人都開始關注呢件事嘅時後，我就發覺自己太冷漠。」完成拍攝後，李建冲只想政府在土地發展的同時，正視鄉郊動物的保育議題。
吳星華：珍惜城市發展下將要消失的片段
創作立體場境的藝術家吳星華說，「開頭未肯定做咩創作，到親身（往東北）視察，見到好多鐵皮屋、鄉郊環境，所有嘢都就拆，好快再睇唔到，所以想透過創作呈現立體場境。」
吳星華指出，「你睇我唔到」這個命題，是形容普遍市民住在城市，未必看得到鄉郊動物的處境。他坦言，作為城市人，曾經都「睇唔到」鄉郊動物的境況。「自己住喺市區，算係溫室小花小草。好多時大家都集中喺發展嘅好處，但提升生活質素嘅同時，又睇唔睇到動物面對嘅處境？」他表示，創作立體場境，就是想將「平時（城市人）睇唔到嘅，呈現俾大家睇，希望大家珍惜城市發展下，就嚟消失嘅鄉郊片段」。
吳星華用他在古洞遇到的有趣經驗，以紙黏土製作了6隻貓狗。他指，動物的神態各有不同，而最讓他深刻的，是一隻坐在路邊的黑白狗，「開頭以為狗嘅保護意識好高，但點知佢無吠。我行到邊，佢都望到實，好似呢個地方真係屬於佢咁......於是我嘗試認識佢，發現佢雖然好靜，但有唔同表情。」
吳期望這個展覽能為公眾帶來甚麼訊息？吳星華認為，很多人居住在市區，比較少留意鄉郊發展所衍生的問題，「原來好多人未必知呢回事（東北發展）」。他表示，自己有時都會與到訪展覽的市民聊天，與他們討論相關問題，希望能帶來多些迴響。
吳星華又指，漁護署與發展局在安置動物方面處理不當，例如鄉郊居民通常養許多貓狗，當居民搬遷時，動物卻得不到安置，而且鄉郊動物已習慣自然生活環境，就算牠們能夠跟隨主人搬遷，也未必能適應市區新環境。他指出，有關部門應該有妥善的安置計劃，才落實發展土地。
【展覽資訊】
「你睇我唔到」——新界東北動物紀錄展
展期：2019年7月20日至8月20日
參展藝術家：葉漢華、郭烯然、李建冲、張婉雯、吳星華
策展人：Jen Wan
開放時間：1 pm – 10pm（星期一至五）、10 am – 10 pm（星期六、日）
地點：house by kubrick
地址：香港太古城中心5樓MOViE MOViE Cityplaza戲院大堂側
記者：陳康麒
攝影：陳世浩