【獨媒報導】立法會今早舉行《施政報告》答問會，本身是律師的選委界議員何君堯稱只給予行政長官李家超70分，因為對《基本法》第23條立法未有具體時間表，「你應該可以攞到90分，我扣咗你20分。」李家超就解釋，希望立法能處理可預計、最極端的情況：「我唔鍾意反反覆覆，我唔鍾意做完一樣嘢再補救。我係希望立一個23條法律，用內地術語係『管用』。」他更用普通話讀出「管用」一詞。
何君堯質疑，《施政報告》中只稱會作準備工夫，110項 KPIs 「關鍵績效指標」更沒有提及立法時間表。但李家超表示與何君堯一致，即同樣關注國家安全，他表示如立法便必須處理可預計、最極端的情況。
與2003年情況大不同 李家超：須令對方完全唔可以埋身
李家超進一步稱，香港現時與2003年的情況大不同，「因為嗰陣時嘅國家安全風險唔同現實呀嘛！嗰想像唔同，敵人唔同呀！國家安全對敵嘅情況嚟㗎！係咪！係另外一種戰爭嚟，不過用另外一個手法，例如顏色革命，例如係一啲滲透，例如用間諜。呢一啲手法唔需要認真咩？唔需要諗到最好嘅方法，令到你完全唔可以埋身咩？係咪輕輕盡快解決佢，就係一個要點呢？」
保安局早前表示正就立法進行廣泛研究，李家超補充指，每個人均有盲點，「紅隊」概念正是填補盲點，包括審視全球的國家安全法律，「睇吓有冇啲盲點我係未開嘅，我睇晒所有盲點，我都有啲信心呀，係咪呀？」他認為，如立法便須符合國家要求、管用及有效的法律，「宜家危害國家安全嘅手法千變萬化呀！」
李家超稱，在面對網絡攻擊、假訊息、武器化、個人私隱，更須認真透過法律保障安全系數，吸納不同及未能想像的威脅，並達致防範的作用，「佢嚟都唔敢嚟呀！」
張欣宇關注反修例被捕年輕人 李家超：遵守香港法律就是建設力量
在答問會上，張欣宇問李家超，如何引導因2019年反修例運動被捕的年輕人重新投入社會。行政長官李家超表示已多次回應，重申任何人均必須為其行為負責，「當你負咗責任，梗係會幫你啦，政府會幫你，社會大眾都會幫，呢個大家都有一個共識。」
張欣宇
李家超認為，如果已受到法律制裁，社會應協助他成為社會貢獻的一份子，「過去係咁，宜家都係咁。」他強調，只要支持一國兩制、《基本法》和遵守香港法律，同為香港的建設力量。
博物館數目增至19間 馬逢國倡設回歸紀念館、文學館
《施政報告》提出制訂「十年文化藝術設施發展藍圖」，康文署旗下博物館數目增至19間，但未有透露4間博物館的名稱。另一選委界議員馬逢國便問李家超，當局會否設立回歸紀念館、文學館。
李家超稱對文化、歷史追求百花齊放，政府及民間應「一齊做」，重申態度開放，「當然文學館我亦都係非常支持，因為文學係代表整個社會嘅素質，係素養嘅代表嚟。去推崇文學係會推崇我哋嘅素質。」
馬逢國
無打算撤回「辣招」 李家超：動態留意實際情況
政府在2011年推出「辣招」壓抑樓價，限制非香港永久性居民買樓。經民聯龍漢標稱現時樓市已有調整，市場上再無炒家，憂慮樓市如持續下滑，自置居所家庭受到衝擊，問李家超是否有市場指標作考慮。
李家超表明無打算撤回「辣招」，重申當局緊密留意市場情況，包括樓價、成交量、樓盤銷售情況及經濟環境等，「我哋係會動態咁留意住實際情況。」
經民聯 龍漢標
田北辰促交代對外復常路線圖 李家超強調路線清晰
此外，田北辰則稱對《施政報告》有失望之處，認為須當局交代「0+0」入境檢疫措施時間表，及對外復常路線圖，才能吸引境外人才。田北辰在發言期間滔滔不絕，最後更遭主席梁君彥打斷。
李家超回應時亦稱：「其實阿田議員我非常知道你想講乜㗎喇，因為喺呢個議題裡面好清晰你嘅立場，你係一個主導者嚟。」
另外，李家超表示，明白市民關心「0+0」，當局亦希望能吸引旅客來港，惟重申其考慮更多，包括醫療體系能否負苛，不希望復常之路「反反覆覆」。
他更糾正田北辰的說法，強調政府路線清晰、方向不變，「你話無路線，係不正確，我絕對有路線。我唯一係我唔可以宜家話畀你聽，我一月，下一個月會做乜。」李家超再三強調，當局目標不變，要為本港的民生、經濟活動創造最大空間。
田北辰
田北辰會後向梁君彥道歉
在會議後，田北辰主動向梁君彥道歉：「首先呢，我想公開向主席道歉。因為準備嗰啲嘢已經好快講，咁佢一早話明一分半鐘，但就無響鐘呀嘛，咁我響鐘無睇到咁咪照講囉，所以有少少爭拗。咁就同大家講聲啫。」