【獨媒報導】港超聯周日尾場，大埔周日作客4：0大勝港會，報卻次循環落敗之仇。陳肇鈞今場包辦了兩個入球，他在賽後表示，早前對港會失分上了寶貴一課，「希望餘下每一場波都發揮得最好」：「講真而家唔需要諗隔離幾比幾，每一場波都做好自己，打到盡。」
在聯賽首循環，大埔主場2：1擊敗港會，次回合作客港會場則以0：2敗北。港會今場由隊長費查把守最後一關，後防有積施利、羅素壓陣。大埔續盡用6外援名額，尼高拉斯出任左閘，峇夏比在中場掃蕩，新外援奇雲巴迪先任後備。
盧卡斯、陳肇鈞上半場「玩晒」
上半場開賽初段，費查因面向陽光，已要戴上帽子。6分鐘，陳肇鈞撥橫，盧卡斯起腳斜出。21分鐘，華維迪傳斜線，盧卡斯勁射，皮球被費查沒收。29分鐘，陳肇鈞另一次斜傳，盧卡斯近門起腳，費查勉強撲出底線。
33分鐘，今次輪到盧卡斯左路傳地波，陳肇鈞撞射入網，「綠戰士」領先1：0。李嘉豪右路傳中，陳肇鈞跳頂入網，個人梅開二度兼為大埔贏到2：0，大埔半場領先兩球。
伊高沙托尼入世界波 帕特華維迪表現活躍
下半場換邊，大埔繼續強攻，陳肇鈞兩度埋門都越位在先， 帕特華維迪表現活躍。54分鐘，大埔換入鄭子森，收起尼高拉斯。68分鐘，伊高沙托尼左路盤球入禁區，右腳勁射遠柱，這球世界波為大埔擴大比分至3：0。70分鐘，華維迪右路底線前處理罰球，峇夏比同樣斜傳，加比爾門前加一腳，大埔贏到4：0。
戰至73分鐘，大埔手執四球領先優勢下，教入奇雲巴迪、林樂賢，收起主力盧卡斯及陳肇鈞。77分鐘，奇雲巴迪妙傳，帕特華維迪轉身右腳抽射，費查托出底線。
加比爾食詐糊 徐榮成座上客
在緊接的攻勢中，帕特華維迪右路開罰球，加比爾頭球攻門，費查在皮球過白界線前打出，經視像助理裁判覆核後，亦確認為詐糊。大埔最後4：0贏港會，續排在港超聯榜首。
今場入場人數為649人，陳肇鈞成為今場最佳球員。藝人徐榮在早上跑畢渣打香港馬拉松亦有入場睇波，其兒子徐朗今場為大埔的後備。
李志堅：上次吃過苦頭，今次知道點應付
在比賽結束後，大埔主教練李志堅表示，球員今場集中，「上次吃過苦頭，今次知道點應付」，並且改變陣式作新嘗試。談到尼高拉斯、鄭子森今場出任左閘，李志堅指前者狀態仍然飄忽，希望二人能盡快入局：「坦白講，呢個就係你而家見到嘅大埔。無辦法，你都要出個華人等佢盡快成長。」
被問到受傷的馬卡雷拿、韋法頓何時能復出，李志堅就稱未知，重申每支港超聯球隊正選只有6名外援：「講嚟講去外援都係出6個，你點樣多都係6個，唔係睇成，我買100隻鬼都係出6個人。」他表示，大埔沒有能力羅致具質素的華人球員，只能從外援入手補充個別位置：「而且亦都僧多粥少，唔係好多。」
被問今季入球數字減少 陳肇鈞稱沒壓力
陳肇鈞指球隊今場作出針對性部署，早前亦簽入新球員，強調贏波沒有報仇的感覺：「我哋去到季尾，每一場都硬仗。今日雖然4球，但唔代表啲咩。」
至於今季入球數字減少，陳肇鈞稱個人沒有壓力，認為球隊攻守順暢最重要：「最緊要係teamwork，唔會話爭邊個入波。入波當然越多越好，但係咪我哋場場入3球，俾人入5球呢？要講整體發揮。」