圖、文：kyu
住大嶼山嘅人有一樣嘢叻，就係唔會暈車浪。
平時坐巴士訓練有素，每個彎位每個急煞，無論點擢點揈，都可以繼續玩電話、繼續瞓覺。
每次有朋友要搭巴士入大嶼山玩，都要事先提醒佢哋，唔好食咁飽同唔好玩電話，容易暈車浪嘅帶定個袋啦！
如果佢哋問搭巴士要搭幾耐，會先反問佢哋咩時間搭巴士。
例如東涌去大澳，巴士公司寫全程行車時間52分鐘，但朝早9點前同夜晚9點後只需要35至40分鐘。
又例如梅窩去大澳，巴士公司寫全程行車時間45分鐘，但試過朝早7點前同夜晚10點後搭，只需要30分鐘。
當然，少人上落車就一定用少咗時間，可以快啲到站，但坐上去個人好似識飛咁嘅速度又真係呃唔到人。
「日本有秋名山車神，香港都有大嶼山車神。」
作者簡介
土生土長大嶼山廢青，除咗讀書時期，基本上無離開過大嶼山生活。比起去行街、唱Ｋ、睇戲，情願喺大嶼山游水、釣魚、打麻雀。適逢疫情做咗全職廢青，而忽發奇想地開始畫關於大嶼山嘅大小故事。