從來都話香港係「華洋雜處」嘅地方，無論開埠初年嘅歐美白種人，定係近年嘅亞非黃種人，你你我我已經融入咗社區——社區要健康成長嘅話，又點少得每一個人呢？
今期跟住朱慧芳議員，走入佐敦，同南亞人一齊生活。
漫遊廣東道同炮台街，會發現除咗車房同玉器店，仲多咗好多寫古怪文字嘅舖頭。（準確嚟講係印度文、巴基斯坦文或者尼泊爾文？不過香港人都唔太識分……掉返轉頭諗，佢哋睇中文，應該都覺得好古怪。）舖頭間間唔同，有理髮店美甲店，又有士多超市，仲有餐廳小食店。除此以外，西貢街附近有間「多元文化活動中心」同「家居中心」。而再睇吓呢區嘅小學，好多學生都係南亞裔面孔。呢喥有基本嘅生活商品同服務，又有康樂福利設施，已經係稍具規模嘅南亞社區了。
行完街再上樓，又會見到呢一帶好多大廈都可以自出自入——大廈無業主立案法團，地下無大閘，自然都無保安。每幢都有類似問題，樓梯放滿雜物，牆身剝落，電錶外露，電線交叉盤旋，天花板滲水，通道亦唔見得乾淨。呢喥好多南亞人住，有單身男士，亦有一家大細。點解住喺喥，平囉，租金平呀……語言不通，加上左鄰右里都係租客，居民都唔會有心去處理大廈問題，環境就係噉愈嚟愈差……
有方法令居民生活得更好嗎？朱議員噉樣回應︰「好難直接有效處理到咁多問題。區議會、民政處、食環處等等部門都有跟進，但一嚟類似嘅樓宇問題太多，二嚟亦好難搵到負責人，只能夠巡多啲樓，不斷提點……不過現有嘅社區設施，都可以重新規劃分配，例如英皇佐治五世公園足球場，又可唔可以劃分時段出嚟做板球場呢？畀啲細蚊仔放學後有地方去，點都係好事吖。」
佐敦係你嘅，係我嘅，歸根究底係大家嘅。佐敦嘅未來，又可以朝住咩方向發展呢？