（獨媒報導）不少港人趁聖誕和年末外遊，但今年在香港的太平山街也有「另類風景」。由周五（27日）起至明年1月2日，逾10間小店響應跨年活動「太平山街 閱讀香港另類風景」，展示逾20間獨立出版社的書籍；市民及遊客可遊走不同小店中發掘心頭好，再到太平山街6號購買。
「太平山街 閱讀香港另類風景」由獨立出版社藍藍的天主辦，在活動首兩日，卻有多名警察在場巡邏，又駐守街口截查市民。負責人伍先生表示對活動影響不大，「我哋都係自己做自己嘢」，希望讓大眾認識大書店以外的「另類」出版書籍。有市民及商戶則對警方駐守感不解，認為使街道氣氛變得「緊張」。
負責人：店舖均遵守法例 對活動影響不大
《獨媒》今早十時半到場視察，活動尚未開始，附近至少有三輛警車，十多名軍裝警員和便衣警員分別駐守各個街口截查市民。伍先生指店舖皆遵守法例，「所有嘢擺入去都喺鋪頭入面」，沒有在街道放置物品，故認為影響不大。伍先生亦表示，縱然地方淺窄，店內擁擠，但客人仍十分體諒，互相禮讓，「會話『你睇完先再到我入去』，喺度傾吓偈，連唔識嘅都會傾吓偈，到有位就入去，唔想阻住人。」
活動選址太平山街，伍先生解釋皆因其文青氣氛，「所有鋪頭嗰style係夾到嘅，所有嘢係自然融合咗喺度」，亦指閱讀不限於一間書店或傳統書店，故萌生在此舉辦街頭活動的想法，「香港應該要有呢樣嘢，雖然困難而家唔係咁易做到，但我覺得都要喺度維持住，喺有限嘅資源、有限嘅能力同有限嘅允許度之下，我覺得都要存在喺度，起碼畀人知道有呢樣嘢」。
而活動名為「另類風景」，伍先生認為香港擁有很多「另類」的東西，每人也有不同的詮釋，他希望透過活動讓大眾認識大書店以外的「另類」出版書籍，「一個地方有文化、有知識同埋有閱讀、有書本一定會衍生好多其他另類嘅嘢出嚟」。
市民及商戶均對警方駐守感不解
其中一間參與店舖是Expresso Remedy，職員阿豪形容太平山街商店猶如鄰里（neighbourhood），亦希望使街道興旺起來，「各自企喺自己崗位默默付出」，而一同推廣閱讀風氣亦為好事，店內展示書籍五花八門，但他不解為何活動會引來「迴響」，多名警察駐場「變相成條街氣氛都幾緊張」。
第一次到訪太平山街的Jackie表示，這次活動提供多一個媒介更多人認識本地書籍，包括本地人及外國人，「畀我睇到平時喺出面比較大型嘅書店好少見到呢啲書，可能有嘅，但未必highlight，所以我哋未必知，尤其本地作家。」而太平街不同類型的小店亦有參與展示書籍，她認為能鼓勵人們多點行逛這條街道，「本地或者local嘅店嗰boundary 會強啲，即係大家都會互相幫助嗰個氣氛」。她明白在這裡舉辦活動的困難，「多謝大家堅持，有小小罅隙都唔好放過囉我哋。」
Jackie
而居住附近的Apple則指香港雖空間有限，但有各種類型的書籍，並形容這裏是「一個可以唞氣嘅地方」，因現在難以找到類似活動，很多地方不會再售賣同類書籍，十分珍貴，「證明仲有心跳聲」，同時，她亦不解為何警方長期在附近巡邏，「一個咁安全嘅地方點解仲需要咁多警察？」
太平山街 閱讀香港另類風景
日期：2024年12月27日至2025年1月2日
時間：11:00 - 20:00
地點：太平山街6號