【獨媒報導】港超聯周日迎來強強對碰，日前易帥的理文在將軍澳運動場主場對東方，但該支去屆聯賽冠軍未見起色，以1：2落敗。在比賽後，理文會長李文恩到後備席為球員打氣，並透露已物色來自外國的新任主教練。李文恩認為，球隊必須加強團隊合作性，重新吸引球迷入場：「唔會話再諗啲咩成績，一定要出線，或者一定要攞冠軍。我希望反而係踢返好波俾球迷睇，呢幾場都失咗好多球迷⋯⋯因為football without fans is nothing，係咪先？」
理文在亞冠二錄得兩連敗，球隊隨即宣佈易帥，由助教朱兆基接替曾昭達出任暫代主教練。球隊今場哀兵上陣，收起周子謙、胡晉銘及夏馬特，改由金旻奎、顏樂楓及鄭兆均任正選，黃俊皓推前扼守中場，前場由安尼亞、羅沙及鄭兆均攻堅，艾華頓、保連奴不入比賽名單。
東方則在三日前（3日）主場對日職榜首球隊廣島三箭，最終力戰而敗，表現備受好評；而兩支球隊均在9日內迎來3場賽事。東方今場起用梁冠聰出任防守中場，巴科爾、吳宇曦及馬希偉衝鋒陷陣。
李毅凱多次鼓勵隊友 犯錯遭馬希偉先開記錄
上半場7分鐘，東方一次角球攻勢，李毅凱向隊友提場：「俾啲信心自己。」18分鐘，葉鴻輝解圍不遠，皮球落在安尼亞腳下，並第一時間傳予保利臣，後者射入但越位在先。
20分鐘，李毅凱再次鼓勵隊友，大叫「唔好縮呀」。不過，說時遲那時快，巴科爾用頭將來球送前，李毅凱心口未能控定，皮球落入小禁區前，馬希偉贏身位射入，東方領先1：0。25分鐘，顏樂楓爭贏高素巴耶夫再傳予安尼亞，此子起腳射中網側。東方半場領先1：0。
廖國文翻看影片後直指十二碼 保利臣操刀射入
下半場換邊，47分鐘，鄭兆均撥橫，保利臣接應轉身施射，但未能命中目標。52分鐘，羅沙扭過丹尼爾，再盤球到禁區，高素巴耶夫從後掃踢對方。球證廖國文原本未有表示，保利臣更因投訴過激被罰黃牌。不過，視像助理裁判作出覆核，廖國文在翻看影片後直指十二碼點。保利臣操刀射入，為理文追成1：1。
馬高斯罰球建功 李毅凱犯規成客隊眾矢之的
63分鐘，黃皓雋在禁區頂搏得罰球，馬高斯主理，皮球省中保利臣再彈地入網，陳嘉豪未能反應過來，東方2：1領先。理文下半場踢來欠活力，而多名東方球員包括吳宇曦、賀爾在比賽期間，亦要食補充劑補充體力。70分鐘，李毅凱更因侵犯巴科爾被罰黃牌，東方球迷不滿並大叫：「理文精神，輸波打人。」
在下半場中後段，理文換入周子謙踢中堅，立花稜也推上一格踢左翼，金旻奎、黃俊皓分別出任左右閘；至末段再以夏馬特入替立花稜也。89分鐘，張憙延右路開角球，保利臣近柱一頂，皮球眼看要入之際，葉鴻輝救出，東方最後保持勝局贏2：1。
李文恩：梗係唔開心啦 指團隊合作性比以往好少少
在輸波後，金旻奎更要由余在言安慰，顏樂楓則向球迷作致歉的手勢。今場比賽共有1,050人入場，賀爾成為今場最佳球員。理文會長李文恩與球隊顧問陳鴻平比賽期間在貴賓席睇波，效力中超球會浙江隊的梁諾恆亦是座上客。
在比賽後，李文恩對記者形容，球隊今場的團隊合作性較之前強：「最後輸波，梗係唔開心啦。但大家見到團隊合作性，比以往好少少。」他預告將會聘請外國教練：「我哋有啲人選，管理團隊會面試。嗰啲candidates 都係喺外國嚟嘅人，我哋未in 本地嘅教練。」
