圖左至右：陳穎茵、潘嘉傑、何紹軒
前人撒種今日發芽，身似技安心實大雄
嶺大學生會補選，不打告急牌僅負
鏡：而家仲邊有關鍵一席呀？參選係想同學關心學校同社會
＊ ＊ ＊
一、
問：你地點解想上莊？
何紹軒：由細到大都留意社會時事，但一直停留喺思考，冇乜身體力行。揀科都係以職業為導向，科目本來係同 IT 有關，後來終於覺得應該興趣先行，過嚟嶺南讀社會科學，將諗法化作行動。
潘嘉傑：我好細個已經留心時事，雨傘時讀中六，考緊 DSE，而且家教嚴，出門比較煩。我間中竄出去一兩次，用零用錢買啲嘢食畀抗爭者。
但雨傘過後冇乜改變，同路人更加走向撕裂，自己又冇乜付出，好似有啲虧欠。
我本來係讀嘅工程有關嘅科目，但讀讀吓覺得唔係自己方向，想成為一個自己想做嘅人。終於過左嚟嶺南讀文化研究。
我一過嚟就加入「嶺南勞工關注組」，關心校內同校外嘅勞工，發現勞工權益唔可以只係話「僱主無良」，背後仲有深層嘅問題。大學之所以揀外判，亦因為教資會（UGC）嘅撥款少。
跟住就到校董何君堯講「殺無赦」，同學好似冇乜點在意，我地就同老鬼一起搞「嶺事館」。
有次「勞工關注組」想為工友搞活動，因為我地唔係正式團體，就搵「虎地書室」借場。點知校方警告話，借場畀「不合法組織」可能會收番書室經營權。
校方擺明係想箝制學生自由，但點解同學好似唔係太上心？其實同學唔係冇意見，而係鬧大左先知有咁嘅事。我地就諗不如做「正式」代表，能夠事先諮詢，團結同學一齊參與。
問：若果學生會繼續出缺，係咪會面臨解散？
鏡：理論上若果幹事會、編委會連續兩年斷莊，學生會的確要解散。幾百萬積落嚟嘅會費都要捐畀慈善機構。
但最近編委會已經有新莊「弘納」當選，所以危機已經解除，我地上唔上到莊都唔會有問題。
＊ ＊ ＊
二、
問：你地點睇香港嘅政治前途？
鏡：官方想妖魔化港獨，令港獨變成禁忌。但我地認為討論港獨冇問題，港獨絕對係香港前途嘅一個選項，社群應該有自決嘅權利。
問：中大出現撼莊，衍生「民族自決」同「民主自決」嘅唔同取向，你地又持乜嘢立場？
鏡：我地提倡民主自決。唔可以迴避點先算係「香港人」依個問題。林鄭都係土生土長，係公認嘅香港人。
究竟乜嘢係「香港價值」？香港人一直以嚟有唔同嘅價值取向。依個問題嘅答案正正需要用民主爭取。所以我地認為喺公投嘅時候，新移民都可以投票。
＊ ＊ ＊
三、
問：你地可唔可以多講對香港未來嘅想像？
鏡：對我地嚟講，自決唔應該只係改國號換國旗換國歌，但地產霸權等情況維持現狀。我地支持嘅自決，要令香港更加平等和進步，消除階級歧視，分配更加公正。
比如年輕人都知買樓好難，好多人都生活喺貧窮線下。未來香港應唔應該有租金管制，唔駛大家捱生捱死？政府應唔應該放棄搞大白象工程，投放更多資源到公營服務？我地覺得要解決依啲問題。
除此之外，香港仲未有標準工時同集體談判權。唔少學生實習只有好少津貼，甚至冇人工。我地會喺勞工權益繼續努力。
＊ ＊ ＊
一般人甚至嶺大學生，都不為意校內有六四的歷史浮雕。
在民主女神像左邊，浮雕刻著 GIVE ME LIBERTY OR GIVE ME DEATH（不自由，毋寧死）。
四、
問：你地點睇六四？去唔去維園或者搞其他活動？
鏡：有啲人話六四同香港人無關，係鄰國歷史；甚至為左確立香港人身份，應該忘記六四。我地唔認同依啲講法。
我地認為六四可以撇開身份認同，因為六四本來就係香港歷史一部分，好難抽離話唔關香港人事。六四對香港民主有好大助力，好多香港人都受感召；好多學生都去聲援。推動民主唔止喺依一代人嘅責任，要靠全民參與，唔應該 exclude 上一代人，繼續悼念六四，就係要連繫唔同世代。
六四仲未完結，中共繼續鎮壓民主運動，新彊、西藏、香港都繼續受迫害。我地要搵同路人，唔止係香港人，仲有台灣人、中國人等等，要連繫更多人去達到共同目標。
問：即係話如果貴閣有幸當選，你地會去維園？
鏡：我地內閣成員對支聯會綱領有唔同睇法，所以而家未答到你。我地要吓支聯會今年主題係咩，暫時未確定去唔去。
無論去唔去維園，我地都準備搞活動。大家都知中大嘅民主女神像。其實當年仲有個浮雕，叫「天安門屠殺」，同民女一齊展覽。
當年中大學生會頂住壓力，同群眾護送民女到中大，嶺南學生會打蛇隨棍上，順勢安放浮雕喺嶺大。
浮雕近年日久失修，破破爛爛，我地打算洗刷浮雕，亦可能喺浮雕前嘅空地搞展覽同悼念會。搞活動嘅時間會避免同維園晚會重疊，我地無意打對台或者「搶客」。
紀念方式大可自由，我地只係嘗試其他路向，而非執意想去取代。
＊ ＊ ＊
五、
