（照舊含少量劇透，但我相信不太影響觀影樂趣，反正睇呢套戲都冇乜樂趣）
正所謂乜春都係政治。睇「美國狙擊手」（American Snipe），好易先入為主，歸哂邊唔使討論。片名冇任何玄虛，就跟番書名，甚至唔係「傳奇狙擊手」，就係「美國」「狙擊手」。「美國狙擊手」射咩水，心照。鍾意既覺得導演奇連伊士活（Clint Eastwood）好愛國，拍番愛國英雄Chris Kyle，直頭時代良心。唔鍾意既定必覺得Chris Kyle濫殺無辜，奇伯大美國拍埋啲飛機片，抹黑中東佬，美國人偏偏又好buy云云。
但其實，兩種諗法都有點問題。即使用相當寬鬆的標準黎講，奇伯都唔係大美國飛機導演，而同時間Kyle亦難稱得上係咩英雄。
先由片中睇到觀眾嘩嘩聲（我果間戲院係啦下，可能我區啲人比較奇怪）一幕講起。
Kyle遇到佢既「宿敵」，伊拉克（其實黎自敍利亞）的高手Mustafa。 Mustafa係奧運射擊金牌，1000碼外都可以輕易精準殺人，殺左不少美軍仲出錄影帶，好不得意。當時兩人相距2000碼，Kyle想為民除害兼為朋友報仇，不理戰友阻止（「咁遠你點射中呀?只會暴露我地行蹤」），照開槍。
然後？當然係「美國狙擊手」Kyle神乎奇技，2000碼外做低對手。一槍斃命，型到爆，打機一樣。觀眾嘩嘩聲咁讚歎。
直頭令我諗起當年睇「城市獵人」（TVB動畫啦唏）， 某自以為高手單挑主角孟波（冴羽獠），聲稱自己係奧運冠軍云云。當然實力同孟波比相差甚遠。最後勝利者孟波仲不忘好型咁講一句 「你，係業餘既冠軍。 但我，係職業既冠軍」
型到死。我懷疑奇連伊士活都睇左呢集「城市獵人」。否則應該唔會作得出個咁既古仔
事實係: 伊拉克從冇拎過任何奧運射擊獎牌。叙利亞都冇。
事實上，有條友殺美軍放錄影帶係真，但係一個人，定一班人，定只係剪片製作，冇人知。Kyle本書有提過Mustafa呢位高手（但絕對冇咩奧運金牌），但兩人根本冇交過手，Kyle只係輕描淡寫咁講Mustafa應該比其他人做低左。
類似的「加工」，入面仲有好多。當然拍戲唔係紀錄片，冇必要完全準確，咁鍾意寫實睇隔離台動物奇觀。救參任務（Argo）結尾一樣大話西遊，但無礙套戲大受好評，而本人亦覺得可接受。況且，何謂「史實」?吳宇森拍「赤壁」比人話偏離史實，小弟覺得好Q好笑，因為佢地既「史實」原來係「三國演義」!同樣地，「美國狙擊手」係改編Kyle本自傳，有幾「史實」?大家心照。往後仲會有文講。
「美國狙擊手」衰乜?成套戲，其實真係錯撚哂。由決定開拍呢套戲，就已經錯哂。噢，夠諷刺地，就同片中講美國在中東的戰爭差不多。
拍一個咁既愛國/飛機古仔，根本，就唔應該基於Kyle本書。「救參任務」係真事實件改編，但冇人真係覺得要好忠於史實，因為套戲畢竟唔係拍一個人既古仔。但今次決定改編Kyle本書，就已經先天有缺憾。拍人物傳記，隱惡揚善就梗，但最慘就係經後天再執，係越搞越衰。最衰，就係一早有人拍左「拆彈雄心」（The Hurt Locker）。我認為開拍果個(最初其實係想搵史提芬史匹堡Steven Spielberg導演)失算在，佢不甘於只係拍個古仔，要「實感」。慌死你唔明「是真的」，仲要結尾加番真實既片段。
我真有點同情奇連伊士活了。
