最近三隧分流方案出爐，政府將於今年八月西隧專營權屆滿後，首先落實「633」收費安排。而年底前，收費將進一步改為「644」，並且引入「不同時段不同收費」，喺繁忙時段收取較高嘅隧道費。方案引起唔少討論。有人覺得多此一舉，但亦有人認為安排可取。今日我哋街道變革就同大家解構一下背後嘅理念，同埋講吓我哋嘅睇法啦。
三隧分流嘅安排，社會已經討論咗好多年。早年有聲音要求政府回購西隧，到 2018 年政府曾提出補貼西隧減價、紅隧同東隧加價嘅方案但失敗，直至今年西隧專營權終於屆滿。政府啱啱提出嘅最終方案，唔只以隧道間嘅收費差額達致分流，亦以時段間嘅收費差額，減少駕駛者喺繁忙時段揸車過海嘅誘因。
引入「擠塞徵費」以效率優先 還路予公共交通同「搵食車」
眾所周知，路面空間係緊絀嘅公共資源，而塞車就係「求過於供」嘅情況。當供應特別有限（如過海只有三條隧道路線），又或者需求過多（如繁忙時間）嘅時候，塞車嘅情況就特別嚴重。隧道費作為道路徵費嘅一種，目的就係透過「用者自付」原則，令駕駛者承擔返自己揸車所帶來嘅塞車同道路維護等社會成本。
但年尾實施嘅「不同時段不同收費」安排，更加係將「用者自付」嘅概念進一步實踐，將擱置多年嘅「擠塞徵費」概念引入隧道收費框架。[1] 需知道私家車量多卻效益低：三隧繁忙時間嘅車流當中，六成係私家車、卻只佔過海載客量約兩成。相比下，僅佔車流 8% 嘅巴士係載緊高達八成嘅過海客量！[1] 繁忙時段提高收費（即係擠塞徵費）就係想特別鼓勵私家車主避免繁忙時段過海、又或者改以公共交通出行，將過海路面優先權讓返畀公共交通同商用車輛，減少交通擠塞同空氣污染情況。
三隧分流當然仲有好多其他考慮因素，例如隧道本身同連接道路嘅容量、日間使用需求同外圍交通情況嘅變化，以至實際收費操作等。喺現時傳統「人手收費亭」及「快易通」並行下，實施「不同時段不同收費」會有一定難處。所以呢個方案亦只係喺「易通行」（即以繳費貼遙距繳付隧道費）擴展至所有過海隧道後先至實施。未有繳費貼嘅車輛則採用自動車牌識別技術偵測車輛駛經收費隧道 ，然後向登記車主發出繳費通知。
新方案仍有隱憂 徵費收益應用以改善公共交通
擠塞徵費 (congestion charge) 喺倫敦、新加坡、米蘭同斯德哥爾摩等地已以不同形式實施多年，而美國紐約市亦最快會喺下年實施。倫敦政府 2003 年起對進出市中心範圍嘅車輛實施擠塞徵費，一年後塞車情況下跌三成，空氣污染減少四分之一。2007 年，斯德哥爾摩政府亦開始喺市中心外圍實行擠塞徵費，進出車流量下降兩成，塞車情況改善五成。[2]
雖然擠塞徵費被視為最有效嘅交通需求管理 (Travel Demand Management) 方法之一，但三隧嘅新方案亦仍然存在隱憂。首先，週末一般同繁忙時段嘅收費差距不足 ($20 vs $25)、週末繁忙時段亦比平日嘅收費平起碼三份一 ($25 vs $40-60)。當有比較之下，可能變相鼓勵駕駛者假日揸車出行消遣。再者，公共交通喺新方案下仍然需要付費，而且小巴嘅收費更加將由現時 $10 增加到 $50，抹煞過海小巴嘅生存空間。
歸根究柢，要推動駕駛者改變出行習慣少啲揸車，政府需要提高駕駛嘅成本之餘，必須認真改善公共交通嘅運作同體驗，令路面公共交通都比私家車更快捷、舒適同具吸引力。近年巴士同小巴嘅經營幅度收窄同成本上升，服務可靠度以至乘客體驗都大打折扣。政府應該仿效其他實施擠塞徵費嘅城市，將徵費帶來嘅額外收益全部用作改善、甚至補貼公共交通服務，並且設立更多巴士專用路面，令普羅大眾（尤其新界居民）都有比私家車更吸引同靈活嘅出行選擇。
文 / Maximilian Li、Justin Yim
（本網歡迎各界投稿，文章內容為作者個人意見，並不代表本網立場。）