【獨媒報導】香港空手道形運動員劉慕裳日前在世界空手道聯盟公布的世界排名榜上升一位，首度榮登「世一」。正身處美國邁亞密的劉慕裳接受電台訪問，指成為「世一」就像在人生清單中劃上剔號，感到很意外、很開心。她認為「冇嘢冇可能」，寄語不要小看及局限自己﹐並指新一年希望放下執著，「呢個都係我2024嘅目標，喺生活之中搵到快樂，唔想所有事都係為咗一個比賽，唔係所有事都一定要做成點，只要盡力去做就OK啦。」
劉慕裳：這麼近那麼遠
劉慕裳去年在世界一級空手道超級聯賽（K1）連續七次闖入金牌戰，又於7月的亞洲錦標賽擊敗勁敵清水希容，首於女子個人形奪金，另在杭州亞運摘銅。至10月底，劉慕裳首次殺入世錦賽決賽，但最後不敵日本的大野暉，不過取得銀牌已創其個人及香港空手道歷來最佳成績。在最新世界排名中，劉慕裳以7,125分升上第一位，以60分力壓日本大野暉（7,065分）、清水希容（4,515分）及大內美里沙（3,990分）。
對於「世一」稱呼，劉慕裳略帶腼腆表示「好特別、好開心」，指在世界排名第二位置已有近兩年，有時距離「世一」只相差40分：「好似這麼近那麼遠咁，好似好近但其實又上唔到，一路咁近都上唔到。」
劉慕裳指在1月2日練習時有人通知她登上「世一」，「當刻我係呆咗」。她原本預計是在本月尾的巴黎站聯賽後才會更新排名，對突然登頂感到意外。她解釋空手道的計分方法只集中在最近兩年的比賽，「成日覺得世界排名係好多變數嘅一回事」，又認為成為「世一」的關鍵是今年的亞洲錦標賽奪金，「如果我攞唔到金牌，可能又係差少少上唔到第一」。被問到有否感到「世一」的壓力，劉慕裳坦言日本選手的表現很好，每次比賽都會打醒十二分精神。
Facebook圖片
目標成為Grand Winner 穿「金邊袍」參賽
對於2024年的目標，劉慕裳表明想成為「Grand Winner」，即在超級聯賽中爭取各分站合計最高分數。她解釋Grand Winner可取得「金邊肩帶」，明年就可以穿上「金邊袍」參賽。
劉慕裳在登上「世一」後在社交媒體發文感謝支持，並指要相信自己。她在節目上指：「自己都冇諗過，點會有可能成為世界排名第一，有咁多咁勁嘅人喺度，但原來真係有呢日出現。」她續稱，過去一直不是以世界第一為目標進發，但認為只要打好每場比賽，相關成就會隨之而來，寄語不要少看及局限自己：「呢個都係我早幾年嘅座右銘，就係『冇嘢冇可能』，點會冇嘢冇可能呀！」
她提到以前對自己要求很高易鑽牛角尖，令自己壓力很大，練習時更失去對空手道的樂趣：「可能嗰樣嘢唔影響勝負，但我會執著住做唔得最好咁就唔開心，覺得自己唔好。」她表示新一年希望放下執著：「呢個都係我2024嘅目標，喺生活之中搵到快樂，唔想所有事都係為咗一個比賽，唔係所有事都一定要做成點，只要盡力去做就OK啦。」
被問到何時會回港與家人朋友慶祝，劉慕裳稱因練習及比賽，暫未有歸期，更笑言：「咁我就要keep住打得好，keep住個ranking，等到下次返嚟香港仲可以慶祝，哈哈！」