經過多年嘅等待，運輸署上周五（10/5）終於將成本《運輸策劃及設計手冊》（TPDM）嘅最新版內容擺上網，畀公眾免費查閱。TPDM 係政府工務部門同顧問用嚟規劃設計道路同公共交通嘅重要文件，公眾理應能夠輕易索取了解知情。而家終於向公眾免費公開，增加透明度的確係進步嘅舉動，值得鼓勵。

需知道過往若想查閱 TPDM 嘅最新內容，必須向署方付款購買 CD-ROM（係啊，去到 2024 年都仲係用緊 CD-ROM），寄到嚟仲要搵部有光碟槽嘅電腦先可以開嚟睇。而每收一次更新，都要重覆上述步驟一次，非常唔方便。

留意返， TPDM 只有英文版。而進入網頁前亦會有個聲明，提示用家「由於時間滯後，某些部分可能在特定時間內不可避免地未能及時更新。因此，本手冊中所含的標準不應嚴格遵循，而應視為一個框架，以在其中行使專業判斷力，以達到最佳解決方案......並努力考慮來自利益相關者的意見。建議從業者在應用 TPDM 之前參考其他與其設計相關的出版物，如最新法規、實踐準則、指南、數據集等。」（ChatGPT 中文翻譯節錄）

《手冊》內容顯然滯後 署方須改革修訂與時並進

的而且確，現時 TPDM 內容出現明顯滯後情況，而署方內部同業界亦不時被內容中過時嘅標準框死，未能與時並進。例如現行 TPDM 並未將「公路」同「街道」嘅設計方針作出明確區別。即使兩者環境同需求迴異，街道設計仍然按照公路思維，圍繞車流量同行車效率作考慮，標準內容集中於工程設計同幾何尺寸，缺少對街道整體空間嘅一體化設計觀念。

同單車基建相關嘅部分都係一樣，大多仍照抄外國四、五十年前所訂立嘅標準。即使署方過去有局部檢討過單車安全相關準則，但多數設計和規定仍然深受「以汽車為優先」的觀念所影響，未能回應現今對創造人本街道嘅需要。

所以我地半年前發表嘅立場書，就建議署方參照國內外先進城市做法，將手冊分拆為《街道設計指引》和《主要幹線道路設計標準》，並且檢討 TPDM 的修訂周期和程序（包括成立一個負責定期檢討嘅外部專家委員會），確保內容與時並進。希望正在進行嘅《交通運輸策略性研究》，署方能夠對街道規劃同設計模式作出更深入嘅反思同研究，建立新一代嘅人性化街道設計。

運輸署《運輸策劃及設計手冊》網頁連結