（編按：2014年，香港爆發一場史無前例、歷時79天的佔領運動。十年過去，《獨媒》製作一系列報導，與讀者回顧雨傘運動的重要時刻，追蹤當中的關鍵人物今日處境為何，以及官方、民間分別如何述說這場影響深遠的社會運動。）
（獨媒報導）對比十年前的照片，當年的「佔中三子」之一、前中大社會學系副教授陳健民外表變化不算大，只是多了一點白髮，眼鏡框由細長方形變成圓形；但他的人生早已和香港社會一樣，發生翻天覆地的改變。由大學教授變成階下囚，再由香港居民變成台灣公民，如今陳健民是中央研究院的研究員，正準備撰寫一本已「遲到」十年、有關傘運歷史背景與影響的書籍。
「對今日嘅年輕人嚟講，（雨傘運動）一定係好古代嘅事情。」陳健民感嘆：「但對我嚟講，呢件事係未完結嘅。」初到台灣時的無力感經已隨時間流逝而褪去，65歲的陳健民現在已卸下教席，卻仍舊忙碌。在繼續研究、不斷寫作、接受訪問之間，他慢慢摸索到自己的位置：「等大家可以保存到香港嘅記憶，同埋反映真實香港嘅情況，我覺得呢啲係我哋作為在海外香港人應該要承擔起嘅責任⋯⋯呢幾樣嘢（聆聽、寫作、做研究）其實就係我可以為香港做嘅事，同一時間都係為台灣做。」
2014年8月31日，陳健民在「831公民發聲集會」上。（資料圖片）
＊＊＊＊＊
佔領情緒：從難以磨合到退場
9月的台北氣溫和香港差不多，但沒那麼悶熱。陳健民比訪問時間提早20分鐘到達，以便先處理手上的工作——這天是星期日，但他有三個訪問、一個講座，幾日後還要飛到日本，出席有關傘運的研討會。他略帶歉意說：「好多外媒（找我做訪問），只不過我做唔到。」
香港社會近年經歷了反修例運動、《國安法》落實等大事，但陳感覺雨傘運動十周年仍然備受海外媒體關注，有電視台在半年前已經開始拍攝特輯。那有其他香港媒體找你嗎？陳搖頭：「所以我一定要應承你哋。」
對他而言，十年似是眨眼便過去，儘管有些細節經已忘記，關鍵的事情和情緒還是記得清楚。例如，「佔中三子」另外兩人當時的狀態：朱牧（朱耀明）一直處於憂鬱狀態，含著眼淚坐在佔領區，擔心著六四事件重演；戴耀廷則情緒起伏很大，上一秒仍在興奮和感動，下一秒已經在崩潰大哭：「佢有時候會帶住好強烈嘅希望，好樂觀，有時候就跌到一個好深嘅沮喪裡面。」
2014年9月27日，公民廣場外。（左一至三：陳健民、榮休主教陳日君、戴耀廷）（資料圖片）
一夜之間，「佔中三子」主導了一年多的佔領運動變成由學生帶領。那麼，三人應該要退場離開，抑或留下來？陳健民最初也沒有答案。他努力控制著情緒，每天跟學生領袖商討、磨合，但一切並不容易：「學生領袖唔難溝通，但佢哋背後嘅同學，想法同佢哋（學生領袖）本身有好大差距，所以佢哋自己其實都係不斷反反覆覆。」
「磨合唔到，我哋都唔知道同緊咩人磨合。即係今日有協議，聽日返嚟，佢已經推翻尋日同你傾嘅事，因為佢當晚同學聯嘅其他院校嗰啲年輕人代表傾完之後，就會全部改變。」
「直到有一日早上我話，我唔得啦，我真係覺得我自己嘅情緒唔得啦。即係，你覺得你再無任何能力去掌控，或者影響局面⋯⋯我就走咗去金鐘嘅麥當勞，食咗一個熱香餅早餐，飲一杯奶茶。呢次係佔領以來我唯一真真正正坐落嚟食早餐嘅一次。」
「食完早餐之後我覺得，差唔多了，我都要退場了。我一直都反對三子退場，我覺得要支持學生⋯⋯但係當政府、學生唔願意對話，我覺得我哋冇任何角色，學生已經行咗佢哋自己嘅方向，我哋其實已經冇任何影響力。嗰時大概係佔領之後一個月左右。」
