話說呢幾日啲腐人好似約埋一齊咁响網上圍攻香蕉奶，引來左中右群起攻之既奇觀，實在令我好生奇怪，一個普普通通彈結他唱吓歌既年青人啫，又得罪咗啲鬧人唔使本既腐人乜野呢？
睇完啲文後我發覺真係得啖笑。 佢地第一樣鬧既野係人地個名，「香蕉代表正能量，奶代表童心」，話九唔搭八喎。查實我真係好想問啲腐人鬧人之前可唔可以google吓先呢？香蕉响上一代小朋友心目中，從來就係令人聯想到香蕉船，香蕉蛋糕呢啲開心野，到底香蕉代表正能量係有乜問題呢？
好啦當你中二病唔識世界，咁咪上網查下香蕉既營養價值囉，「吃香蕉，可使大腦5-羥色胺的濃度增加，從而減少引起情緒低落的激素，使悲觀失望、厭世煩躁的情緒逐漸消失」，「香蕉是營養師建議的十大開心食品之一。」呢啲簡單野上網一查就有架啦，求吓啲腐人可唔可以俾少少質素，寫文鬧人之前求其做少少資料搜集呢？
人地叫做香蕉奶，你鍾意叫做木瓜奶話係代表大乳房咁咪叫囉，無他既，係顯示出你自己無文化無人會鐘意你咁解啫，你自己自由。 然後佢地又好好笑咁，話人地响網上籌款出碟，二百五十蚊沖杯香蕉奶，五千蚊表演，一萬蚊作隻歌係自抬身價。呢啲又係唔知咩道理。宜家人地又唔係專業沖奶，專業賣身，其實講到底係為咗籌十二萬出隻碟而做既野啫，你係有權唔捐既，而如果捐既話，背後好明顯就係為咗撐佢出碟呢個志願而唔係為咗杯奶啦。正如你去幫慈善團體買塊三十五蚊既曲奇，係為咗幫啲老人家呀，唔通你以為係因為啲曲奇鑲金咩？
香港人就係咁既道理都唔明白，吓吓用巿場邏輯黎衡量所有野，咪搞到啲文化工作者吓吓逼啲大商家食住出啲無內容無個性既文化垃圾囉。依家啲文化人想突破框框自己募捐出碟殺出血路，真係估唔到啲中二病港豬竟然連咁都唔明。
其實嗰個音樂蜂網站入面籌款既音樂人（包括Little, Little Man在內）就個個都係咁上下定價架啦，嗰啲單單捉香蕉奶出黎鬧而捧Little, Little Man既人，好明顯就係為鬧而鬧，對人不對事啫。 至於點解咁對人不對事呢？其實講黎講去就係嗰啲爛道理，話人地衝時唔見香蕉奶衝，話佢借社運上位好抽水。
講到呢樣野我就真係忍唔住笑咗出黎，班人講到音樂好似同作戰無關係咁，又講到唱歌嗰個唔衝好似係罪咁，真係睇到我眼飲緊啖水都差啲噴埋出黎。講真，究竟呢個世界上有邊隊軍隊係無樂團架？就算打仗都唔係每秒每刻都衝緊架吓話？軍隊生活都需要培養氣氛架吓話？最重要既係，究竟有邊隊軍隊會戇居到叫佢隊樂團負責响前線衝架？佢企前線你都怕佢累街坊啦吓話？
啲腐人成日講到自己好識衝咁，但係就連咁簡單既行軍作戰常識都唔識，文又唔識武又唔識，常識同非常識都通通唔識，唔通就係啲淨係得把口鬧人既腐人既個性特色？ 仲要話人地抽水，話人地日日响金鐘個場搞演唱會，其實既然都識得講人地佔領一開始就幾乎日日落場，就既係落咗力咁做咗佢唱歌同搞氣氛既本份啦，話佢離地，佢離極都貼地同勤力過你班日日淨係聚响個離岸屌人中心度齋鬧無建樹既怨毒腐人囉。
最搞笑就係佢地依家係真係去到戇居新境界，話識唱歌玩音樂既人又有好多fans係自戀，齋鬧人無其他建樹既就係勇武義士喎，真係唔知咩邏輯黎，文攻武略乜都唔識既人叫做義士，就係連自high都唔需要有基礎既。
好啦，其實講黎講去，明明大部份理據都唔成立，點解大家會鬧香蕉奶鬧得咁興緻勃勃呢？講到底最大一個因素，係因為佢吸引咗一大班十幾二十歲既妹妹仔既愛戴，仲要幾日之間已經籌到萬幾蚊，呢啲就擺明係教「首先你必需有個女朋友」，文攻武略乜都唔得既「義人」至為葡萄，恨得牙癢，必需口出惡言除之而後快既最大原因啦。