好多人會睇到東大嶼人工島掏空儲備上繳國庫同利益輸送俾基建地產既問題，但係重未意識到既係，究竟點解政府咁堅持在東大嶼海中心造塊地出黎？佢心底裡其實係諗緊籌備起個咩城市？
一個駛上萬億既造城計劃，政府內部絕對冇可能係 building without plan 的，呢個隱藏左既發展策略，先係最令人最擔憂既事。以當今城市發展趨勢及官方口吻推演，可以嘗試預想一下明日大嶼人工島上好可能會進行以下隱藏既造城大計：
大灣區特殊飛地
睇著東大嶼都會既發展策略及基建部署，團結香港基金董建華已經講到明係配合大灣區，呢個幾近係一個陽謀。我識有個跟開中港新聞行家，就直情估係想將深圳前海攪唔惦既計劃移植黎人工島，或類似係早年梁振英在新界東北邊境提出既「特區中的特區」既概念，透過海陸空既大型基建打動人工島同大灣區既連繫，係好有可能發生。
咁就意味著人工島將會係香港割左出去既一個法制特區（Legal Enclave），一個比起西九龍高鐵站更巨大既法律缺口。未來裡面既土地資源、產業結構同常住人口都主要係配合大灣區發展，有特殊簽證及外來經濟特惠，所以佢需要係要同本身城市隔開既人工島，先可以做到邊界劃分管理。
中港專才生活圈
政府一開始明明話長遠短缺1,200公頃，但剩係建議造個人工島規模都成1,700公頃，發展局黃偉綸話造多啲係配合「突如其來的需要」，其實冇所謂突如其來，成條數就係計漏左中港產業及專才大舉南下既土地需求，先比較合理推斷到點解長遠缺1,200公頃，但依家要狂造成3,300公頃。
出自一個骨子裡成日諗著「公屋封頂」既特首口中，話承諾島上7成屋地都係起公屋俾普通市民，路人皆知可信性極低，時間亦將會印證。最有可能係玩規劃數字遊戲，例如改變公屋既定義，變左平得私樓少少既資助出售房屋都叫埋做「公屋」，或者未來加入一種「大灣區公屋」或「公營專才宿舍」溝貨，我地去珠海起公屋時佢地都落黎人工島起，都會造到公屋佔7成條數。
智慧城市全島監控
填一個完全白紙一張既新島，就可以更好學習澳門橫琴島一樣做中國城市最鐘意個種數碼監控。香港2030+時已經就此有所提及啲純粹便利民生既數碼基建，但亦好有可能係借便利之名進行全島天眼中央監控、每一條燈柱、每一個街角，每一秒都可在收集市民各種日常行蹤同私隱數據。
外地開始對於公權力可以對公民進行呢種「數碼強行搜身」 （digital stop-and-frisk）已經有好大反思，今日我地對吹噓「智慧城市」議程重係樂此不疲。其實有時唔係啲科技基建太smart既問題，而係咁起法會令到有權力的人可以更smart更冇制約，或者你睇港鐵撞車事故，更可能係決策者根本唔夠smart先至係個大問題。
土地壟斷圍城食租遊戲
政府話造島當係投資繼續玩高價賣地，或者直情送俾地產商自己造地起基建之後起埋豪宅（政府聲稱係叫「沙田第一城模式」），所以可以預視島上土地會繼續被地產霸權壟斷，唔會解決到本身既土地問題。
政府開到口話會研究將大型基建批俾私人參建，當然又係玩食租，即係將個基建成本轉嫁去未來既市民用家身上。就算唔夠賺錢既基建項目除左由公帑包底，就可以好似領匯上市個陣出迷你島債小市民人人有得買，未來啲私營隧道就大條道理以「市民利益」名義收到勁貴都得。
住在裡面既人將會係一個圍城既城市處境，出出入入都會被瘋狂圍租，想搵一間平啲既小店都唔會有，土地壟斷將勁過天水圍。
數碼地產霸權
除左住在裡面既人每日都俾官商收割土地稅同基建稅，因為政府夾埋啲地產商玩埋全島智能數碼基建，呢條數重未計入依家已經萬億造地基建成本，分分數開支長遠重甘過填海造地舊錢，所以計哂所有開支肯定係唔止萬億。
近年已經見到香港既地產商迅速攪埋創科產業，例如新世界就係最明顯既一間，當然未來唔少得落緊黎部署既華為，以後除左玩土地壟斷、基建壟斷可以玩埋數碼壟斷，三位一體在人工島上實現。
現實好可能真係比小說更離奇。或者你好難想像，依家個政府點解可以諗埋啲咁邪惡既暗黑規劃，佢地係睇死香港冇人挑戰到依家呢種 Sim City 既地產玩法，既得利益老樹盤根，又要配合大灣區同找小圈子選舉條數，於是就唔聲唔聲巧立名目繼續玩落去，重要不停創作土地迷思誤導公眾博你唔覺，只要繼續分到餅仔，行到土地壟斷，最後又竟然冇發生暴動，對政府黎講就係好 plan。