11月2日，浸大文學院同社會科學院，喺坊間怨聲四起嘅情形下，進行咗一場學生諮詢會。美其名，與學生「交流意見」。
先不論諮詢會舉辦動機，作為關心自己學院被合併嘅學生，我很傻很天真咁相信有諮詢會係好事。即使有好多基本資料都冇好好交代清楚，我照忍，報咗名再算。
諮詢會當日，我帶住忐忑嘅心情步入會場。一入到去，望到一班副院長、系主任、教授喺齊度，而頭四行坐位寫住：「Reserved」禁止學生坐。搞甚麼飛機？後來得知，原來院長眼見關注組連日呼籲同學嚟諮詢會，所以「請槍」，發送電郵邀請教授為合併計劃站台。
第二件匪夷所思：在場只見文學院署理院長周偉立博士。另一位主角 — 社會科學院院長黎永亮教授，選擇以Zoom形式網上出席。既然都請得槍，相信唔會連親身到場嘅勇氣都無吧。
當我坐低後，正視前方大螢幕上顯示嘅句子：「會議期間嚴禁未經授權的拍照、錄音、錄影，以電子或其他方式公開」，瞬間勁有法庭既視感。再加上門口嘅十幾個保安，唔講以為梁游準備衝入會議廳。
流程一如預期，先由兩位院長讀PowerPoint，再到問答環節。今次個PowerPoint同上個月只供小部分校友查閲嘅嗰份差唔多，唔同之處係「新學院」候選名稱，由三個減至兩個（掌聲鼓勵），同埋加入其他歐美大學都係「文科同社科為同一個學院」嘅例子。
嗰堆歐美大學例子，以哈佛大學為首。好奇心驅使我上網搵一搵，先發現差啲俾人搵笨。哈佛大學嘅文理學院（Faculty of Arts and Sciences），下設藝術與人文學部、理學部、社會科學學部等，含蓋文、理、社、工科。學系有：哲學系、英語系、法律系、經濟系、音樂系、數學系、物理系、人類學系、天文系、工程系等。同浸大兩院合併計劃100%係兩回事，呢個例子絕對有誤導性。我就上述發現提出第一條問題：「點解可以舉出零可比性嘅案例作例子？係咪覺得坐喺度嘅教授、學生唔識得fact check？」
到場學生大概有四至五十人，提問環節時我第一個舉手發問，總共提出三條問題。第二條，我就合併計劃嘅時間性提出疑問。本身兩院合併計劃份action plan嘅進度已經非常緊張。Consultation Meetings for Students寫咗係9月至10月初，但而家已經延遲至11月。但合併計劃喺11月27日提交至教務議會，12月12號提交至校董會審議似乎不變。「既然合併係一個長遠嘅決定，係咪必須今年合併？會唔會考慮暫緩合併？」
第三條問題，我希望邀請在場同學做個小小表態：「諮詢會一直強調學生最重要，不如問下坐場學生意見，有邊個係支持合併？有嘅不如舉隻手嚟睇吓？」民意顯示，全場零人支持。「見到係無學生支持合併，希望兩位院長認真考慮一下學生意見。」至此，發問完畢。黎院長緩緩講咗句：「我見到Zoom有六個人舉咗手支持。」引來在場人士發笑。認真一望，Zoom舉手嘅分別係Dr A、Prof B、Prof C 等 （唔開名），全部皆非學生。對此回覆，我亦只能搖頭苦笑。
接下來嘅時間，我都再無機會問問題。一嚟，請槍成效顯著，院長每答幾條問題，就有位教授出嚟演講，勸導同學支持合併、一齊建設新學院，拖時間一絕。二嚟，未發言者優先。好開心唔少同學都問咗有深度嘅問題，例如：「到底反對阻力要有幾大先至會暫緩合併？」、「合併計劃係咪促進跨學科發展嘅唯一方法？」等。可惜嘅係大部分學生嘅問題，都同我嘅問題一樣，無得到直接回應，等到嘅係兜圈再兜圈。校方甚至公然推卸責任，形容合併係「兩院老師嘅共同願望」，叫同學問返自己老師點解要合併！
時間尚餘十五分鐘，周院長出嚟話呢個課室即將有下一堂，所以我哋要早啲完結。我愣了，所以兩個院長辦公室淨係book到一個得兩小時可用嘅演講廳？仲要遲開始、早完結？過程不斷喺度揼波鐘？咁就係做咗諮詢？
總總一切，我接受唔到。
當校方宣佈完結時，我企起身、行出去，提出我最後嘅疑問：「請問會唔會有第二場學生諮詢會？」有兩個保安即刻行到我前面。「黎院長你代表曬所有教授？而家係咪所有教授都同意合併？」學生嚟呢個諮詢會係想請教兩位院長，你叫佢哋問番自己嘅老師？
「有位教授叫大家面對現實，不如依家再舉多次手，有邊個同學係真誠支持合併嘅舉手？」再次無人舉手。「唔同意嘅舉手？」大部分同學都舉起咗佢哋嘅手。「我都請在座各位教授，特別係兩位院長，睇清楚同學點諗，我哋真係唔想就咁合併⋯」說話未講完，周院長就咁離開會場，其他教授亦相繼離場。
事後諗返，我唔明白當下點解我要「發出最後的哮聲」。明知大家都係無動於衷，嗰時我究竟期待緊啲咩？我唔知，可能只係因為唔甘心。唔甘心明明論述贏盡，但仍然咩都改變唔到。或者係因為我對大學二字尚有期望，以為嚟到諮詢會，大家會講道理、認真討論，但結果只係俾人玩咗轉，自己默默帶住失望、憤怒同無力感離開。
一場學生諮詢會：學生無得坐前排座位、兩個院長只有一個到、無正面回應過學生訴求、特登揀個得兩個鐘頭用嘅場地。
多謝浸大向世界展示一個諮詢會嘅反面例子，無誠意、無誠信、無尊重，無考慮過學生意見。第二日好似冇事發生過，繼續衝紅燈死推合併。咁諮詢嚟做咩呢？呢場假諮詢大龍鳳，恕學生不敢苟同。
作者簡介：
作者戴嘉平是浸大政治及國際關係學生；浸大文院社科院合併關注組成員；浸大學生會前外務副會長（2023）
（本網歡迎各界投稿，文章內容為作者個人意見，並不代表本網立場。）