（受訪者提供圖片）
（獨媒特約報導）漁護署現正就修訂《防止殘酷對待動物條例》進行公眾諮詢，諮詢期至7月31日。在數場公眾諮詢會上，不少動保人士均反映現行法例落後，且未能保障多種圈養及食用動物的權益，包括海豚、賽馬馬匹及食用家禽等。
兩棲爬行類動物的福利亦甚少在坊間被提及。蛇類關注組成員李逸朗（Ivan）指出，一般市民對蛇沒有太大好感，「好多人唔識分蛇有無毒，就打死咗佢先」。Ivan自小鑽研動物生態，強調應「關注所有動物，唔好淨係（關注）某一種」。為打破大眾對蛇類及其他野生動物的偏見，他更於半年前成立自然教室，開設親子班，讓小朋友近距離與蛇、蜘蛛、蜥蜴等「奇趣」動物接觸，使他們自小明白野生動物並不可怕。
自小鍾情「奇趣」寵物
Ivan曾從事環境保育工作，兩年前成立蛇類關注組。熱心關注爬行類動物，全因他自小就對「奇趣」動物有研究，他笑言自己「一出世就有興趣」，小時候喜歡「捐車底」，觀察蝸牛及鼻涕蟲，中學時期開始飼養爬行類動物，「中學時養咗十幾種龜，放學唔讀書就睇寵物」。對爬行類動物的鐘愛更俱使他鑽研生態知識，「以前讀書啲人出去圍威喂，我就勁毒咁睇動物資料」，笑言甚至影響了學業，「沉迷」於研究動物生態，使自己「讀唔成書」。
除爬行類動物外，Ivan亦有收養流浪貓狗。他形容自己「咩動物都鍾意」，現時家裡已養了幾十種動物，包括貓、狗、龜、蛇、蜘蛛、蜥蜴、蝎子、刺蝟等。他數年前開始養蛇，「有啲係買、有啲喺朋友度收養」，現時養有約十條蛇，全部屬於不同品種及產地。
Ivan認為，所有動物都應受同等對待，《防止殘酷對待動物條例》亦應保障所有動物的福利，「唔好淨係（關注）某一種」。Ivan指出，就算是蝸牛或鼻涕蟲都應該受法例保護，可惜「無咩人為佢哋發聲」。
「蛇唔會主動攻擊人，但人會追殺佢哋」
Ivan慨嘆，大部份市民對蛇抱有偏見，誤以為蛇會主動攻擊人，「蛇好驚人，遇到人會走、唔會主動攻擊人，但人會追殺佢哋」。Ivan指，蛇在效野被打死的個案不計其數，皆因「好多人唔識分蛇有無毒，就打死咗佢先」，而當人騷擾或挑釁蛇時，蛇便出於自衛本能作反擊。
Ivan指出，香港約有50種蛇，其中14種有毒，但能致命的只有8種。他以最常見的青竹蛇為例，「你經過唔會察覺到，因為佢保護色好強。但如果你整到佢，佢出於自衛本能就會攻擊你，但其實佢無心」。他亦指，人被青竹蛇咬後會出血紅腫，但不會致命。
那麼，市民遇到蛇該怎樣做？「如果喺效野公園遇到，就唔需要理會，因為嗰度係佢哋（蛇）屋企嚟。」他籲市民遇到蛇時「停一停」，蛇自然會走開。他又表示，蛇對地面震動十分敏感，如想趕走蛇，只要大力「揼一揼地」就可以。如果市民在市區發現蛇，則可報警處理，不必殺死牠們。
（受訪者提供圖片）
成立蛇類關注組 望取代粗暴捉蛇方式
不過，警方通常會找蛇鋪的「蛇王」來捉蛇，Ivan認為「蛇王」欠缺專業知識，難免會在過程中使蛇受傷。「坊間捉蛇啲蛇王，係用燒烤叉同勞工手套，完全唔安全，咁粗暴會傷害到蛇。」蛇王捉蛇後，警方會將蛇送到嘉道理農場，Ivan指許多蛇被送到嘉道理農場後都發現受傷。「我覺得（捉蛇）應該要考牌，至少要有專業工具，例如蛇勾、蛇夾，同捉毒蛇嘅手套，先可以捉，而唔係求其搵開蛇鋪嘅蛇王捉。佢哋本身食蛇賣蛇，點會有保育意識？」
兩年前，Ivan與十位同樣關注生態的友人成立蛇類關注組，望為蛇類發聲。關注組初時欲組織一支民間捉蛇隊伍，取代「蛇王」粗暴的捉蛇方式，無奈成員各有繁忙工作，難以隨傳隨到幫忙。Ivan指，自己曾就蛇王粗暴捉蛇的情況去信警方，但得不到回覆。他又嘗試到大埔警署，想向警方申請幫忙捉蛇，但可能警方「用開蛇王」，所以並沒有回應Ivan的請求。現時Ivan只期望，一眾「蛇王」退休後，警方能讓自己或其他具專業知識的人士接棒。
（受訪者提供圖片）
公眾保育意識不足 望法例保障
Ivan更於半年前創辦「Ivan哥哥自然會客室」，主要到學校推廣環保教育，以及在假日舉辦郊外親子活動。他會在活動中帶同自己的寵物，包括蛇、蜘蛛、蜥蜴等，讓小朋友親身接觸，減低對野生動物的誤解及恐懼。「其實個個出世都係由零開始，點解佢會驚蛇、驚呢樣驚嗰樣，其實可能係家長、甚或乎被社會資訊影響」。Ivan表示，如果小朋友被「野生動物係害獸」的資訊「入咗腦」，將難以改變他們往後幾十年人生對於動物的觀念。所以，他期望透過教育活動，讓小朋友從小了解保護動物的訊息，學懂如何與動物在地球共存。
不過，單憑民間力量，仍然難以改變大眾誤解。Ivan最希望漁護署推動公眾教育，「例如教大眾點分有毒嘅蛇，或者遇到蛇要點應對」。他又斥《防止殘酷對待動物條例》修訂並非保護所有野生動物，「例如而家得蟒蛇係受保護動物，係咪其他蛇就唔洗保護，可以任意傷害？」此外，根據《道路交通條例》，只有撞到馬、牛、豬、羊等家畜才需要停車報警，Ivan質疑，「馬路車死咗啲動物，其實最多係蛇、青蛙呢啲小型動物，點解（撞到）呢啲就唔洗負法律責任？」他又認為，食用的蛇的權益也值得關注，「蛇鋪啲蛇要剝牙，其實好唔人道，你想像自己未死但畀人剝咗牙，會點？」
Ivan一口氣道出蛇類的困境，其實最核心的問題，是公眾對蛇缺乏認知，「好多野生動物都被人討厭或故意傷害」。Ivan慨嘆，「所有野生動物都係大自然嘅循環，喺生態系統發揮佢嘅作用，點解人類要討厭佢哋？」
記者：陳康麒