稱曾昭達壓力太大 李文恩：諗多咗嘢、盼平常心面對
被問到曾昭達的情況，李文恩稱對方的壓力太大：「可能因為舊年攞到聯賽冠軍啦，今年希望蟬聯啦，其實人性嚟嘅都係，亦都ACL 2啦。對於年青教練嚟講，嗰個壓力佢未必受得到。係啦，等佢休息吓先啦。」
李文恩強調享受與曾昭達共事，讚賞對方是勤力、有心進步的教練：「不過覺得壓力真係太大，我好記得對新加坡嗰場比賽，佢直頭壓力太大，我寧願佢休息吓先。」李文恩表示，曾昭達今季不會參與一隊任何工作，並會修讀亞洲足協專業級教練資格。
至於易帥的原因，李文恩稱與「內容」有關，指自己與曾昭達都「諗多咗嘢」：「我哋亞冠二應該點樣面對佢⋯⋯從我開始，到成班人下面，喺亞冠二呢個比賽上諗多咗嘢。畢竟第一次，其實應該平常心返啲。」
另預告1月增兵 以中後場為主
李文恩認為必須加強團隊合作性，並重新吸引球迷入場：「唔會話再諗啲咩成績，一定要出線，或者一定要攞冠軍。我希望，反而係踢返好波俾球迷睇，呢幾場都失咗好多球迷⋯⋯因為football without fans is nothing，係咪先？」
被問到對新任主教練的要求，李文恩就有一番見解：「最緊要點樣帶領團隊進步，好坦白講，啲球員好難變。講得難聽啲，唔係話雞就雞，我哋都簽咗成年約。」他又預告理文將在1月增兵，新任主教練必須在短期內再提升團隊合作性。
那麼增兵的位置？李文恩就稱會以中後場為主：「都係中後場啦，因為都成日被人笑。」他認為港超聯球隊今季的實力增強了不少，「唔係攻人哋就一定會攞到好成績」，希望中後場球員在由守轉攻會有更好效果。談到今夏加盟的一眾新兵，李文恩表示很滿意周子謙的表現：「嗯，馬天尼斯我覺得佢會陸續好啲，第一場出嚟效果好差，咁都俾人哋頂入咗。今日佢都唔會好甩，都好硬淨頂住，應該陸陸續續會進步。」
朱兆基慨嘆「行路打倒褪」 稱「我自己都想走落去」
暫代主教練朱兆基則表示，理文以爭標球隊來說，「下場唔可以再係咁」。不過他認為，今場不能責怪任何球員，因為去到最後仍十分搏命。朱兆基重申，不能再用「汲取教訓」為藉口，但指球員已承受了不少壓力，一眾外援仍力拼到底：「嗯，我哋失咗個波，輸咗個唔好彩嘅罰球，足球就係咁。」
朱兆基又慨嘆球隊「行路打倒褪」：「你問我，我自己都想走落去，我自己都想走落去，但唔可以係咁⋯⋯但我諗所有球員同埋職員，甚至乎老闆都係做到最好嘅嘢。」
承認好大信心危機 朱兆基期望先重拾鬥志
另外，朱兆基指理文作為衛冕冠軍，今季面對很大的心理包袱：「覺得我哋唔衰得，我哋出到嚟要贏，久而久之有壓力之下，出到嚟一定踢得唔好。」他表示，教練團及老闆均希望，球員能先重新享受足球，強調球隊氣氛融洽，不存在任何磨擦，期望球員當下能先重拾鬥志。
被問到是否有信心危機，朱兆基就稱「危機已經唔係有啲，其實好大」：「但我哋嘅角度，如果我哋企出嚟都話俾佢知我哋唔得嘅話，咁其實佢哋唔會有信心。我教佢點踢，教佢點射，教佢點防守？你問我，佢哋全部都識！全部都識！一個職業球員無可能唔識做呢啲嘢，只係差返啲信心。」而在朱兆基接受訪問期間，李文恩就安慰一眾理文球員，包括李毅凱、周子謙及陳嘉豪等。