【獨媒報導】民政事務總署早前向各區額外撥款100萬元，用作設置打卡地標或舉辦活動。西貢民政處建議在區內設內地動漫「乖巧寶寶」立像，惹來市民質疑。西貢區議會轄下的「提振地區經濟專責工作小組」主席、民建聯區議員陳權軍今早在電台節目為「乖巧寶寶」平反，他質疑坊間「好似講國內嘅，啲人就特別斟酌」，「我都唔明點解」，他又指西貢區議會大部分「一講就知係咩」，相當受議員間歡迎，在通訊群組的「乖巧寶寶」即「彈來彈去」反應熱烈。陳權軍更叫電台主持應該「提吓我哋應該要搞咩」，主持笑言「你先係區議員喎」，陳即稱「香港係大家㗎嘛，唔係話『喂一個區議員可以搞得掂』」。
民建聯陳權軍今早在商台《在晴朗的一天出發》節目為「乖巧寶寶」進行平反，他稱乖巧寶寶「都係好多人用緊嘅嘢嚟㗎嘛」。他對於坊間反對和質疑聲音感到「好奇怪囉」，「一講乖巧寶寶，好似講國內嘅，啲人就特別斟酌呢樣嘢，其實大家都用緊，都好熟悉佢㗎啦。」對於質疑聲音的因由，他坦言「我都唔知點解」。
乖巧寶寶（網上截圖）
稱可以加入本地元素 如「乖巧寶寶爬龍舟」
主持人提醒，或者是因為市民認為在香港擺放內地公仔，旅客會問為何要專程來港看內地人物，陳權軍表示會將「本地元素」加入乖巧寶寶，「無話唔接受㗎」，他又稱香港人不時去外地「睇自己嘅嘢都係咁，都一樣吸引㗎」、「最緊要吸引多啲人嚟打卡啫」。有什麼本地元素的例子？陳權軍指可以是乖巧寶寶爬龍舟，「最緊要大家覺得有趣喎，咪去做囉。」他又稱西貢區議會與香港一樣，「都喺度摸索緊咋嘛」，最後目標都是令香港人留港消費。
既然目標是香港人，為何不用本地漫畫家作品？陳權軍即表示，「我唔係話呢件乖巧寶寶會放成世喺度㗎嘛」，稱可能一年半載後會轉「第二樣嘢」，才能保持吸引力。
陳權軍（資料圖片）
什麼是乖巧寶寶？ 陳：你當佢一嚿雲咁又得
主持人問當西貢區議會主席，即民政府專員提出乖巧寶寶意見時，議員如何反應。陳權軍稱「大部分都知係咩嚟」，因為手機都有使用該公仔，他又稱議員「一講就知係咩嚟」，在即時通訊群組「即刻彈嚟彈去，嗰啲乖巧寶寶」。他無法說出個人最喜歡乖巧寶寶系列，但最常用「Hello 嗰啲咁嘅嘢」。主持陳志雲笑言至今不知乖巧寶寶是什麼，陳權軍就解釋「你當佢一嚿雲咁又得」。
乖巧寶寶（網上截圖）
為何不反對主席提議 陳： 政府唔會想㧬我哋死
主持最後談到新一屆區議會的討論氣氛，會否只是討論如何執行、不會推翻民政專員的建議。陳權軍直言：「政府唔會想我哋死㗎嘛，梗係有啲嘢，『喂大家向呢個方向』，咁我哋咪討論呢個大方向嘅嘢。」陳志雲表示，政府不會每次正確，陳答道：「所以我哋咪要令件嘢唔好死囉！」
陳權軍向三位電台主持說，「其實你哋都收集好多市民意見，你應該提吓我哋就真啊，應該要搞咩」，主持聞言失笑，反指「你先係區議員喎」，陳權軍認真表示「唔係，真㗎，而家香港係大家㗎嘛，唔係話『喂一個區議員可以搞得掂』」，他稱每區區情不同，指主持人「你哋年青人，畀多啲意見，點去搞啊」。