【獨媒報導】港超聯周日上演地區打吡，繼昨日後再次出現大手交易，早前易帥的深水埗主場慘呑大埔四蛋。在比賽後，深水埗主教練郭嘉諾向球迷致歉 ，稱「仍需時執返好」，希望球迷可給予耐性。他更透露球隊現時情況：「我要教搓波，即係邊隻腳攞波⋯⋯呢啲都要教返。所以好耐都未試過去到教U仔咁樣，佢哋真係始終無經驗。」
今場不但是升班馬大戰，更是深水埗易帥後第二仗，新加盟的奧力斯、史提芬繼上場後續任正選，劉浩霖傷癒復出中場派牌。大埔三名外援保連奴、加比爾及利馬悉數出任正選，中前場則有鍾偉強、鄭子森、李家豪等。
杜國榆擺烏龍 黃靖揚半場前被換出
7分鐘，鍾偉強接應利馬傳送，殺入禁區力壓黃靖揚出波，杜國榆情急之下擺烏龍，大埔領先一球。30分鐘，鍾偉強中路欲傳往右路，但省中深水埗後衛，皮球落到保連奴腳下，後者一射高出。
深水埗落後一球後，郭嘉諾在場邊十分肉緊，曾多次向黃靖揚「教路」，又在一次對方角球頂中楣後喝斥黃靖揚：「點企呀？唔係前柱呀嘛！」32分鐘，黃靖揚遭換出，由嚴啟華入替。
兩隊在上半場具威脅的埋門不多，中場更「亂鬥亂」，深水埗最致命攻門已要數補時階段，羅港威傳予泰亞高，後者盤球入禁區後成半單刀，未有即時起腳，遭李家豪清出底線。
大埔秘書長陳平在觀眾席上睇波，大嘆深水埗的中場對抗性不足，指大埔幸好有加比爾在後防「睇實」：「深水埗有嘉諾喺度都好好多嘅。」他亦對大埔排陣有意見，更稱「換走個肥利馬佢啦，換牛仔（趙少維）出嚟好過啦。」
深水埗下半場一度有起色 惟遭失三球
在下半場換邊後，深水埗一度有起色。58分鐘，劉浩霖策動攻勢，交予周家樂，後者分到右路的鄧子均，但被翁煦濤侵犯，翁煦濤被罰黃牌。
64分鐘，深水埗有梁星耀入替劉浩霖，不過勝利之神未有眷顧主隊。66分鐘，馮冠鳴偷去黎格爾皮球，分予左路的鄭子森，後備入替的王力威在左路接應用右腳一射入網，替大埔擴大領先優勢到兩球。
74分鐘，王力威推到底線出波，嚴啟華、史提芬轉身防守「被騙」，陳曉鋒後上㩒射，奧力斯欲救無從，比數改寫成3:0。77分鐘，馮冠鳴中路突破，傳予保連奴，後者禁區頂拉弓描準遠柱，奧力斯長鞭莫及，大埔贏到4:0。
馮冠鳴成最佳球員 郭嘉諾承認「個頭開得差」
今場入場人數為868人，馮冠鳴當選今場最佳球員。深水埗民政事務專員黃昕然、大埔民政事務專員陳巧敏均有入場，二人在下半場才「相認」，並與深水埗體育會主席盧永文坐在貴賓席。
在比賽後，郭嘉諾對記者指，球隊今場至少有機會入球，但承認「個頭開得差」：「人腳都要執一執始終。無辦法，都係嗰班人，有時佢哋信心崩潰得好快。當失咗一球之後，好快第二、三球就會嚟，佢哋個心態未調整到。」他指仍需要時間「逐場執」，並對球迷致歉，希望能給予耐性，重申不希望輸少當贏，慢慢增加入球機會。
郭嘉諾給球員50分：淨係希望繼續唔好耷頭
另外，郭嘉諾表示，加入球隊後首要執好戰術、體能及心理，但球員的技術則「需時去執」，「成日話無技術無戰術，有時戰術我用唔到，因為技術方面問題。」他指大埔開季至今不斷進步，認為兩隊情況類似，但深水埗則欠缺孭飛的球員，希望球員在累積經驗後會有進步。
曾執教多支球隊的郭嘉諾，早前形容出任深水埗主教練是教練生涯最大挑戰。《獨媒》就問郭嘉諾，今場給幾多分予球員，他表示會給50分，「我又唔想講到好似fail 咁樣，其實好努力嘅，淨係希望佢哋成班繼續唔好耷頭。」他指昨日兩場賽事，即傑志、理文便共取得17個入球，所以必須接受強弱懸殊的事實，作為弱隊仍需保持競爭力。
記者追問郭嘉諾，球隊下半場初段一度有改善，但最終連失三球。他認為「前面入唔到波，後面壓力大咗」，承認大埔把握力較強，球隊必須改善防守及重新調整心理關口。
對於黃靖揚被換出，郭嘉諾解釋指，黃靖揚在輸了第一球後信心不足，加上在自己面前，所以壓力較大；他期望1月可以「有嘢見到」，強調球隊已有進步，但仍要更多時間。
李恆匯：大埔與傑志、理文「唔同級數」
大埔主教練李恆匯則表示，球隊在上半場發揮欠理想，在面對同級球隊欠紀律，把握力、攻守轉換亦有待改善。他又透露，高層在賽後宣布將稍稍「加碼」。被問到港超聯接連出現大手交易，李恆匯就提到，傑志、理文的目標是亞洲賽，「我哋係唔同級數」，大埔旨在港超聯爭勝，與港會、香港U23及深水埗屬同級。
記者：麥馬高、周頌謙