奇連伊士活，神枱級人物。十分「美國」的美國佬。一般人想像美國既獨居老野，就係佢咁款。咪撩起佢把火，入佢屋同關心下佢，佢隨時拎支獵槍出黎打瓜你，果種阿伯。奇伯自己亦都當過兵，銀幕上亦以演西部牛仔出名。晚年都仲有火，在「驅•逐」（Gran Torino）差不多80歲都仲拎住支槍親自上陣去「保衞弱小」，實踐其「白人責任論」。
咁既設定，少不免令你覺得奇伯為後輩，國家英雄Kyle歌功頌德。
咁又未必。
奇伯雖則做牛仔，又燒槍，又當過兵，仲拍美軍片。但佢係咪十分「大美國」的黐GUN勇武老年?其實唔係。奇伯不能話係和平主義者，但佢其實不贊成韓戰越戰伊拉克戰爭甚至阿富汗戰爭。佢唔支持美國做世界警察。在「驅•逐」拎支槍打爆你個頭的阿伯，甚至係支持槍械管制既。呢樣，我估令好多人都幾意外。
似乎（佢冇明確講，但我估），在奇伯心中，只有二次大戰先係「出師有名」。人地踩上門，我地要保衛國家。所以你見佢拍「戰火旗蹟」（ Flags of Our Fathers）。而即使係拍二戰，奇伯亦唔係擦政府鞋果種人。相反，佢（聰明地？）著重於歌頌個人。正所謂「肉食者鄙」，政客又廢又賤格，但基層軍人同公民，鐵血丹心，忠肝義膽，為國家為家人為信念，先係值得崇敬。亦因為咁，你見到佢仲拍埋「硫磺島戰書」 （Letters from Iwo Jima），「從日本人的角度出發」，夠哂左膠。
所以，片初果個牧羊狗故事其實係老作的，我完全OK。呢個講古仔手法十分奇連伊士活，佢在「擊情」（Million Dollar Baby）一樣係咁講古仔開頭。 同樣地，奇伯好巧妙咁安排Kyle睇完911片段（慌死美國觀眾唔識投入），「然後」就去左伊拉克，咁樣去「暗示」兩樣野既因果（而其實並冇）， 我都可以接受。真的，撇除立場取材等等，奇伯唔識拍戲唔通我識？
唔理Kyle本野，齋當古仔睇，算係不錯。但亦不能算係佳作。因為，太容易預計了。但冇法，老導演拍戲一般都係咁，你見活地亞倫（Woody Allen）都係咁，你總不能期望活地亞倫老左忽然拍套葉念琛。
的確，套戲就係so predictable。我可以想像美國人睇得好感動，但話呢套係佳作甚至拎奧斯卡，有點距離。講軍人兄弟情呀，官僚又白痴（佢唔係拎住本可蘭經呀！），公眾又唔關心政治唔體諒，老婆又詐型，仔女又見唔到老豆之類。最後仲悲劇英雄式既養大狗仔咬春袋，死在自己人手上。至於中東佬，就梗係心地唔好。女人細路全部都唔係無辜。殺人係迫不得己，又好掙扎(實情從冇咁既事，戲入面Kyle係因為放唔低同伴，唔係因為殺左人好不安)，有機會放過細路我地都會放過。啲中東佬又貪錢，又狡猾，我比面佢做客人，佢都原來想坑我。
即係，其實呢一切一切，都可以接受的。問題係，一係你就拍古仔片，好似「救參任務」同「拆彈雄心」咁（前者係真事，但我指個手法）。一係就玩「偽真相」， 「追擊拉登行動」（Zero Dark Thirty）或者「獵殺拉登」（Code Name Geronimo）咁，開槍咪開槍，早早收工番歸，我打份工聽上面柯打政治既野我唔識，使Q咁多掙扎又咁多口水。
「美國狙擊手」既捉蟲，就係呢兩頭，都唔到岸。
下一篇會講埋「美國狙擊手」如何先天不足，Chris Kyle到底何許人。