劉浩良新手上路的《衝鋒車》 (TWO THUMBS UP)，一睇故事就叫人期待萬分 – 紅Van扮衝鋒睇落就係幾好玩。你或會說這套是合拍假扮港產，或扮警車根本不是甚麼點子：發哥高叫諗左十六年的橋，似乎係佢臨入册前睇左北野武係《花火》度用的士扮警車。但即使衝鋒仍唔夠明顯，紅Van卻是明顯的本土象徵，而且《那夜凌晨，我坐上了旺角開往大埔的紅VAN》裡的紅Van都已任撞唔爛，這回車頂路牌突然彈出機關槍又有何不可？誰人說翻舊橋不可以翻得好玩？這世間有句成語叫推陳出新聽過沒有？
似曾相識的不止於《花火》 - 吳鎮宇飾的發哥等一團人，姜皓文領的另一團悍匪，古巨基飾的熱血警察徐安良，他們都穿著警服，表面看難分彼此，當然實際上是三批人有三個身份三個目的：這種三角關係，老早在一九六六年的《獨行俠決鬥地獄門》 (The Good，the bad and the ugly) 用過，西部牛仔裝變作香港警服，但架構依舊是三批人因為一筆錢而團團轉。只是這三角，The Good、The Bad仍在，但The Ugly是否應改一改？
姜皓文領的一批，有殺無賠，叫是The bad準沒錯。徐安良為真警察，戇直不為錢只想著捉賊，也當然是The Good：他受不了長年作臥底，調回穿軍裝時仍死命追尋頂遺失了的警帽，他未到結尾仍想不透其老頂所講的：「著起件衫唔代表你可以捉到賊。」你話徐安良夠戇，其實大多香港人都如他般戇：香港搞唔出荷里活英雄的原因，一是警匪片太成功，二就是港人迷信精英主義，捉賊做英雄是少數當警察的「精英」才能搞定 - 發哥等四個齊穿督察服「出更」，假到冇朋友 (林東穿白衫竟要委屈當司機，醒定D一眼即可踢爆)，卻可嚇到路過司機到MK仔等。諷刺港人的信靠精英，其實只是膚淺唔用腦。
發哥等本來也只想做賊，卻接二連三「見義勇為」，先由MK仔手中救出雪糕車少女，制止姜皓那批桿匪到營地進行殺戮，最後更意外由拐子佬手上救走小女孩：這也如同《的士司機》 (Taxi Driver) 的羅拔迪尼路 - 行刺參議員不成，卻殺了扯皮條，救出茱迪科士打做了英雄。稱發哥等人做Hero不為過，正如「著衫唔代表你捉到賊」，英雄無專利，人人皆可做。其實開頭的扮Marvel畫面，諷刺英雄主義的味道也老早呼之欲出。
說到這裡，《衝鋒車》有兩大突破：一是賊和真警察都著起警服的畫面，碰巧今天警隊形象一落千丈，也準確預言警察是時候收起自己的高高在上，做回個普通人；二是早不止警察才可做英雄，連賊佬也可變身英雄，爛紅Van也可做變型金鋼伸出機關炮，道的是誰也可以做英雄，荷里活到今日還只把英雄留給異於常人的精英，香港卻在意識上比荷里活更前衛，或都不該再嫌這套左翻右翻舊橋吧。