撰文：Louis Lee
文字編輯：麥子
「未預計這一秒會這麼震撼我」，ViuTV的《大叔的愛》改編自日本同名BL喜劇，並由人氣大熱的MIRROR成員Edan呂爵安、Anson Lo盧瀚霆，以及成熟型男黃德斌主演，自然引來大批粉絲追看。而片頭曲《突如其來的心跳感覺》近日也成為熱門歌曲，登上KKBOX本地單曲週榜第一位。
《突如其來的心跳感覺》究竟是如何創作呢？這次我們很高興能訪問到歌曲的填詞人T-Rexx，他過往創作了MIRROR《One And All》、許廷鏗《無力感》、吳林峰《你是萊特》、Fatboy《Lady Killa》等作品，以下就讓他向大家講解一下此曲的創作過程。
問：創作《突如其來的心跳感覺》時，有睇過《大叔的愛》嗎？
答：我寫詞之前，有主動睇過日版《大叔的愛》去了解故事情節、重點同細節。
問：覺得寫劇歌同平時寫歌有咩唔同？
答：因為今次係我第一次寫劇歌，所以好難分享寫劇歌同平時寫歌有咩唔同。但今次寫《突如其來的心跳感覺》的確用咗好多時間去做資料搜集（煲劇）、思考歌詞用咩角度或角色作為切入點，同歌曲氛圍同歌詞主題嘅配搭。不過，今次我更重視嘅係易入口、易入耳同易上腦，希望詞同首歌融為一體之餘，亦同部劇融為一體。
圖片來源：《大叔的愛》劇照
問：本身平時有冇接觸性小眾？寫歌時有無向佢哋借鏡，或者要搵下資料？
答：本身我都有朋友係性小眾，始終我結識朋友係講投唔投緣唔係睇性唔性小眾。我寫呢首歌嘅時候冇點諗特別向「性小眾」借鏡，反而我想突顯返性小眾同性大眾（？）共通之處 —— 就係愛，特別當人面對意想不到嘅愛情，點樣由錯愕、懷疑到接受。我相信呢種感覺應該無論咩「眾」都可以感應到。
圖片來源：《大叔的愛》劇照
問：有咩說話想同性小眾朋友講？
答：其實我真係唔覺得我哋大家有咩唔同。
就如《突如其來的心跳感覺》的歌詞所説：「若順從直覺／可有對或錯」。從《大叔的愛》片頭曲到劇集本身，創作團隊其實正正提醒了大家，不管喜歡的是同性還是異性，大家都是從愛出發。
延伸閱讀：如果愛能高歌 — 10首不能錯過的性／別小眾廣東話K歌
近年來，很多本地歌手都會出席例如PinkDot等活動，公開表態支持性／別小眾；加上不少歌曲MV和電視節目亦以性／別小眾為題材，相信這些作品均能令更多人關注相關議題。但同時，我們也要記得，性／別小眾平權仍有一段很長的路要走。