2014年12月3日，中區警署外。（左一至四：朱耀明、戴耀廷、陳健民、陳日君）（資料圖片）
傘後反思：從難以書寫到理解本土派
2014年12月3日，雨傘運動第67天，戴耀廷、陳建民和朱耀明連同榮休主教陳日君到警署自首，但未即時被起訴；2014年12月11日，雨傘運動第79天，金鐘佔領區被清場，雨傘運動「閉幕」。
和許多香港人一樣，陳健民在傘後陷入沮喪：「雖然我研究社會運動咁多年，我唔會好似當時黃之鋒（時任學民思潮召集人）咁講，成個運動係無功而還。我唔覺得係咁，我理性上知道民主運動係一個好長嘅戰爭，呢次只係其中一場戰役⋯⋯但係情感上嚟講，都係無辦法避免喺嗰種氛圍裏面。」
2014年12月11日，金鐘佔領區清場日。（資料圖片）
特別是接續而來的退聯行動及本土派冒起，最初讓陳健民沮喪之餘亦難以理解：「點解要咁惡毒去攻擊泛民？你需要一段時間去慢慢理解背後嘅原因。」陳說，後來其中一個很幫助到他改變看法的人，是梁天琦（時任本土民主前線成員）：「我覺得佢係好真誠嘅本土派，佢自己都有好多反思⋯⋯我都承認，如果新一代走向本土，其實你完全應該要去理解。」
「其實佢哋（本土派）最重視嘅係身份認同問題，我可以體諒。只係喺當時嘅情緒裏面，會受到好大干預。」作為運動中重要的一員兼社會學學者，陳健民當時正在撰書：「我主要想講，點解我哋要做一件咁樣嘅事情、每一步有乜嘢哲理喺背後、點解要做商討日、點解我哋覺得可以同北京談判？我想好詳細咁將呢啲理念寫出嚟。」
全書分為十個章節，但他寫好首三章後，在第四章停了下來：「第四章係寫商討日背後嘅理念。當時我哋用咗差唔多超過一年時間搞商討日，我哋好睇重呢個部分，因為我哋覺得民主唔只係投票選舉，需要有對話去形成共識。但喺傘後，其實基本上民主運動嘅內部都冇乜商討嘅精神，大家互相攻擊得好激烈，本土派同舊社運泛民之間有好多爭執、互相唔理解，令我覺得當時嘅心情係，我寫唔到嗰一章。」
2013年6月9日，首次「佔中商討日」。（資料圖片）
2019年4月9日，佔中案九名被告在裁決前見記者。（資料圖片）
出獄離港：無力感與家人之間
結果他一停筆就停了十年。
2018年11月，陳健民主動辭去中大教席，為入獄做準備；2019年4月，他被裁定煽惑他人犯公眾妨擾罪及串謀犯公眾妨擾罪罪成，被判入獄16個月（註1）；2020年3月，陳刑滿出獄，獄中投稿給報章專欄的書信結集成書出版；2021年8月，陳離港赴台，出任國立政治大學社會學系客座教授。
陳說最初離開香港，是想靜觀其變：「我離開之前冇申請移民，我只係嚟做一個訪問學者，我乜都冇執就走。」抵台首年，他對於去留處於搖擺之間，也有強烈的無力感：「 我連《健民書房》都唔知道要點做，你喺一個安全自由嘅地方，憑乜嘢去鼓勵香港人？」
《健民書房》是陳健民在出獄後開設的YouTube頻道，至今仍在運作：「我做《健民書房》嘅初衷，係想介紹一啲書或者歷史故事，講一啲人喺困難裏面都能夠保持韌性。當時我喺香港，我覺得我好有動力去做，一個星期出兩、三本書，有人叫我唔好出咁多，睇唔切，我先拉慢咗。但嚟到之後，我完全一本書都出唔到。」
但考慮到家人，他最終申請成為台灣公民，至今未有打算回香港：「（如果回港）我會令到屋企人每日都過得唔好。我離開監獄之後嗰一年，每日都被人『鵝』，『你仲喺度做乜？你啲朋友被人拉緊！』屋企其實係好煩惱，每日都好想你走。」
