（獨媒報導）「$自$由」街頭塗鴉創作者陳勁輝（Mick）上月被捕後，今午到警署報到。他獲告之將再度被起訴刑事毀壞罪，合共20項控罪，並於3月5日上庭。Mick向《獨媒》表示自己屬「重犯」，會尋求法律援助，亦有入獄的心理準備：「佢點樣我都唔樂觀㗎啦，我又冇錢俾佢罰，咁樣入去坐一坐又唔使罰錢，可能都會去坐一坐，真係零蚊（積蓄）呀大佬。」
2023年，Mick稱因本港經濟下滑，承受很大壓力，於全港多處塗鴉一個由「自由」及「$」符號組成的圖案，以表達經濟自主的重要性。他承認20項刑事毀壞罪，最終判12個月感化令及罰款約2.65萬元。而在今年1月農曆新年前，Mick再次被捕，警方向《獨媒》稱接報區內有多處建築物外牆被塗污，經深入調查後拘捕兩名本地男子。
資料圖片
稱再被檢控不感樂觀 打散工難搵食、保釋用盡積蓄
Mick今午到中區警署報到，約兩小時後步出警署門口。他稱警方新增起訴他6項刑事毀壞罪，共檢控20項控罪，大部份涉及在中上環區的塗鴉。Mick直言不樂觀，如果入獄便會將工作室鎖匙交由朋友管理：「其實我都冇預最壞打算，我恨不得佢一槍打死我，夠皮㗎啦基本上。」
Mick提到，上次被法庭罰款後，剩餘的儲蓄不多，守行為亦令他難以尋找工作，慨嘆「都唔係成日有工開，都係啲散工」。他又指，因做勞力工作經常被「cut鐘」甚至「走數」，原本盼望靠自己一技之長，在新年賣利是封等賺錢過年，惜因被捕影響計劃，今次保釋亦令他近乎用盡積蓄：「真係好難搵食呀⋯⋯餐搵餐食餐餐清」。
“$$ Will Always Love You”Mick’s solo exhibition
未懼創作「$自$由」：對我嚟講係美好東西
Mick目前正於深水埗大南街的Parallel Space舉辦個人展覧，當中多幅作品繼續以「$自$由」為創作基底。他說未懼創作「$自$由」，但未來會考慮在其他媒介繼續創作，例如在Patreon發佈作品增加收入：「叫我就咁寫我就唔會驚，本身對於我嚟講係美好東西嚟㗎嘛，我先至會創作佢出嚟。」