（獨媒報導）啟德體育園明年將會啟用，屆時主場館及青年運動場皆可舉辦本地球賽。同一時間，原擬改建並加設跑道的香港大球場，當局正重新審視計劃。那麼同位於港島的小西灣運動場呢？去年起封閉翻新八個月後，上周日（17日）再次舉辦收費足球賽事，上演兩場菁英盃B組賽「雙料娛樂」。入場球迷認為，運動場位置偏遠，只適宜舉辦地區活動，盼體育園落成後亦同時保留香港大球場。
小西灣運動場去年起封閉八個月作維修
小西灣運動場於1996年落成，旁邊是私人屋苑藍灣半島，觀眾席是一個圓拱形看台，可容納11,891人，設有符合國際標準草地足球場、國際田聯標準田徑設施、電子計分屏幕等。運動場曾舉辦不少頂級賽事，包括1997年南華對車路士外隊賽、2006年世界盃外圍賽上演中港大戰、2014年世界盃亞洲區外圍賽港隊對沙特阿拉伯等。
運動場鄰近海邊，在2017年超強颱風「天鴿」及2018年「山竹」吹襲下，設施嚴重受損，需封閉維修。此外，運動場亦被指偏遠，兼有居民投訴打氣聲音，有關方面減少安排球賽。2021年2月27日舉行港超聯賽事後，至今未有再舉辦。足總去年舉行了三日共5場菁英盃賽事，其後的12月6日起，康文署封閉球場八個月進行翻新，包括跑道、草地球場、看台、更衣室及洗手間等設施，至今年8月31日對外開放。
上周日（17日）是翻新後首日再有收費賽事，上演兩場菁英盃B組賽「雙料娛樂」，分別為下午3時標準流浪對九龍城，以及晚上6時理文對冠忠南區，兩場合共逾300人入場觀賞。翻新後的運動場部分看台座椅重新髹油，第8及38段設有免觸式飲水機。此外，第8段男女洗手間已作翻新，其餘則維持原狀或工程進行中。
有球迷指前排座位視線欠佳
球迷球賽觀賞經驗如何？三名九龍城球迷Kent、Matthew及Samson，首次到小西灣運動場觀賽，一致評價場地「西」（極差）。他們著記者坐前排位置，「你坐過嚟就知㗎啦，你望一望個視線，呢個就係我想表達嘅嘢。」Matthew笑言「呢個場冇得搞㗎啦，地理位置系都係無得鬥氣。講真呢萬幾個位係嘥晒」，Samson則指「太遠啦，又冇地鐵交通又唔方便」。
九龍城球迷Matthew （左）、Kent（中）、Samson（右）
冠忠南區球迷林先生是翻新後首次到小西灣運動場觀賽，稱與翻新前「冇分別，個廁所好似好咗少少，但係都係咁臭囉」，又指洗手盆及水龍頭「裝錯位」。對於場地，林先生指「差囉，即係跑步OK嘅，足球就麻麻囉」，認為運動場地點偏遠，足總編排的球迷區亦安排不佳，「除非我坐最高嘅啫，根本上你坐呢度，你都睇唔到嘅。」他又指鄰近海邊的球場有「極端天氣」、「夏天熱冬天凍」，認為只適宜作地區用途。
冠忠南區球迷林生
球迷球員同倡保留香港大球場
對於正研究未來去向的香港大球場，Kent、Matthew及Samson皆認為需保留原有用途，其中Kent認為本港需至少有兩個中至大型球場，香港大球場與啟德體育園可以並存，「唔會話淨係用死一個大球場，香港大球場要養草，以前就話要迫晒落大球場度大型賽事，遲吓唔通逼落啟德咩，起碼要有兩個去分散呀嘛，一邊可以去踢波一邊可以做七欖。」
Samson則擔心體育園未來或經常舉辦演唱會，「我哋都要需要留返一個可以長期搞足球比賽嘅大場，頂多都係翻新吓，但唔係加跑道或者減位」。林先生同認為，香港大球場地理位置方便，又認為「始終大球場咁多年都係個象徵式地標」。
運動員的看法如何，標準流浪球員梁凱俊及李泳豪認為球場設計不俗，觀眾席包圍整個足球場，草地保養亦佳，令傳球更順暢，「個波踢落會去啲」。他們同認為應保留香港大球場，指有兩個大型球場可舉辦賽事並非壞事。
梁凱俊（左）、李泳豪（右）