（獨媒特約報導）立法會原定6月12日恢復二讀《逃犯條例》修訂，激起民憤引發大型示威，警方最終開槍武力清場。今日下午，二十多名市民自發到機場看報紙，及手持「范宋宗」紙張和「見識香港兩日遊」單張。
王太這天帶著「范宋宗」的紙牌和友人在接機大堂守候：「又唔知道幾點嚟，一陣間又話延遲，又話撤回，又唔撤回，班機。所以要喺度等，有通知話撤咪走囉。」友人道：「等陣唔撤，出嚟喊又話我哋唔接！」
何小姐（左）
何小姐則在身上掛上三罷標語，友人在旁看報紙，機場職員上前勸阻，指他們或違反機管局附例，不得在機場展示刊物、標語，又稱「只係將訊息話畀你聽。」何小姐憤怒回應：「機場都有報紙賣，點解唔可以睇？攞住份報紙梗係攤開嚟睇，唔通夾埋嚟睇啊？我身上呢啲係裝飾都唔係標語，而家潮流興！」
劉先生
居於港島的劉先生，今日帶著的平板電腦展示「反送中」、「Stop murder the student」標語，他說今天自發前來，沒有組織集合大家，打算在機場行街飲咖啡，其餘「未諗到，做咗先」。
劉先生於6月9日和6月12日均有上街，這幾天「心情好動盪」。他說自己也有向警察說，「裡面有好多中學Form 1仔、Form 2仔，佢哋著緊件T-shirt都仲係細碼，行動時嘅話輕手啲。」他稱警方連日來採取的行動「過份咗」，「12號咁嚴重嘅事出現，我諗點都要行出嚟，我哋已享受香港好多嘢，啲年輕人咁樣行出嚟我哋都唔行出嚟嘅話，我真係好懦弱。」對於政府早有消息會暫緩方案，他說：「唔收貨，要道歉，要追究開槍警察，佢自己要下台，要完全撤回『謊』案。」他說政府今次觸及香港人底線，完全無法接受。
他選擇來機場，因為這裡是國際焦點，警察不可亂打人，亦不可胡亂施放催淚彈。有記者問會否對駐守機場的警察感到害怕，他當刻回應：「我冇犯法喎。」
然而，他認為6月12日當日有示威者於前線高聲問人需不需要頭盔、手套，是意圖煽動其他示威者。另一在場正閱覽「見識香港兩日遊」單張的阿琳認為，即使那位先生有如此想法，仍對他願意出來多做一步覺得開心。
「見識香港兩日遊」單張介紹香港政府總部為「景點」，寫有「參觀警方武器裝備」，諷刺警方清場行動。阿琳說，雨傘運動過後至今5年，再出現市民一同參與的運動，心裡不斷出現兩個問題：「想做啲咩？可以做啲咩？」
她說，由6月9日百萬人走上街頭，到再爆發佔領，緊接而來的清場行動，過幾天剛好有靜下來的時間，好多人都願意「百花齊放」去做更多事，而機場亦正好讓來自世界各地的旅客了解事件。記者在場視察，有日本旅客主動拍照，歐美旅客看到亦向同行港人主動查詢，亦有內地旅客停留查看。
然而，在場亦有零星旅客對其手持單張和報紙的人指罵。一位中年男子與正閱覽單張的人發生口角，機場職員隨即介入，並帶該男人前往客戶服務台投訴。該男子說，「我問佢做咩仲企喺度，政府下午就有公佈，唔好搞亂香港啦，就俾人話阻住佢。」有記者追問是否支持修例，他說下回分解，又指責看報紙和閱覽單張的人，指他們阻住旅客。面對記者追訪，他說：「你哋唔好成日影到啲差佬咁暴力又盛啦，你哋成日話示威者身水身汗咁示威，人哋差佬教要背住幾10磅嘢，維護香港法治、穩定，守護立法會。如果你想香港好，就針對啲破壞社會嘅人，睇吓佢哋仲敢唔敢做！」最後，他向機場職員索取投訴表格就離開。
有男子稱要投訴在讀報紙和單張的人阻礙旅客。
有路人指罵。
記者：顏寧