2020年3月14日，陳健民刑滿出獄，近百名親友及支持者到西貢壁屋監獄外迎接。（資料圖片）
在台定位：聆聽各方、書寫記憶、建立香港資料庫
離港兩三年後，陳健民也慢慢摸索到自己在台灣的定位——聆聽、寫作、研究都是他可以為香港做的事，同時也是在為台灣。
「呢度（台北）好好，俾咗我一個機會可以聆聽到好多唔同香港人嘅聲音。有啲係來自香港、唔會喺媒體浮現出來嘅聲音，有啲係海外港人。兩邊群體其實有很多誤解，有時會有互相指責，但是我可以聽到好多唔止於表面嘅聲音。我覺得好重要，可以幫助我將來寫作時去呈現到兩邊嘅真實聲音，促進一啲溝通。」
陳還有許多大大小小的寫作計劃。例如，他和另外三位香港學者，張燦輝、陳祖為和邢福增，把各自在大學的「最後一講」合編成書，料今年內出版；另外，他持續為不同的書著寫序或作沙龍評論：「台灣已經成為一個好重要嘅華文出版中心。我有好多機會去睇不同書稿⋯⋯對我嚟講，我覺得一直可以掌握住嗰個脈搏。」
陳健民亦在今年6月離開教學工作，現時於中研院當研究員：「我哋建立緊一個香港研究計劃，會有一個資料庫出現，希望可以幫助學生、學者持續研究香港，都有啲資料同書俾大家保存到香港嘅記憶。」他認為，這是海外港人該承擔起的責任：「既然喺呢個地方，有學術機構支持我，我覺得做呢件事好有價值。」
陳健民說，現在經已準備好，將重新撰寫那本擱置了十年的書：「其實係借雨傘運動，講成個香港嘅民主運動前世今生，所以我話（傘運）未完結，就係連我這個歷史任務都未做好。」（2024年9月，攝於台北街頭。）
給留港者：做微小而有意義的事
當年的「佔中三子」中，陳健民和朱耀明現在身處台灣，而最先提出「佔中」的戴耀廷則涉民主派初選案，被控串謀顛覆國家政權罪，身處香港的監獄已逾三年。陳健民不諱言擔心這位昔日戰友：「我覺得會判佢好長（刑期），可能未來10年都喺監獄裡面⋯⋯我相信，佢會擔心家人能否承受到呢種苦難。」
「佢過往係一個好樂觀嘅人，喺佔領運動過程裡面，其實佢冇做好大嘅心理準備要坐監，因為佢好相信香港嘅法律。佢相信，香港嘅制度唔會隨便被政治干擾，呢個係佢好強嘅信念，同我有好大分別⋯⋯佢亦都好相信大學，唔覺得需要辭職，佢覺得大學係唔會隨便可以炒一個有終身合約嘅人，我同佢都有終身合約，喺大學係好難炒嘅，但係我會辭職，佢唔會辭職，大家好唔同。」
「佢原本對於香港嘅制度同法治有好堅定嘅信心，所以對佢嚟講，睇到咁樣係一個好大嘅衝擊。但佢好叻，我相信佢嘅宗教信仰令佢有足夠力量去面對呢啲逆境，只要佢嘅家人都能夠同佢一樣堅強就可以。唔容易，同佔中唔同。」
2021年3月，戴耀廷因初選案還柙獄中，須坐囚車到法院。（資料圖片）
對於其他仍在香港的人，有沒有什麼話想說？「留下有留下嘅意義，離開有離開嘅意義，自己選擇一個位置，去做一啲微小而有意義嘅事情就得。我覺得，留喺香港嘅人能夠保持著心志同希望，係最重要嘅。但係點樣可以保持呢種心志同希望？有時候唔能夠靠個人嘅意志，都需要圍爐，我覺得係要維持著嗰種人與人之間嘅聯繫，大家可以互相去打氣。」
註1：「和平佔中」發起人戴耀廷、陳健民、朱耀明及另外6名參與者，在2019年4月被裁定串謀公眾妨擾、煽惑公眾妨擾等罪名成立。法官陳仲衡在判詞中指，雖然「公民抗命」的概念在香港社會受認可，但並不是面對刑事控罪時的抗辯理由。
2024年9月，台北一個關於傘運的展覽上。