問：你地點睇抗爭方式？有冇被捕嘅心理準備？
鏡：部分人對暴力好過敏，但我地唔反對使用暴力。直到現時為止，民主運動使用過嘅暴力，都遠遠不及政府嘅司法暴力同制度暴力。
我地唔會見到暴力就反感，但我地認為要有原則。包括武力嘅使用要符合比例、不傷無辜。如果目標係要制服人，就使用制服人嘅武力，但唔駛追殺人。
亦唔駛吓吓都使用武力，要衡量爭取嘅議題、同在場人士嘅判斷。
最後搞手必須為參與者負道義責任。比如每年六四晚會後都有一個冇事先申請，自發去中聯辦嘅遊行，理論上係非法集會。動員要講清楚風險，叫人慎重考慮，承受得到先去做，唔可以推人去死。
我（潘嘉傑）已經有心理準備為抗爭承擔責任。
問：你地點睇社會運動？點睇同民主派嘅關係？
鏡：有啲人批評五一、七一行禮如儀。我地覺得錯唔哂亦啱唔哂。社會運動要講組織，唔係有事吹雞，就好多市民響應。運動要慢慢累積民氣。
五一同七一嘅性質，本來就唔係行完改變到啲乜。之所以被批評為嘉年華，就係想俾普羅市民參加，通過參與而收宣傳之效。遊行係過程而非結果。
傳統社運同勇武抗爭冇衝突，兩邊都要做，前者吸納溫和嘅人；後者爭取實質成果。只要有需要，我地都會同民主派合作。
為左抗爭而坐監嘅唔止政治明星，其實仲有好多同我地一樣嘅平凡人，我地都希望能夠幫到佢地。
＊ ＊ ＊
六、
問：你地點睇社會同學生都瀰漫政治冷感？
鏡：我地喺「勞工關注組」同「嶺事館」接觸過唔少同學。同學覺得學生會離佢地好遠，依個未必係學生會責任，而係社會大環境導致。
有啲同學覺得冇可能贏到政權，仲理咁多做乜；有啲同學就覺得同自己冇關，學生會只係搞社運同政治。
其實依個都係我地想參選嘅原因，俾同學知道學生會其實有唔同工作，除左外務仲有校務，學校一啲改進就係靠學生會爭取，但同學未必知道。我地希望有更多溝通，令同學知道學生會真係關心佢地。
學生會經常寫聲明回應社會事件。好坦白講，寫聲明唔係問題，但一定要有其他方式，俾同學知道社會嘅事同自己有關。
我地會整懶人包、展板畀同學知發生咩事。比如浸大語文中心事件，主流詮釋為「講粗口就係唔啱」，但真正嘅爭拗就被邊緣化。我地要用貼地嘅方法將真相講番出嚟。
＊ ＊ ＊
七、
你地點睇學聯？
鏡：而家嶺南仲喺學聯，但斷莊令學聯冇嶺南代表，唔好講參與，連聲明署名都冇。
有啲事表面係個別事件，但所有院校都要共同面對。比如民主牆，打壓嘅源頭同性質其實都係一樣。各院校應該緊密溝通，唔好各自為政。
如果當選，我地一定會同學聯內其他院校緊密合作。即使政見可能唔同，但合適議題一定可以互援。
自治八樓一直關注少眾議題，我地搞勞工議題時承蒙過八樓協助，佢地嘅貢獻值得肯定。
先撇開應唔應該收回，我地覺得而家收回嘅方式唔恰當，唔駛訴訟咁強硬。即使要確立九樓嘅「主權」，可以成立管委會處理八樓嘅問題。
＊ ＊ ＊
八、
問：你點睇港大「蒼傲」？
鏡：我地好唔認同「蒼傲」製造校務對外務、非本地生對本地生嘅假對立。
佢地亦錯誤理解民主，聲稱校內有唔同聲音，就話要保持中立。依種所謂冇立場，其實都係一種立場，不過將立場隱藏喺所謂民意背後。
其實同學係期望學生會表態。嶺南學生會章一樣有講到要推進社會發展，培養學生關心社會，依啲係學生會應有嘅責任。講清楚立場，交畀學生決定 buy 唔 buy。
所謂校內嘅事其實同校外息息相關。比如大學條例同校董人選，就係受制於香港政治。正正因為政治因素，先令校內改革困難重重，兩者根本唔能夠切割。
「蒼傲」鄭鎮熙又揚言「唔信警察唔通信你咩」，又話有黑社會介入。可能外人對本土派的手法有非議，但我地覺得大家都有共同理想，就係為香港好。
＊ ＊ ＊
九、
問：你地覺得自己有咩優勝之處？
潘嘉傑：好老實，一般人參選好在意輸贏，但對個人嚟講真係比較次要。坦白啲講，而家仲邊有關鍵一席呀？仲有幾多險可以守咩？
由於編委會已經上莊，我地上唔上到莊都唔會世界末日。依然去選學生會，係想同學關心學校同社會。
我地喺政綱非常詳盡咁羅列校內校外大小事務，諮詢大會上的確有同學質疑我地有冇能力跟得哂。
但我認為代議民主唔係投一個代議士，幫你搞掂哂問題，搞唔掂就係代議士嘅問題。我唔係為自己辯護，而係改變須要大家付出。我地喺政綱寫咁多嘢，就係想同學知道依啲問題存在，繼續思考同關心，大家都可以去做。
＊ ＊ ＊
後記
嶺大學生會選舉的有效票數門檻，遠超一般大學，須達四分之一學生，而且投票日子僅止三日。「鏡」雖獲逾九成信任票，但距四分一門檻尚欠約一百票，無奈飲恨。
是次選舉已屬補選，除非學生聯署要求再選，否則不會再有選舉，須要留待來年。