二零二一年，講起「補鞋」，有幾多年輕人會知係咩一回事呢？
小記喺佐敦游吓游吓，游到去「華藝補鞋配匙」，竟然見到一班後生仔圍住老闆黃師傅，話要跟佢學嘢。咁有心？就睇吓佢哋學咗啲咩先！
小記︰「點解咁僻都識得上嚟o架？」 後生仔︰「學校要做社區維修個project，老師介紹咗呀樂我識，跟住佢就搵到呢間修理舖。」
小記︰「帶咗啲咩上嚟整？」 後生仔︰「一對我好鍾意嘅皮靴，用第一份Part-time錢買o架，成千五蚊，但着得多有窿……好彩黃師傅夠犀利，三兩下就補好喇！」
小記︰「有無啲咩想同黃師傅講？」 後生仔︰「師傅好謙卑，份人無架子，默默做事，但問佢咩都樂意回答，又會分享好多維修護理小知識，上嚟真係長知識了。我覺得呢啲細鋪其實好可貴，特別係對住一啲爛咗又唔捨得丟嘅嘢，修理師傅好似賦予佢哋第二條命噉，真係要講聲多謝呀。」
問完後生，我哋又同黃師傅傾吓計先～
小記︰「師傅師傅，你做咗幾多年呀，係點樣入行o架？」 黃師傅︰「最初就報工聯會啲課程，學咗好多理論，然後咪去朋友間鋪喥幫手，一路做一路學。以前喺上海街做咗十年，而家搬嚟佐敦七年，一做就十七年喇。」
小記︰「有無咩特別嘅補鞋技巧傳授畀啲細呢？」 黃師傅︰「熟能生巧啫，要自己鑽研多啲囉，有時啲壞法成世人都未見過，就要試多啲摸多啲噉啦。」
小記︰「又有無啲咩同啲後生講呢？」 黃師傅︰「雖然無乜可能，但你問我，我想多啲人入行囉。以前個社會窮，啲嘢爛咗會諗住整咗先，而家有錢，咪丟咗佢即刻買過囉。仲有好多o靚仔覺得要掂到人哋隻鞋，污糟邋遢，都唔會想入行啦。如果有人想學，我好願意教呀，讓埋間鋪都重得！本身做多幾年都打算唔做喇。」
